Inine Jë La Itre Nekö i Nyipunie Troa Catre Nyi Hlue i Akötresie
1. Thenge la hna qaja ngöne Salamo 148:12, 13 nemene la nyine troa kuca hnene la itre keme me thin Keresiano?
1 Aja i Iehova tro la itre thöthi a atrunyi Nyidrë. (Sal. 148:12, 13) Celë hi matre tha itre keme me thin Keresiano hmekuje kö a inine la itre nekö i angatre la itre nyipici me itre wathebo i Akötresie qa hnine la Tusi Hmitrötr. Ngo angatre mina fe a ini nyudren troa catre nyi hlue i Iehova. Tune kaa la aqane tro angatre a hamëne trootro la ini cili?
2. Nemene la thangane la tulu ka lolo ne la keme maine thin kowe la itre kuku?
2 Tulu Ka Lolo: Hnei Guideona lo Atre amekötin hna qaja kowe lo 300 lao atre i nyidrë, ka hape: “Goeë ni hi, me kuca tun.” (A. ame. 7:17) Pengöi itre nekönatre hi la troa goeëne me nyitipune la itre keme me thine i nyudren. Kola huliwa jidri la ketre kem, nge ame la nyidrëti a lö kowe la hnalapa i nyidrë e mecixen e hmakany, tre, ngacama tru la trenge pi meköle i nyidrë me kucakuca, ngo nyidrëti a ce tro me itre neköi nyidrë matre troa cainöje trootro. Ngacama pëkö hnei nyidrëti hna qaja, ngo nyidrëti hi lai a ini nyudren, laka, ka nyipi ewekë catre kö la huliwa ne cainöj hune la itre xaa ewekë. (Mat. 6:33) Hapeue la itre nekö i nyipunie, nyudreni kö a öhnyi nyipunieti e xome cememine la madrine la nöjei pengöne huliwa thatraqane la hmi, tune la troa thith me e la Tusi Hmitrötre me qeje mekun ngöne la itre icasikeu, me cainöj? Eje hi laka, thaa tro jë kö a pexej la tulu hnei nyipunie hna troa amaman. Ngo canga tro hi la itre nekö i nyipunie a drenge la itre ini hnei nyipunie hna hamën göne la aqane troa hmi koi Iehova, e hnei nyudreni hna öhne la aqane catre i nyipunie troa nyi hlue i Nyidrë.—Deu. 6:6, 7; Rom. 2:21, 22.
3. Nemene la ixatua nyine tro itre keme me thin a hamëne kowe la itre nekö i angatr?
3 Eköthe Trongëne Jë La Itre Aja: Kola catre hnene la itre keme me thin troa inine la itre nekö i angatr, matre atreine nyudren troa tro me ithanata me heetr, me kuca la itre xa ewekë ju kö. Hnene laka kola tru trootro la itre nekönatr, ene pe hetrenyi la itre aja ka hnyipixe nyine tro nyudreni a thele troa eatrën. Maine lue Keresiano la keme me thin, haawe, ijije hi tro nyidroti a xatuane la itre nekö i nyidro troa eköth amë me thele troa eatrëne la itre aja ngöne la götrane la ua ka ihmeku hnyawa memine la macatre i nyudren me hna atreine hnei nyudren. (1 Kor. 9:26) Hapeu, epone kö a inine la itre nekö i epon troa isa qeje mekun thenge la itre sipu trenge ewekë i nyudren, me hnëkëne la itre hnëqa i nyudren thatraqane la Ini Ne Cainöj Qathei Akötresie? (Sal. 35:18) Hapeu, epone kö a ini nyudren troa xome la nöjei pengöne aqane cainöj? Epone kö a xatua nyudren troa eköthe amë la itre aja celë nyine eatrën, tune la troa bapataiso me xome la huliwa ne cainöj ngöne la drai ka pexej? Hapeu, epone kö a ithuecatre koi nyudren troa ce tro memine la itretre cainöje ka hni ne madrin nge ka troa hamë trenge catre koi nyudren?—Ite edomë 13:20.
4. Nemene la eloine kowe la itre nekönatr e troa ini nyudreni e co petre kö?
4 Kola qaja hnene la atre cinyihane la salamo, ka hape: “Akötesieti fe, hnei cilieti hna ini ni qan’ e thupëtesiji ni; nge hnenge hna amamane uti hë enehila la ite huliwa i cilie nyine hain.” (Sal. 71:17) Nyiqaane inine jë la itre nekö i nyipunie ngöne la nyudreni petre kö a co, matre troa nyi hlue i Akötresie. Maine tro nyipunie a xatuane la itre nekö i nyipunie troa acatrene hnyawa la mele i nyudren ngöne la götrane la ua, eje hi lai laka, tro hë nyudreni a kepe thangane ka loi elany ngöne la nyudreni a tru!—Ite edomë 22:6.