Ijije Tro Epuni a Hetrenyi La Itre Mo!
1. Pine nemene matre tro sa wanga atrune la huliwa ne pionie lapa?
1 Hapeu, epuni kö a thele troa madrin me hane tro loi ngöne la mele i epun? Epuni kö a kapa la madrin qa ngöne la hna hane xatuane la itre xan? Aja i epuni kö troa akökötrene la huliwa i epuni koi Iehova? Maine epuni a kapa la itre hnyinge celë, loi e tro epuni a hane wanga atrune la huliwa ne pionie lapa. Nyipi ewekë catr tro sa wange hnyawa la itre hnëqa së hnine la fami, memine lo itre xaa hnëqa së qaa thei Tusi Hmitrötr, nge kolo a qaja lo itre kucakuca me itre sine meci së.
2. Amexeje jë la itre xaa pengöne mo ngöne la götrane la ua hna kapa hnene la itre pionie lapa.
2 Ame ngöne la itre hna cinyihane hnei Solomona, tre, nyidrëti a aceitunëne la itre manathithi qaathei Iehova memine la itre mo ne ngönetrei. (Ite edomë 10:22) Ame enehila, tre, itre manathithi qaathei Iehova la ka atrenamo së ngöne la ua. Nge, celë hi itre manathithi ka nyimutre hna kapa hnene la itre pionie lapa. Drei la ketre ceitun, ene la madrine i angatr ka sisitria troa ‘anyipi ewekëne la nöjei ijine’ matre ham, hune la troa isa kuci aja. (Kol. 4:5; Ite Hu. 20:35) Iehova a öhne me wanga atrun la itre huliwa hnei angatre hna kuca cememine la ihnim. Kösë itre “tenga mo e koho hnengödrai” ka thaa tro kö a hane paatr. (Mat. 6:20; Heb. 6:10) Nge pine laka, ame la itre pionie, tre, ka ‘maca la alameke’ i angatr, nge ka mejiune fe angatr, laka, tro Iehova a sajuëne la itre aja i angatr, haawe, kolo pala hi a kökötre la aqane imelekeu i angatr me Nyidrë.—Mat. 6:22, 25, 32; Heb. 13:5, 6.
3. Nemene la eisapengönene la kola nyinyape thele la itre mo ngöne la götrane la ua, memine la kola nyinyape thele la itre mo ngöne la götrane la ngönetrei?
3 Ame la troa nyinyape thele la itre mo ne fen, tre, celë hi ka troa eatrongë së ngöne la itre xaa ijin kowe la “nöjei ka hmo me nyine angazon.” (1 Tim. 6:9, 10; Iako. 5:1-3) Thaa ceitune kö lai memine la itre manathithi qaathei Iehova. Ame la ka xatuane la itre pionie lapa troa hetrenyi la aqane waiewekë ka loi ngöne la ua me troa xome hnyawa la itre nyipi ewekë thatraqane la mel, tre, hnene hi lo itre hawa hnei angatre hna nue ngöne la huliwa ne cainöj. (Fil. 1:10) Hnene la ketre trejine trahmany ka trene pepa nge ka cilëne la ketre götrane qa ka tru, hna nuetrije la huliwa i nyidrë ka xome menune pala ha la traeme i nyidrë, matre troa xome la huliwa ne pionie. Öni nyidrëti, ka hape: “Ka jole catre lo huliwang hnapan. Thaa ka ceitu kö memine la huliwa ne pionie. Eni hë enehila a xatuane la itre atr troa atre la nyipici. Ka sisitria kö koi ni la huliwa celë.”
4. Tune kaa la aqane tro la itre pionie lapa a kepe thangane la hnei angatr hna hane xatuane la itre xan?
4 Itre Manathithi Kowe La Itre Xan: Ame enehila, easë a qëmeke asë kowe la “nöjei ijine ka aköte ngöne la ite drai hnapin.” (2 Tim. 3:1) Ame la nöjei atr e cailo fen asë, tre, angatr a aja mejiun. Celë hi matre, tru catre la madrin hna kapa hnene la itretre cainöjëne la Baselaia, ngöne la angatr a xatuane la itre atr ka pë mejiune troa hane kapa la maca ka loi. Drei la madrine ka tru kowe la itre pionie lapa, ene lo itre ka catre kuca la 800 lao hawa ngöne la nöjei macatre, troa kuca la huliwa ne iamele!—1 Tim. 4:16.
5, 6. Nemene la ka aijijë epuni troa hane xome la huliwa ne pionie lapa?
5 Hapeu, hane kö epuni mekune hnyawa troa hane xome la huliwa ne pionie lapa? Maine jë kola upi së troa “anyipi ewekëne la nöjei ijin” ngo thaa göne kö la troa nyinyape thele la itre ka thaa nyipiewekë. (Efe. 5:15, 16) Nyimutre la itre atr ka ujë tune lai me ahmaloeëne la mele i angatr, ene pe kola aijijë angatre troa nango co la itre hawa ne huliwa i maseta, matre tro pena ha tru la ijine troa sajuëne la itre aja ne la Baselaia. Ijiji epuni kö troa eköthe la itre aqane mele i epun troa hane xome la huliwa cili me angatr?
6 Sipone jë koi Iehova la inamacane matre troa xatua epuni troa eköthe hnyawa la ketre porogarame ka lolo. (Iako. 1:5) Nemene la itre manathithi ka treqe nyipunie? Nyimutre catre la itre mo ngöne la ua! Tro hë Iehova a amanathithi epuni me hamëne la nöjei ewekë ngöne la götrane la ngönetrei. (Mat. 6:33) Qa ngöne lai, ame la itre ka thele la itre mo qaathei Iehova, tro hë angatr a kapa “la manathithi uti hë atraqate cat.”—Mal. 3:10.