Ketre Ini Ka Xatua Së Troa Trongëne Hnyawa La Hna Inin
1 Ame ngöne la easa ce wange hnyawa la itre mekun hna hamën ngöne la Porogaram Ne Ini Ne Cainöj Qaathei Akötresie göi 2006, tre, easa thele troa kepe thangane la itre ini qa hnine la Tusi Hmitrötr, ngöne la easa xome itre ej thatraqane la huliwa së ka hmitrötr, me trongëne itre ej ngöne la nöjei drai. Loi e tro sa thele troa trongëne la itre hne së hna inin.—Ioane 13:17; Fil. 4:9.
2 Loi e Troa Hamë Mekun: Ngöne la porogaram thatraqane la macatre celë, caa menetr hna nue kowe la itre ka ajan troa qeje mekun ngöne la e Tusi Hmitrötr ne la wiik. Kolo lai a hape, tro pe hi a xome la faifi lao menetr hnene la trejine trahmany, ngöne la angeic a hamën la itre mekun göne la e Tusi Hmitrötr ne la wiik. Ame koi itre ka hamë mekun qa ngöne la itre göhnë i angatr, loi e troa wange hnyawa la traem hna nue koi angatr. Troa 30 secondes la etrune la traem hna xom matre troa ithuemacany. Kösë ijije hi troa hamë mekun hnene la treen lao trejin.
3 Itre Cainöj Nyine Ini Së: Ngöne la lue hnëqa, ene la itre mekun ka sisitria qa ngöne la itre meken la Tusi Hmitrötr, me hnëqa naba 1, loi e troa ithanatan la itre mekun nyine troa trongën ngöne la hna cainöje trootro me ngöne la itre xaa götran ne la mele së. Thaa tro hmekuje kö la ka cile fë cainöj a aciane la aja troa trongën la itre mekun thene la itre ka drei angeic. Loi pe troa qaja hnyawa la nyine troa kuca, me amamane la aqane troa eatrën. Nge tro fe a qaja la itre manathith hna kapa qa ngöne lai. Maine jë troa qaja ka hape, “Celë hi aqane eatrongë së hnene la xötre celë,” maine “Celë hi aqane tro sa xome la itre xötre celë ngöne la hna cainöje trootro.” Loi e troa wanga atrune hnyawa hnene la itre qatre thup me itre drikona la itre ewekë ka traqa ngöne la nöj, matre troa thele la aqane troa trongën la itre mekune ngöne la kola hamë cainöj.
4 Ka lolo catre troa xome la itre hna melën qa hnine la Tusi Hmitrötr matre troa xomi ini qa ngöne itre ej. Thupene la hna ce wange la ketre ceitun qa hnine la Tusi Hmitrötr, maine jë troa qaja hnene la ka cile fë cainöj ka hape, “Atreine fe hi tro epuni a hane ujë tune la.” Loi e troa xecie hnyawa koi angeic laka, ame la itre ini hna xome qa ngöne la ceitun hnine la Tusi Hmitrötr, tre, ka ihmeku memine la itre xötr ka lapa qëmeken me e thupen. Loi e troa ihmeku fe memine asë hi la Tusi Hmitrötr, nge memine fe la itre mekun hna hamën hnene la “hlue ka nyipici me ka inamacan.”—Mat. 24:45.
5 Ame la troa atreine trongëne la atrehmekun me trotrohnine eje hnyawa, tre, celë hi la inamacane lai. “Ka sisitia la inamacan.” (Ite edomë 4:7) Ame ngöne la easa catre melën la inamacan jëne la itre hne së hna inin ngöne la Ini Ne Cainöj Qaathei Akötresie, loi e tro fe sa akökötrene la atreine së troa ce thawa ej memine la itre xan.