The Nuetrije Kö Së Lo Ihnimi Së Ekö Ngöne La Qaan
1 Ame ngöne lo Iesu hë e hnengödrai, tre, hnei Iesu hna hamëne la ketre eamo kowe la ekalesia ne Efeso; öni nyidrë: “Hetrenyi hë ni la kete ewekë göi ’ö, ngöne laka hnei ’ö hna nue tije la aja i ’ö hnapan.” (Hna ama. 2:4) Eje hi lai laka, nyimutre la itre trejine ka nango nanazij, paatre hë lo aqane hnimi Iehova hnei angatr ngöne lo xötrei. Ame ngöne lo easa atre ekö la nyipici, kola kökötre e cili la ihnimi së koi Akötresie me kowe la nöjei atr, nge kola upi së troa hane catre ce thawa memine la itre xan la mejiune së ka hnyipixe. Nemene la nyine troa kuca matre thaa tro kö a paatre lo ihnimi së ekö ngöne la qaan, me nanazije troa cainöj?
2 Troa Isa Ini Tus Me Sine La Itre Icasikeu: Nemene la ka akökötrene the së la ihnimi koi Akötresie me kowe la itre nöjei atr, ngöne la easa xötrei atre la nyipici? Thaa kolo asë kö lo itre hne së hna inine göi Iehova hnine la Tusi Hmitrötr la ka upi së troa hetrenyi la hnimi cili? (1 Ioane 4:16, 19) Celë hi matre, maine easa ajane tro la ihnimi së a “cia atraqate pala kö,” nyipi ewekë tro sa catre hetrenyi la nyipi atrehmekun, me sine thele la “nöjei ewekë asë ga jui Akötesie.”—Fil. 1:9-11; 1 Kor. 2:10.
3 Troa jole catre koi së enehila ngöne la itre drai tixenuë troa eköthe amë hnyawa la itre ijine tro sa isa etid, pine laka, tiqa catre hnene la itre ewekë hna hnehengazon nge tru la itre ihuline la fen. (2 Tim. 3:1) Loi e tro sa ami ijine ngöne la porogarame së troa xome la göxeni ne la ua. Ka nyipi ewekë fe tro sa sine pala hi la itre icasikeu, pine laka kola mama hnyawa la “drai [laka] easenyi hë.”—Heb. 10:24, 25.
4 Huliwa Ne Cainöj: Kola xatua së hnene la aqane catre së cainöj, troa eje pala hi the së lo pane ihnimi së ekö koi Akötresie. Ame ngöne la easa tro fë la maca ka loi, easa a isa mekune hmaca lo ihnimi Iehova me itre hnei Nyidrëti hna thingehnaeane koi së, nge kola xatua së troa lapa fë hnyawa e kuhu itre hni së la mejiune së nge thaa tro kö a nanazije la ihnimi së. Maine easa ajane troa inine la itre atr la nyipici qa hnine la Tusi Hmitrötr, nyipi ewekë tro sa pane isa thele troa trotrohnine hnyawa la itre ini cili, nge tro hë lai a acatrene la lapaune së.—1 Tim. 4:15, 16.
5 Ijije koi Iehova troa kapa la nöjei ewekë asë, tune mina fe la ihnim; Nyidrëti la nyine tro sa hnime catrën. (Hna ama. 4:11) The tro pi kö sa nue troa nanazije la ihnimi së koi Iehova. Loi e tro sa catre acatrene lo pane ihnimi së ekö, hnene la hna catre isa inine la Tusi Hmitrötr, me sine pala hi la itre icasikeu, me catre tro fë kowe la itre atr la ewekë ka sisitria catr kowe la mele së.—Rom. 10:10.