Loi e Troa Wanga Atrune La Itre Xaa Atr—Hnene La Troa Ithanata Qëmekë Ka Menyik
1 Ame la easa cainöje ngöne itre hnalapa trootro, easa pane goeëne la itre atr qëmeken tro sa nyiqaane ithanata koi angatr. Ngöne hi la hnepe ijine cili, ijije hi tro sa atrepengöne la mekuna i angatr göi së, memine la pengö i angatr ngöne la ijine cili, jëne la iqëmeke i angatr. Ketre mina fe, atreine hi tro angatr a ketre waipengö së. Hna qaja hnene la ketre föe ngöne la kola traqa wai eahlo hnene la ketre Temoë ka hape: “Ame la ewekë ka mama hnyawa koi ni ngöne la qëmeke ka hnyimahnyima i angeic, ene la tingeting. Celë hi matre eni a pi atrepengöi angeic.” Celë hi ewekë lai ka upe la föe troa drenge la maca ka loi.
2 Maine tro sa atreine ithanata qëmekë memine la itre atr, celë hi jëne ka maca matre troa cainöje e cahu gojeny, maine ngöne la itre götrane gaa tru atr. Hna goeëne hnene la ketre trejine trahmanyi la lue meke ne la itre ka traqa koi angeic. Hna pane qëmeke ka menyik hnei angeic koi angatr, me hnyima, thupene lai angeice a hamëne jë la itre zonal. Jëne la aqane kuca celë, lolo catre la itre mekune hna ce ithanatane memine la itre atr, nge nyimutre la itre itus hnei angeice hna hamën.
3 Loi e Troa Tupathe Troa Atrehmekune La Aliene La Hni Ne La Itre Atr: Maine tro pala hi sa goeëne hnyawa la itre atr hne së hna ithanata kow, tro lai a xatua së troa atrehmekune la aliene la hni ne la itre atr. Hanawange la ketre ceitun, maine thaa nyipi trotrohnine kö la ketre atr la hne së hna qaja, maine thaa kapa pena kö angeic, tre, canga mama hi ngöne la qëmeke i angeic. Maine ka hetre jolen, maine kola ajan thaa tro kö a aqean, ketre öhne hi së. Haawe, loi e tro sa saze la aqane tro fë së la maca ka loi maine troa ahopatren ej. Ketre jëne ka lolo catr troa wanga atrunyi angatr, la troa trotrohnine la aliene hni angatr.
4 Hni Ka Nyipici Nge Pëkö Luelue The Së: Ngöne la itre qene hlapa ka nyimutre, hna mekune laka ka hni ka nyipici la atr ka ithanata qëmekë me ketre. Hanawange la aqane sa i Iesu la kola hnyinge hnene la itretre drei nyidrë ka hape: “Drei la ateine troa mel?” Kola qaja hnei Tusi Hmitrötr ka hape: “Iesu a xajawa angat, me ulatin, ka hape, Tha ’teine kö lai hnei ate ; ngo ateine Akötesie la nöjei ewekë asë.” (Mat. 19:25, 26) Nyipici laka, kola mama hnyawa ngöne la iqëmeke i Iesu laka ka xecie hnyawa e kuhu hni nyidrë la mekune celë. Ketre tune mina fe, maine tro sa goeëne hnyawa la atr hne së hna ithanata kow, tro ha xatua së troa tro fë la maca ne Baselaia cememine la hni ka nyipici, nge pëkö luelue the së.—2 Kor. 2:17; 1 Thes. 1:5.