Itre Aqane Cainöje Ka Hnyipixe Ngöne La Gaa Tru Atr
1. Nemene la tulu hna hamëne hnene la itre pane Keresiano ekö?
1 Ame la itre pane Keresiano ekö, tre, tha hnei angatre hmekuje kö hna cainöje ngöne itre hnalapa trootro. Hnei angatre fe hna hane cainöje ngöne la gaa tru atr. (Ite hu. 20:20) Hnei angatre hna tro kowe la itre götrane hna tro kow hnene la itre atr, ka tune la ēnē. (Ite hu. 5:42) Ame e Athenai, hnei Paulo aposetolo hna lapaa tro e nöjei drai kowe la hna maketr. (Ite hu. 17:17) Ame enehila, easë pala hi a tro fë la maca ka loi jëne la huliwa ne cainöje ngöne itre hnalapa trootro. Ngo easë mina fe a cainöje ngöne la itre götrane hne së hna atrehmekune ka hape, itre hna tro kow hnene la itre atr; ka tune ngöne la itre hnë acili loto, me itre hnë salem, me itre parcs, me itre xa götrane ju kö. Qâ i easë asë itre ka cainöj, la troa cainöje ngöne la itre götrane gaa tru atr nge hna nue koi së, ngo hetrenyi fe la lue aqane cainöje ka hnyipixe hna tupathe hë hnene la itre xan.
2. Nemene la ketre aqane cainöje ka hnyipixe hna nyiqaane tupathe lo treu Nofeba 2011?
2 Ketre Aqane Troa Cainöj Ngöne La Gaa Tru Atr: Tune la hne së hna goeëne ngöne la götrane 16 me 17 ne la Annuaire 2013, ase hë nyiqaane tupathe la ketre aqane cainöje ngöne la gaa tru atr e New York lo treu Nofeba ne lo macatre 2011. Hna pane iëne la ketre götrane ne la traone gaa tru atr matre troa amë la ketre laulau, maine lo hna hape présentoir, göne la troa atë la itre iatr memine la itre itus ngöne la nyimu qene hlapa. Itre thauzane lao atr ka cili thenge, ene fe lo itre ka lapaane la itre hnalapa hna thupëne hnyawan, memine lo itre atr laka, tha öhnyi angatre kö hne së e koilo hnalapa i angatr. Ala nyimu la itre atr ka cil. Ame hi ngöne la ca treu, 3 797 lao zonale nge 7 986 jë kö lao itus hna hamën. Ala nyimu fe la itre atr ka sipone troa hane ini Tusi Hmitrötr. Nge pine laka, eje hi lai la hna ithuecatre koi së troa kuca, ame ju hi la kola hamëne hnei itre atr la itre hune tus i angatr, tre kolo fe hë a canga thuemacane la itre ekalesia troa wange la itre atre cili.
3. Nemene la hna amekötine göne la aqane cainöje ka hnyipixe?
3 Nge pine laka hetre thangane catre la aqane cainöje cili, haawe, ase hë amekötine laka, tro fe a hane tupathe lai aqane cainöje cili e cailo fen, ngöne la itre traone gaa tru atr. Qanyine kö la itre hnalapa ne thewe huliwa ne la itre nöje troa atrehmekune la itre traone hnë troa tupathe lai aqane cainöje cili. Troa wange maine hetrenyi lo itre hna itronyi hnei itre kar me pital, lo hna traqa itronyi hnene la itre atr. Nge tro pë hë la itre hnalapa ne thewe huliwa a hamëne la itre xa hna amekötin, me qeje pengöne la aqane trongene la huliwa kowe la itre ekalesia ka xom la aqane cainöje cili. Ngacama hetre itre pionie ka ixatua ka hane xome lai aqane cainöje cili, ngo itre ka pionie lapa me itre pionie huti la itre ka kuca lapaane la huliwa cili.
4. Qeje pengöne jë la aqane cainöje ka hnyipixe ngöne la gaa tru atr.
4 Aqane Cainöj: Ame la itre ka cainöje ngöne la itre götrane gaa tru atr, tre angatr a treqene tro la itre atr a easenyine la laulau maine présentoir. Nge maine cile hë la ketre atr, angatr a qaja koi angeic troa iëne la itusi hnei angeice hna ajan. Maine hetre hnyinge i angeic, tro itre pionie a sa la itre hnyinge i angeic jëne la Tusi Hmitrötr. Maine hetre sine itus hnei angeice hna xom, tha nyipi ewekë kö troa qeje kuië ahnahna. Ngo maine tro lai atr a hnyingë pengöne la aqane nyithupene së la itre sine itus i së, ijije hi troa qaja ka hape, maine angeic a ajan, ijije troa iupi fë ahnahna kowe la ketre ne la itre hune tusi hna fejane ngöne la itus hna xom. Nge maine ijij, troa hnyinge ka hape: “Aja i epuni kö tro huni a traqa troa wai epuni ngöne la hnalapa i epun?” maine pena, “Atre hi epuni ka hape, ijije hi tro sa ini Tusi Hmitrötr jëne la itusi celë?”
