Ka Mene Kö La Wesi Ula i Akötresie Ngöne La Mele i Epun?

Maine tro sa e lapaan la Tusi Hmitrötr, tro lai a ‘nyi wane’ me ‘acatrene la lapaune së.’ (Kol. 2:6, 7) Ngo, tro ha hetre thangan la itre trepen meköt i Iehova ngöne la mele së, e hne së hna lapa mekun me trongën itre ej. (Heb. 4:12; Iako. 1:22-25) Kola qejepengöne hnene la tusi Iosua 1:8, la köni aqane tro sa e hnyawane la Tusi Hmitrötr, nge troa hetre thangan: (1) Troa e “ lai me jid.” (2) Tro sa “mekune ngön’ ej”, kola hape, tha tro kö sa e nyimenyimën ngo troa e matre ijiji së troa mekun ajuine la itre hne së hna e, me mekun ka hape, easë fe a hane melën. (3) Troa trongëne “asë tune la hna cinyihane ngön’ ej”. Nyipiewekë troa melëne itre ej, matre troa “loi xölene” me ‘inamacan’ la aqane ujë së o drai.