Inamacane Pi Ngöne La Hna Cainöj
1. Pine nemene matre nyipi ewekë troa hetre wangatrehmekun ngöne la hna cainöj?
1 “Tune la nöjei mamoe nyipine la ite luko” itre hlue i Akötresieti a cainöj “qëmeke ne la xöte ka qaliqali me ka ena.” (Mat. 10:16; Fil. 2:15) Kola mama jëne la itre ithuemacany, laka nyimutre la itre icilekeu me iangazo me atrekënö atr ngöne la itre nöj, nge celë hi hatren laka ame la nöjei atr ka thiina ka ngazo, tre, “tro pala kö angat’ a ngazo.” (2 Tim. 3:13) Nemene la itre trepene meköti ne la Tusi Hmitrötre ka troa xatua së troa ‘inamacan’ me hetre wangatrehmekun ngöne la hna cainöj?—Mat. 10:16.
2. Nemene la itre jole ka troa upi së troa tro qa ngöne la teritoar, me cainöje pena ha ngöne la ketre götran?
2 Loi e Troa Maca Mek: Kola qaja atrune hnei Ite Edomë 22:3 la pengöne la atr ka inamacan, laka angeic a ‘zaen’ la ewekë ka ngazo. Wange kö! Ijije hi troa saze la itre atr ka mele tingetinge pala hi ngöne la nöj. Maine jë tro nyipunie a öhne laka kola tru catre la huliwa i polis, maine kolo pala hi a cacaxenyi la itre atr göi troa icilekeu e cahu gojeny. Ame e itre xa ijin, tro hi la ketre atr hnei nyipunieti hna cainöje kow a hmekë nyipunie. Ame e cili, tha tro pi kö nyipunie a thele troa pi atre, ngo loi pe troa canga tro qa lai, me cainöje pena ngöne la ketre götran.—Ite edomë 17:14; Ioane 8:59; 1 Thes. 4:11.
3. Tro sa trongëne tune kaa la hna qaja hnei Ate Cainöj 4:9 ngöne la hna cainöje trootro?
3 Loi e Troa Ce Huliwa: Kola qaja ngöne Ate Cainöj 4:9, ka hape: “Loi la ala lue hune la ala cas.” Maine ka majemine nyipunie ekö troa cainöje cas, hapeue enehila, ka loi pala hi la aqane ujë cili? Tha ngazo kö lai ngöne la itre xa götran. Ngo ame ngöne itre xa götran, tre, tha ka loi kö e troa cainöje casi hnene la ketre trejine föe maine ketre thöthi pena, thupene la kola lö la jö. Kola mama jëne la itre hna melën, laka, loi e tro pala hi a hetre sine ce tro ka hmek. (Ate cai. 4:10, 12) Loi e tro fe nyipunie a hnehengazone la itre atrene la gurupe i nyipunie, nge troa ithuemacanyi maine epuni ha troa tro qa ngöne la teritoar.
4. Tro sa amamane tune kaa laka easa hnehengazone la nöjei atrene la ekalesia?
4 Hnëqa ne la itre qatre thup troa hamëne la ixatua ka ihmeku memine la itre ewekë ka traqa ngöne la nöj, ke, angatre a ‘hmekëne’ me hnehengazo së. (Heb. 13:17) Tro ha amanathithi së hnei Iehova, e hetrenyi the së la qahmihmi me catre ce huliwa me angatr. (Mika 6:8; 1 Kor. 10:12) Epi tro la itre hlue i Akötresieti a catre cainöje hnyawa, ngo cememine pala hi la inamacan.