5. Nemene hë la thangane la hnei lue trefëne hna tupathe la aqane cainöje celë ka hnyipixe?
5 Hetre thangane catre la aqane cainöje celë. Önine la lue xa trefëne ka hape: “Ame la nyiho a ami laulau, me goeëne la etrune la itre atr ka tro e nöjei drai, tre ketrepengöne pi hë la hni nyiho, ke nyiho ha öhne laka, ketre huliwa ka tru la hna kuca matre troa ketr la nöjei atr e cailo fen. Ame la nyiho a goeëne la atr, me wang atrehmekune la aqane sikusiku angatr hnei Iehova, tre kökötre jë hi thei nyiho la aja troa catre amë panëne la huliwa ne cainöje ngöne la mele i nyiho. Hnei nyiho hna hane mekune fe, ka hape, ma drei jë kö la Iehova a goeëne la hni ne la nöjei atr ka cile hmekune la laulau, me wang atrehmekune ka hape, hane hi la atr ka ajan. Nyiho fe a hane mekune ka hape, ma nyiho petre hi la a hane ce huliwa memine la itre angela.”
6. (a) Nemene la ketre aqane cainöje ka hnyipixe hna eköthe hnene la itre ekalesia, nge nemene la eisapengönen memine la troa cainöje ngöne la itre traone gaa tru atr? (b) Nemene la aqane tro la itre atrene la itre ekalesia a itö ixatua ngöne la huliwa celë?
6 Cainöje Ngöne La Götrane Gaa Tru Atr Hna Ahnithe Hnene La Ekalesia: Hetre ketre aqane cainöje ka hnyipixe hna eköthe hnene la itre lapa ne la itre qatre thup ne la itre ekalesia. Itre ka cainöj a ami laulau maine présentoir pena ngöne la ketre götrane gaa tru atr hna ahnithe koi angatre hnene la ekalesia. Isapengöne kö memine la troa cainöje ngöne la traone gaa tru atr, ke troa hëne la itre ka cainöje qa ngöne la isa ekalesia i angatr, matre troa cainöje ngöne la ca götrane gaa tru atr hna köjane koi angatre hnene la hnalapa ne thewe huliwa.—Wange ju la itre mekune hna eköhagen, hna hape, “Epi Tro Sa Ixatuanekeun.”
7. Maine ijij, nemene la nyine troa kuca hnene la itre qatre thup matre tro sa hane cainöje ngöne la itre götrane gaa tru atr?
7 Tro la itre qatre thup a thele la itre götrane gaa tru atr nge hnë cainöje ngön hnene la ekalesia, matre troa wang ka hape, ka loi jë kö troa xome lo aqane cainöje ka hnyipixe? Troa wange la itre hnë traqa itronyi hnei itre kar, me itre götrane ka tune la place e vil, me itre parks, me itre hnë salem, me itre campus ne université, me hna kei hnei avio, me itre götrane laka, hna lapaa itrony hnei itre atr e nöjei macatre. Ka loi troa ami laulau ngöne pala hi la ca götran, me drai, me traem. Hnene la itre xa trejine hna öhne laka, ka loi ju kö la troa lö fë la nyimu laulau a tro koho hnine la itre hnë salem ka tru, hune la troa lapa fë la ca laulau e kuhu trön la ca magazë, pine laka, ame e cili, casi la hnei itre atr hna mekun, ene la troa xome la hnei angatre hna troa itön. Ame ngöne la itre xa götran, ka tune la itre gojenyi hna lapaa trongëne hnei itre atr, tre ma loi e tro hi a ami présentoir. Ijije hi tro la itre qatre thup a télécharger qa ngöne ëternet la itre iatr ka tru ne Ita Ne Tup me Réveillez-vous !, memine lo itus Ini Tusi Hmitrötr. Hna hnëkëne kö la itre iatr cili ngöne ëternet nyine jia ne huliwa göne lo aqane cainöje ka hnyipixe. Tro la itre ka hane sine lai aqane cainöje cili a tune lo aqane kuca ne la itre ka cainöje ngöne la itre traone gaa tru atr, nge tro fe angatr a trongëne hnyawa la itre hna amekötine hnene la itre qatre thup. Maine hetre atr ka ajane tro angatr a bëeke troa wai angeice hmaca, ngo ka lapa ngöne la götrane tha hna ahnithe kö koi angatre troa cainöje ngön, loi e tro angatr a canga nyi aliene lo sine pepa hna hape, Veuillez suivre l’intérêt (S-43), me hamëne kowe la seketere ne la ekalesia i angatr.
