Itre Hna Melën
◼ Australie: John la ketre atr ka qa hna inine la itre ini ka tru, nge ka majemine hmi ekö lo kola nekönatr, ngo thupene jë hi, ame koi angeic, “pë hnyawa kö Akötresie.” Hnene la ketre pionie hna hamë angeice la boroshür, La vie a-t-elle été créée ?, nge thupene lai, ngöne la ketre iwaihmaca, kolo hmaca pena ha hamëne la boroshür, Origine de la vie. Hnene la pionie hna catre akökötrene la aja ka eje thei angeic hnene la hna traqa fë la itre zonale ka hnyipixe, me amamane koi angeice la itre taane mekune ka qeje pengöne la aqane xupe la itre ewekë maine itre hna perofetane hnei Tusi Hmitrötr. Öhne jë hi angeice ka hape, kapa ha John ka hape, hetre Akötresie, haawe angeice a hamëne ju la itus La Bible : Parole de Dieu ou des hommes ? Thupene la hnei John hna e, öni angeice e sipu qeje angeice ka hape, “nango saze hë la mekunang göi Akötresie.” Ame hnene la pionie hna hamëne la itus Ini Tusi Hmitrötr, me amamane koi John la paragarafe 8 ngöne la götrane 20 me paragarafe 13-16 ngöne la götrane 23-24. Hnene la itre xötre hna fejane e hnine la itus hna ketri John, ame hnei angeic hna qaja ka hape, “Qanyi Tusi Hmitrötre pë hë anyipicine laka hetre Akötresie.”
◼ Mexique: Önine la ketre atr kowe la ketre trejin, tha jelenyipicine kö angeic, ka hape, qaathei Akötresie la Tusi Hmitrötr. Ame hnene la trejine hna amamane la enyipicine ka hape, qaathei Akötresieti la Tusi Hmitrötr. Thupene la nyimu iwaihmaca, ketr jë hi la hni ne la atr hnene la hnei angeice hna inine qa hnine la Tusi Hmitrötr. Hna ketr hnyawa la hni angeic la angeic a öhne la itre trepene meköti Akötresie. Öni angeice kowe lai trejin: “Ame ekö lo nyiso a xötrei ce wange la Tusi Hmitrötr, kösë lo ame la itre eamone ej, tre ka tune hi la itre eamo qa hnine la itre xa itus, nge tha ketri ni kö. Ngo ame enehila, ame la eni a e la itre eamo göi aqane mele qa hnine la Tusi Hmitrötr, tre, kolo hi lai a huliwa la mekuthetheung.”
◼ États-Unis: Ame la kola cainöje ngöne la gaa tru atr hnene la lue trefëne ngöne la ketre traone ka tru, iöhnyi ju hi nyidro memine la ketre föe qaa Taiwan ka mejiune koi Akötresie, ngo ka mekune ka hape, ame la Tusi Hmitrötr, tre tusi ne la itre atr ka traqa qaa cailo. Hnei eahlo hna tro meköti kowe la wenge itus hnei nyidroti hna amë wengën, ke, ngacama ka tru koi eahlo la mel, ngo ame pe kösë lo eahlo hi a mele menu. Eahlo a ajane tro la Tusi Hmitrötr a amamane la sipu aliene la mel. Hnene la lue trefëne hna nyiqaane inine la Tusi Hmitrötre me eahlo jëne lo itus Ini Tusi Hmitrötr, memine la boroshür, La paix et le bonheur durables : comment les trouver. Qëmekene tro angatre a wange lai mekene 2 ne la itus, hnei angatre hna pane ithanatane la ini ne la boroshür, “Un guide bénéfique pour tous les humains.” Thupene la hna ce wange la sikisi lao pane paragarafe ne lai ini, kola haine hnene la föe ka hape, pëkö ketre itusi ne hmi ka ceitu memine la Tusi Hmitrötr. Thupene la hna ce wange la itre hna perofetane hnene la Tusi Hmitrötr ka eatre hë, öni eahlo, “Pëkö ketre itusi ka qaja la nyipici ka ceitu memine la Tusi Hmitrötr!”
◼ Japon: Ngacama ase hë qaja hnene la atr kowe la trejine ka hape tha mejiune kö angeice koi Akötresie, ngo hnene la trejine hna catre pala hi wai angeic, me ce thawa me angeice la itre mekune hna xome qa hnine la itre taane mekune ngöne Réveillez-vous !, fene lo hna cinyihane ka hape Hasard ou conception ? Tro ju pë hë la itre drai, nge kola saze la aqane waiewekë ne lai atr, me nyiqaane mama ka hape, ma tro jë a hetre Atre Ixup. Ame hë enehila, mejiune hë angeice koi Akötresie, nge kola ini Tusi hmitrötre me angeice hnene la trejine jëne la boroshür, Itre Maca Ka Lolo Qaathei Akötresie!
◼ Canada: Hnene la ketre trejine föe hna hamëne la lue zonale ka hnyipixe kowe la ketre föe ka lö qa ngöne la hnalapa kowe la loto. Ame la kola bëeke hmaca hnene lai trejin, qaja jhnene la föe koi angeice ka hape, tha ajane kö eahlo troa porotrik, nge ketre tha mejiune kö eahlo koi Akötresie. Mekune jë hi la trejine föe troa wai eahlo hmaca me traqa fë la boroshür, Une vie pleinement satisfaisante : comment ? Ame lai trejine föe a iwaihmaca, hnei angeice hna qaja koi eahlo ka hape, ngacama atre hi angeic ka hape, tha ka mejiune kö lai föe koi Akötresie, ngo hnei angeice hna meku eahlo, ke, ketre thine eahlo ka hetre kuku. Hnei angeice hna xome la paragarafe 6, götrane 4 ne la boroshür, ka amamane ka hape, tria catre la itre eamo hna hamëne hnei atr. Thupene lai, hnei angeice hna ithuecatre koi eahlo troa e la itre ixatua hna hamëne ngöne la ini 2 göi aqane troa hiane la itre nekönatr. Ajane jë hi la föe troa xome lai boroshür.