“Troa Qaja La Trenge Ewekë Nge Tha Qou Kö”
1 Hapeu, epuni kö a lapaa cile hnö me luelue troa qaja la lapaune i epuni ngöne la itre ijine ka ijij ngöne la hna ini maine ngöne la hna huliwa? Maine jë ketre jole ka tru koi epuni troa anyipicine ngöne la nöjei ijin kowe la itre sinee me kowe la itre atr ka lapa easenyi epun, maine pena kowe la itre atr hnei epuni hna thatre? Nemene la ka troa xatua së asë troa thele la itre ijine troa “qaja la tenge ewekë nge tha qou kö”?—Fil. 1:14.
2 Thaa Tro Pi Kö Sa Cile Hnö Troa Ithanata: Hapeu, epuni kö a cile hnö troa cilëgöline la nyipici qëmekene la itre enehmu i epun, maine ketre atr pena ka sili trenga thoi epun? Ngazo catre la aqane qeje Iehova hnene la itre atr, itre thauzane macatre hë enehila. Ketre hnëqa ka sisitria catre koi së, la troa anyipicine la Akötresi së ka pucatin asë! (Is. 43:10-12) Tro la etrune la ihnimi së koi Iehova a xatua së troa elë hune la itre aliene hni së ka tru, maine xou së pena, me upi së troa ithanata catr, ngo thaa tro kö sa cile hnö troa tro fë la nyipici.—Ite hu. 4:26, 29, 31.
3 Mekune hnyawa kö së laka ame la maca hne së hna tro fë, tre, maca ka loi. Troa kapa la itre manathithi ka epine palua hnene la itre ka wanga atrune la maca cili. Thaa tro kö sa mekun atrune menune pala ha la pengö së maine itre ka icilekeu me easë, celë hi ewekë lai ka troa xatua së troa catre cainöj.
4 Tulu Ne La Itre Xan: Ijije hi tro sa thele ixatua thene la itre trejin, me xome la itre aqane kuca angatr matre troa qaja la trenge ewekë i Akötresie nge thaa tro kö a xou. Drei la ketre ceitun, hnei Enoka hna catre qaja la hna amekötine hnei Iehova kowe la itre atr ka kuca la ngazo xajawa i Nyidrë. (Iuda 14, 15) Hnei Noa hna catre cainöje kowe la itre atr ka xele kö ma drei nyidrë. (Mat. 24:37-39) Hnene la itre pane Keresiano ekö ka “tha ’te tus, me tha hna inin” hna catre cainöj qëmekene la itre icilekeu ka catre hnine catr. (Ite hu. 4:13, 18-20) Kola edromëne hnine la La Tour de Garde me Réveillez-vous ! la itre ewekë hna melëne ekö hnene la itre atr ka lapaune koi Iehova nge ka elë hune la xoue atr me catre tro fë la evangelia.
5 Loi e tro sa catr troa wanga atrune la aqane mele nyipici ne la itre hlue i Akötresieti ekö, ene lo itre ka catre cile kowe la itre jole ka tru. (1 Ite jo. 19:2, 3; Mar. 14:66-71) Hnei angatr hna ‘catre göi Akötesi shë’ nge thaa hna xou kö troa ithanata. Haawe, ijiji së fe hi!—1 Thes. 2:2.