Aqane Troa Hnëkëne La Itre Mekune Nyine Nyiqaane Ithanata
1. Nemene la eloine e troa lolo la aqane nyiqaane ithanata?
1 Tune la ketre hnepe göxen hna tupathe qëmekene xen, tro fe la itre mekune nyine nyiqaane a aijijë së troa porotrikë Tusi Hmitrötr. Isa pengöne kö la eqeane maine aliene la itre aqane nyiqaane ithanata ka hetre thangan, ngo tune la easa xeni la ketre xen ka lolo, nyipi ewekë troa hnëkëne hnyawa la itre mekun. (Ite edomë 15:28) Qa ngöne nemene matre kola lolo la aqane nyiqaane ithanata?
2. Nemene la aqane tro sa hnëkëne la aqane ithanata ka thue ajane la atr?
2 Iëne Jë La Itre Taane Mekune Hna Pi Dreng: Nyipi ewekë tro la itre pane ithanata së a thue ajane la atr, wanga tro pena angeice a umuthe tëne la ithanata së. Haawe, ame la easa hnëkë, mekune jë la itre hna ajane hnene la itre atr ne la nöj. Ame jë la aja i angatr, tre, ene la troa hetrenyi la ketre mus ka lolo, maine troa hetre mele ka loi ngöne la hnepe lapa, maine tro pena a apatrene la itre isi? Pi tro fe la itre atr a hane qaja la mekuna i angatr, haawe, hnëkëne hnyawa jë la ketre hnyinge ka troa upe lai atr troa qaja fe la sipu mekuna i angeic. Xome jë la ketre aqane nyiqaane ithanata qa ngöne la Huliwa Ne Baselaia ka ihmeku memine la aja ne la itre atr hne së hna cainöje kow. Ame la epuni a kuca la hmi ne la hnepe lapa, loi e troa xome la ketre hnepe ijine matre troa iamacanyine la itre aqane nyiqaane ithanata.
3. Nemene la aqane tro la itre pane ithanata së a ihmeku memine la qene nöje memine la aqane mele ne la itre atr?
3 Wange Ju La Itre Qene Nöje Ne La Itre Atr Me Itre Aqane Mele i Angatr: Ame ngöne la itre xa götran, ajane la itre atr tro sa canga qaja la aliene la traqa së. Ame pena ngöne la itre xa götran, e tha pane hnyingëne kö së la pengöne lai atrekë hnalapan, tre, kösë ka pë metrötrene së, nge ka loi fe troa ce thawa me angeice la itre xa mekune kö. Ame ngöne itre xa götran, ijije hi tro sa canga qaja la itre mekune qa hnine la Tusi Hmitrötr, pine laka itre ka hmi catre la itre atr. (Ite hu. 2:14-17) Ngo maine ka hmi lai atr ngöne la ketre hmi ka tha lapaune koi Iesu, maine ka pë hmin pena, haawe, the canga ithanatane kö me angeice la Tusi Hmitrötr, ngo ithanatane jë hë e kola iwai hmaca.—Ite hu. 17:22-31.
4. Nemene la aqane tro sa nyipiewekëne la itre pane trenge ewekë nyine tro sa qaja?
4 Itre Pane Trenge Ewekë: Hnëkëne hnyawane jë la itre pane trenge ewekë i epun. Ame la itre hnaewekë ka xoxopatr, nge ka maca, aqane ithanata ka sisitria hi lai. Ka nyipi ewekë catre fe la aqane hamëne së la itre pane trenge ewekë së. Loi e troa mama la trenge aja ngöne la huliwa. Haawe, hnyimahnyima jë, ke celë hi lai ka amamane laka, ka nyipi ewekë la atr koi së. E tro sa trongëne la itre mekune celë, tro lai a xatua së troa hnëkëne hnyawa la itre pane ithanata së me thue ajane la itre atr matre tro angatr a kapa la xen ngöne la ‘laulau i Iehova.’—1 Kor. 10:21.