8. Ngacama tha kolo kö a xom lo lue aqane cainöje ka hnyipixe hnene la ekalesia i nyipunie, ngo nemene pala kö la nyine tro nyipunieti a kuca?
8 Itre Götrane Hna Isa Ahnithe Kö Koi Së: Ame ngöne la itre götrane hnë troa cainöje ngön hnene la itre ekalesia, tre tha ka tune kö ngöne la itre traone gaa tru atr; qa ngöne lai, tha nyipi ewekë kö troa hane ami laulau maine présentoir pena. Ngo qa i angatre fe troa hane cainöje ngöne la itre götrane gaa tru atr. Hetre itre hnë saleme kö, maine itre magazë ka tru pena ngöne la itre götrane hnei nyipunieti hna cainöje ngön? Hetre parc kö maine ketre götrane pena hna lapaa traqa itronyi hnene la itre atr? Hetre huliwa kö hna lapaa sine hnene la itre atr, ngöne lai götrane hnei nyipunieti hna cainöje ngön? Maine eje hi, tro hë nyipunieti a madrine qa ngöne la hna cainöje ngöne la itre götrane cili.
9. Pine nemene matre loi e tro sa sikusikune troa cainöje kowe la itre atr e cahu itre hne së hna tro?
9 Ame la aja i Iehova, tre ene la tro ‘la nöjei ate asëjëihë a mele me wangate hmekune la nyipici.’ (1 Tim. 2:4) Celë hi kepine matre easa thele troa tro fë la maca ne la Baselaia koi nöjei atr asë, qëmekene troa nyipune la fen. (Mat. 24:14) Ame ngöne la itre xa götran, tha hmaloi kö troa traqa me öhne la itre atr ngöne la hnalapa i angatr. Ngo ame hë ngöne la gaa tru atr, tre iöhnyi ju hi së me angatr, nge ijije hë tro sa ithanata me angatr. Ma celë hmekuje hi la aqane troa ketri angatr hnene la maca ka loi. Qa ngöne lai, ange catre pi së cainöje ngöne la itre götrane hne së hna iöhnyi memine la itre atr.—2 Tim. 4:5.
[Hna eköhagen götran 5]
Epi Tro Sa Ixatuanekeun
Hne huni hna drei mejene laka, hnene la itre xa ka cainöje hna isa traqa qa ngöne la isa ekalesia i angatr, matre troa cainöje ngöne la casi la gojeny, maine casi la hna acili loto, nge casi la biero maine hnë traqa itronyi hnei itre kar pena. Hnei angatre fe me itre xan hna hamë itus kowe la casi la hna huliwa, maine casi la hnë itreqe, me casi la hnë wasi maano, nge casi mina fe la hnë salem. Ame hë la thangane lai, tre elëhni hë la itre ka huliwa, memine la itre ka trene hnalapa hmekune lai götrane cili, ngacama isa traeme ne traqa ne la itre ka cainöj. Qa ngöne lai, kola sipone laka, epi tro kö sa isa cainöje ngöne la itre götrane gaa tru atr hna ahnithe kö koi së hnene la ekalesia së.
Maine easa ajane troa cainöje ngöne la götrane hna ahnithe kowe la iatrene la ketre ekalesia kö, kola sipone troa pane wange la atre thupëne la huliwa ne cainöje ne la ekalesia së. Nge tro pë hë angeic a ithanata memine la atre thupëne la huliwa ne cainöje ne lai ketre ekalesia, me sipone matre tro sa hane cainöje ngöne lai götrane hna ahnithe koi angatr. Maine hna hane ahnithe kowe la itre ekalesia ka ithanatane la itre xa qene hlapa kö la ketre götrane hna cainöje ngön hnene la iatrene la ekalesia së, kola sipone kowe la itretre thupëne la huliwa ne cainöje troa thuemacane hnyawa la iatrene la isa ekalesia i angatr, matre tha tro kö sa aelëhnine menune la itre atr. Epi tro sa ce huliwa hnyawa, matre “kuca alolone jë me amekötine” la nöjei huliwa së asë.—1 Kor. 14:40.
[Iatr ne la götran 6]
[Iatr ne la götran 6]