Kola Sa La Itre Hnyinge i Nyipunie

◼ Pine nemen matre nyipi ewekë tro sa atreine wai ewekë hnyawa ngöne la aqane troa drenge la itre icasikeu ne la ekalesia jëne la telefon?

Nyimutre la itre ekalesia ka huliwane la telefon matre troa aijijëne la itre atr troa hane drenge la itre icasikeu qa ngöne la itre hnalapa i angatr; ketre ewekë lai hna xom matre troa xatuane la itre hna ajolëne hnene la mec maine itre xaa ewekë pena, troa hane sine la itre icasikeu ngöne la Uma Ne Baselaia. Loi e troa xecie hnyawa, laka, ketre hna amekötine lai ka lolo hna xom matre troa xatuane la itre trejine ka hetre nyipi kepin matre thaa ijiji angatre kö troa sine la itre icasikeu; celë hi matre loi e troa atreine waiewekë, me eköthe hnyawa la huliwa cili. Qa ngöne lai, hnëqa ne la itre qatre thup troa eköthe me thupëne la aqane huliwane lai, matre troa “kuca alolone me amekötine la nöjei ewekë asë.”—1 Kor. 14:40.

Tro la itre qatre thup a wange hnyawa matre troa pane huliwane lai kowe la itre trejin ne la ekalesia i angatr ka hetre mecin nge ka pë nyin maine itre sinatr pena, maine itre ka umë pena ngöne la itre hnalapa i angatr hnei itre xaa jol. Ijije mina fe tro la ketre atre cainöj ka wezipo maine sinatr, maine ketre ka inine la Tusi Hmitrötr ka kökötre hnyawa nge ka lapa pe hi ngöne hnalapa, a hane kepe thangane ka loi qa ngöne lai hna hnëkën, me hane e angatr thene la itre ka sine la itre icasikeu. Maine thaa ijije kö tro asë hi la itre atr ka aja ixatua ngöne la götrane cili a drenge la itre icasikeu jëne telefon, tre, ijije troa hnëkëne amë la itre xaa ewekë, tune la troa drenge icasikeu ngöne kaset.

Eje hi laka, thatreine kö tro sa aceitunëne la itre manathithi hne së hna kapa qa ngöne la hna sine la itre icasikeu, memine la itre xaa ewekë kö. Maine tro sa sine la itre icasikeu, tre, easa itö ‘iakeukawany’ me itre trejine me easë, nge easë fe a hane xatuane la itre ka xötrei traqa troa trotrohnine la enyipiewekëne la troa sine la itre icasikeu. Atraqatre kö la thangane hne së hna kapa qa ngöne la itre iamacanyi e hne së hna ketre sipu sine la itre icasikeu, nge ijije hi troa isa xatua së hnene la itre qatre thup, nge easa sipu öhne la ekeukawane la aqane melëne la ihnimi hnene la itre trejine me easë. Qëmekene troa tro qa ngöne la Uma Ne Baselaia, hna haluthe la ketre sör ka qatre hë hnene la ketre trejin, öni eahlo jë hi, ka hape: “Pëkö ewekë ka tune la ngöne telefon!”—Rom. 1:11, 12.

Tui Ana, laka, “tha qa kö hna pate ngöne la ēnē,” nyimutre mina fe enehila la itre trejine qatr, trahmanyi me föe ka sine pala hi la itre icasikeu, e ijije koi angatr. (Luke 2:36, 37) Ngacama nyipi ewekë catre la hna hnëkën, ene la troa drenge la itre icasikeu jëne telefon, ngo angatre kö a öhne la eloine la troa sine la itre icasikeu ngöne la Uma Ne Baselaia. Epi tro sa nyitipune la tulu i angatre ka lolo, ene la troa catre sipu sine la itre icasikeu së ngöne la easa thili koi Iehova Akötresie ka draië.—Sal. 95:1-3, 6; 122:1.