Kola Sa La Itre Hnyinge i Nyipunie

◼ Hapeu, hna nue kö hnene “la hlue ka nyipici me ka inamacan” kowe la ketre gurupe ne Temoë ka ketre huliwa kö troa caas matre troa thele mekune hnine la Tusi Hmitrötr maine troa ithanatane la itre mekun?—Mat. 24:45, 47.

Ohea. Ngo, ngöne la itre götrane ka nyimutre ne la fen, hetrenyi la itre trejine ka ketre eköthe la itre gurupe me ketre huliwa caas, ene laka kola ketre thele mekune hnine la Tusi Hmitrötre ngöne la itre xaa topik. Ame itre xan, hnei angatre hna ketre sipu thele la enyipicine la aqane ujëne la Traduction du monde nouveau hnene la hna inine la Itre Hna Cinyihane qene Heberu me qene Heleni. Itre xan a thele la itre taane mekune ngöne la sias hna hane ithanatane hnene la Tusi Hmitrötr. Hnei angatre hna eköthe la itre porogarame ngöne Internet me jëne troa hane ithanata me itre xaa atr, me ifekeune la itre mekune i angatr. Ketre, hnei angatre hna eköthe la itre icasikeu, me fejane la itre itusi nyine troa amamane la itre hnei angatre hna ketre sipu thel, memine la itre xaa mekune hna xome qa hnine la itre icasikeu së, itre Keresiano, me qa hnine la itre itusi së.

Ame e cailo fen, kola mana la ini ngöne la ua hna kapa hnene la nöje i Iehova, me ixatua hna hamën ngöne la itre icasikeu ne la ekalesia, ngöne la itre asabele, me itre kovasio, memine fe jëne la itre itusi ne la organizasio i Iehova. Jëne la ixatua ne la uati hmitrötre i Iehova memine la Wesi Ula ne nyipici, Nyidrëti a hamëne la ka nyipi ewekë matre tro la itre ka nyihluei Akötresie asë a “nyipi ce hni . . . ngöne la mekune ka cas,” me lapa “acatene ngöne la lapaun.” (1 Kor. 1:10; Kol. 2:6, 7) Nyipici laka, atraqatre la hni ne ole së kowe la itre hna hnëkëne hnei Iehova ngöne la götrane la ua ngöne la itre drai tixenuë celë. Qa ngöne lai, thaa kapa kö hnene “la hlue ka nyipici me ka inamacan la itre itus, me itre icasikeu, maine itre porogarame ngöne Internet, nge thaa hna kuca pe maine eköthe pena hnene ej.—Mat. 24:45-47.

Ka lolo catre e hetrenyi thene la itre trejine la ajane troa xome la atreine waimekune i angatre matre troa sajuëne la maca ka loi. Ngo, thaa tro kö la aqane sipu huliwa caas tune lai, a xometrije la hna kuca hnei Iesu ngöne la ekalesia e cailo fen enehila. Ame lo hneijine i Keriso, hnei Paulo hna hmekëne la itre Keresiano, wanga troa kucakuca, me xome la itre traeme i angatre hnene la itre taane mekun, tune la troa “e la ite xötre ka pë pun, ate aciane la iwatratra, ngo tha ate aciane kö la acile hutine qa thei Akötesie ngöne la lapaun.” (1 Tim. 1:3-7) Loi e tro la itre Keresiano asë a ananyine “la nöjei ikelikelëne hmo, me e la ite xöt, me iwatratra, me ikelikelë göi wathebo; ke ka pë thangane me gufa kö lai.”—Tito 3:9.

Ame itre ka ajane troa kapa la itre xaa ithuemacanyi qa ngöne la hna ini Tusi Hmitrötr, me thele mekun, eahuni a könë angatre matre troa sine thele ngöne la itus Étude perspicace des Écritures, me “ Toute Écriture est inspirée de Dieu et utile ”, me itre xaa itusi së, tune la itre itusi ka qejepengöne la itre hna perofetane hnene la tusi Daniela, Isaia, me Hna Amamane. Ka mana la itre ithuemacanyi hna hamëne hnene itre ej göi troa inine la Tusi Hmitrötr, me mekune thel, nge jëne tro hi së lai a “tiqa . . . hnene la trotrohnine la aja i [Akötresie] ngöne la inamacane asë ne la u me wangate hmekun; mate tro pala hi [së] ijije koi Joxu, kolo pala hi a amadi nyidë, me wa ngöne la nöjei huliwa ka loi asë, me kököte ngöne la wangate hmekunyi Akötesie.”—Kol. 1:9, 10.