Nyipi Ewekë Troa Xomihni Ngöne La Kola Cainöj
1 Kola troa 30 lao macatre ne Paulo a kuca la hnëqa i nyidrë cememine la madrin, ene la troa cainöj. Hnei nyidrëti hna catr, ke, hetrenyi la itre xaa jol hnei nyidrëti hna cile kow ngöne la hna cainöj. (2 Kor. 11:23-29) Ngo thaa hnei nyidrëti kö hna hmaca. (2 Kor. 4:1) Hnei nyidrëti hna trotrohnine laka, ame la trenge catre troa xomihni ngöne la huliwa ne cainöj, tre, qaathei Iehova. (Fil. 4:13) Ame la Paulo a mekune hmaca la aqane xomihni nyidrë cememine la nyipici, ijije hi tro nyidrëti a qaja, ka hape: “Nyitipu ni jë, tunge koi Keriso.”—1 Kor. 11:1.
2 Xomihnine Jë La Itre Itupathi Enehila: Ame ngöne la nöjei drai, nyimutre la itre trejine me easë ka cile kowe la ihnyimasai me icilekeu, maine kola xele pena ma drei angatre hnene la itre atrene la hnepe lapa, maine hnene la itre sine huliwa, maine itre sine ini pena. (Mat. 10:35; Ioane 15:20) Maine jë kola traqa la itre ewekë cili koi nyipunie. Ame ngöne la ketre götran, maine jë nyipunieti a isi memine la ketre mec, maine catre pena troa neëne la itre xaa nyine iamadrinë me itre xaa aqane iaö, ka troa tupathe la lapaun memine la aqane xomihni nyipunie. Ijije tro sa hetre trenge catre hnene la hna wange la itre tulu ne la itre hlue ekö ka mele nyipici, memine fe la itre trejine Keresiano enehila ka qëmeke kowe la itre jol nge ka elë hune itre ej.—1 Pet. 5:9.
3 Tro fe sa catr ngöne la huliwa ne cainöj, hnene laka xecie koi së laka, hne së hna “xetëne la ixete ne ishi ka pexeje i Akötesie.” (Efe. 6:10-13, 15) Nyipi ewekë mina fe tro sa thithi matre troa xomihni. Akötresie a hamëne gufane la uati hmitrötre i Nyidrë matre aijijë së troa xomihnine la itre itupath. (2 Kor. 6:4-7) Maine easa ajane troa ngaa Satana memine la fene i angeic, haawe, nyipi ewekë tro sa wanga atrune la itre nyine amekunëne i Akötresie matre troa ahnyipixene la mekuna së. (Sal. 119:24, 85-88) Tune la ketre nekönatr a kola e lapaane la ketre tusi hna iupi fë hnene la keme i angeic ka tru ihnimin, ketre tune mina fe, maine tro pala hi sa e lapaane la Tusi Hmitrötr, haawe, tro hë lai a acatrene hnyawa la aqane imelekeu së me Iehova. Tro hë sa inamacan troa cile kowe la itre itupath, e hne së hna sipu inine la Tusi Hmitrötr, ene pe, easa nue la itre mekuna i Akötresie troa iujine la itre mekun hne së hna troa axeciën, nge kolo fe a troa acatrene la aqane nyipici së koi Iehova.—Ite edomë 2:10, 11.
4 Itre Manathithi Hna Kapa Qa Ngöne La Hna Xomihni: Tui Paulo, hnene la hne së hna xomihni ngöne la huliwa ne cainöj, ene pe easa amadrinëne la hni Iehova, nge ketre, nyimutre la itre manathithi hne së hna troa kapa, a tune mina fe la itre xan. (Ite edomë 27:11) Haawe, epi tro pala hi sa catre ngöne la huliwa ne cainöj, me anyipicine laka, ka epine palua nge ka “atraqate la tupathe la lapaune i nyipunie hune la gole ka troa hnyeqet, loi pe hna tupath’ eje hnei eë.”—1 Pet. 1:6, 7.