Kola Sa La Itre Hnyinge i Nyipunie

◼ Hapeu, ka loi kö troa salemë ewekë maine troa kuca la itre feet göi troa hetre manie troa xatuane la ekalesia?

Hna majemine hnene la itre hmi troa kuca la itre feet matre troa nyialiene la itre kees thatraqane la hmi, tune la troa itö xen, me salem, maine keremesi pena. Maine troa mekune hnei itre xan ka hape nyine loi itre ej, ngo ame pe, kola mama laka itre aqane tro lai a sipo. Ame Itretre Anyipici Iehova, tre, thaa celë kö la aqane thele manie lai hnei angatr.

Ame ngöne la zonal La Tour de Garde ne Ogas 1879, hna qaja hnene la ketre trejin, Russell la ëjen, laka thaa loi kö troa nyitipune la itre hmi me sipo manie; öni nyidrë: “Eahuni a mejiun, laka IEHOVA a sajuëne ‘ La Tour de Garde de Sion ’, nge maine aqane trongene hë lai, thaa tro jë kö ej a sipon me thele ixatua thene la itre atr. E thaa hamëne hë elanyi la itre jiane huliwa hnene la Atre qaja ka hape: ‘Ame asë hi la gool me sileva ne la itre wetr, tre, itre ewekëng asë hi,’ haawe, trotrohnine ju hi së e cili laka, ijine tro ha umuthe la kuci itus.”

Easë a catre xötrethenge la itre trepene meköti qa hnine la Tusi Hmitrötr: “Loi e isa hamëne thenge la hna axeciëne e kuhu hni; tha ngöne la hace hnin, me hna musinëne pena; ke aja i Akötesie la ate hamëne madin.” (2 Kor. 9:7) Hna hnëkëne la itre keesi hnine la itre Uma Ne Baselaia, matre troa isa kuiën hnene la itre atr la itre ahnahna hnei angatr hna isa mekune troa hamën. (2 Ite jo. 12:9) Thaa kolo kö a iupi troa kuiën la itre ahnahna; thaa ketre kolo kö a hamëne göi troa kapa pë hë thupen.