Hapeu Hnei Nyipunieti Kö Hna Lapaa Goeëne La Itre Ithuemacany Ngöne Lo Tabolo?

Hnene la itre qatre thup, me itre drikona me itre xane fe hna pune majemine troa goeëne ngöne tabolo ka hape, hetre hnëqa i angatre kö? Ngo ame la itre ithuemacanyi e cili, tre itre ka nyipi ewekë thatraqane asë hi la iatrene la ekalesia. Atre kö nyipunie ka hape, eue la tro nyipunieti a nyihnyawa uma ne baselaia? Hapeu, hetre tusi kö hna kapa qaathene la atre thupëne la sirkoskripsio maine qaathene la hnalapa ne thewe huliwa pena? Atre kö nyipunieti la tane la cainöj e mecixeni maine sabath, matre ijije troa hane hëne la itre ka ce ini Tusi me nyipunie? Hapeu, hna saze jë kö la porogarame ne la itre icasikeu nyipunie, maine porogarame thatraqane la gurupe ne cainöje i nyipunie? Tha kolo hmaca kö a e la itre ithuemacanyi celë ngöne la itre hawa ne icasikeu, celë hi matre thatreine kö tro la itre qatre thup a thuemacane la itre trejin asë. Qa ngöne lai, epi tro sa goeëne lapaane la itre ithuemacany hna amë ngöne tabolo. Maine hne së lai hna lapaa majemine thele troa atre la itre ithuemacany ka hnyipixe, haawe hmaloi hi tro sa ‘kuca alolone me amekötine la nöjei ewekë asë.’—1 Kor. 14:40.