Thele Jë La Itre Atr Ka Hetre Hni Ne Ajan
1. Tro sa amamane tune kaa la hni ne ole së kowe la hnëqa ka tru hna aijijë së troa xom, ene la huliwa ne cainöj?
1 Ame ngöne lo Iesu a cainöj, hnei nyidrë hna trongëne la itre gojenyi gaa nany, matre troa tro fë la maca ka loi me akeukawane la hni ne la itre atr ka akötr. (Is. 61:1, 2) Ceitu së memine la itre ka tro fë la maca i Keriso, laka, hetrenyi the së la manathithi ka tru troa nyitipu nyidrë, hnene la hna catre troa thele la itre atr ka hetre hni ne ajan ngöne la teritoare së.—Mat. 10:11; 2 Kor. 5:20.
2. Kola mama tune kaa la atreine itrotrohni thei Paulo, nge nemene la thangane lai?
2 Loi e Tro Sa Atreine Itrotrohni: Hnei Paulo aposetolo hna majemine troa tro kowe la sunago, matre troa cainöje koi angetre Iudra me angetre ethen. (Ite Hu. 14:1) Ame e Filipi, hnei nyidrë me Sila hna thele la itre atr ngöne la ketre götran ‘hnei angatr hna mekun, laka, hnë thith.’ Hnei nyidro hna pane cainöj kowe la itre föe ka icasikeu e cili, nge hnene la ketre e angatr hna canga kapa la nyipici, Lidia la ëjen.—Ite Hu. 16:12-15.
3. Ngacama easa cainöj ngöne itre hnalapa trootro, ngo nemene la itre xaa ijine ka sisitria koi së troa cainöj?
3 Nyipici laka, easa cainöje ngöne itre hnalapa trootro, ngo hapeu, ijije fe kö tro sa cainöje kowe la itre atr ngöne la hna treqe kar, me itre hnë mano, me hnë thele huliwa, me e cahu gojeny, me ngöne itre hna salem me itre hna itö ewekë? Ijije mina fe tro sa cainöj kowe la itre ka lapa ngöne la itre uma hna eköhagen me hna thupëne hnyawa, hnene la hna cinyany maine telefone pena. Maine tro sa atreine waiewekë me canga ithanata hmekune la aja ne la itre atr ka isapengön ngöne la teritoare së, haawe, tro hë lai a aijijë së troa “cate troa huliwa i Joxu pala hi.”—1 Kor. 15:58.
4. Nemene la itre xaa aqane troa akökötrene la huliwa ne cainöje së, e hna nyi ifegone la teritoare ne la ekalesia së?
4 Nyimutre la itre trejine ka akökötrene la huliwa ne cainöje i angatr, hnene la hna tro kowe la ketre ekalesia, maine ketre nöje pena. Hnene la itre xane fe hna inine la ketre qene hlapa, matre troa cainöje kowe la itre atr ka traqa qa ngöne la ketre nöj matre troa mele ngöne la teritoare i angatr.
5. Tune kaa la aqane tro sa goeëne la hneijine së, nge nemene la nyine tro sa catre kuca?
5 Nyipi ewekë tro asë hi së a lapa mekune pala hi, laka, “ame la hlapa, te, fene hnengödrai.” (Mat. 9:37; 13:38) Hnene laka calemi catre hë la pune la fene ka ngazo celë, nyipi ewekë tro së isa ala caas a wange hnyawa la sipu pengö së me itre atreine së, me itre traeme së matre troa akökötrene la huliwa ne cainöje së. Kola akeukawane la hni së hnei Iehova, ka hape, maine tro sa amë panëne la itre aja ne la Baselaia, tre, tro hë Nyidrëti a amanathithine la trenge catr hne së hna kuca, matre troa akökötrene la huliwa cili.—Mat. 6:33.