Ka Macaje Kö La Nekö i Epun Troa Hane Axecië Mekun?
1. Nemene la hna amaman hnene la itre thöth Temoë göi madra? Hamëne jë la ketre ceitun.
1 Nemene Mekun? Mekune göi hamën me xomi madra. Tune la hna qaja ngöne la taan la ketre hna cinyihan ngöne la zonal La Tour de Garde ne 15 Juun 1991, hna hape, “Mele Jë Thenge La Itre Ini i Iehova,” hetrenyi la itre neköne la Itretre Anyipici Iehova ka hane hë amamane hnyawa laka ka macaje nyudren ngöne la aqane axecië mekune i nyudren. Nge kola mama e cili laka nyipi ewekë catr koi angatr tune koi itre keme me thine i angatr troa drengethenge la wathebo i Akötresie göi madra. Nge tune kaa fe la nekö i epuni ka co?
2. Nemene la ketre hna amekötine hnei mus hna trongën hnene la ketre hna kootr kowe la ketre nekönatr ka xelen troa xomi madra, nge nemene la ini hna kapa qa ngön hnene la itre kem me thin Keresiano me itre nekö i angatr ka co?
2 Nemene La Hna Qaja Hnei Mus? Ame e Etazini, tre, hna hnen ngöne la götrane e Illinois la hna kootr ka tru catr, thatraqane la itre nekönatr ka macaje troa ketre sipu xele ma xomi madra. Hna pane wang la pengöne la ketre jajiny temoë ka 17 lao macatre, hna amekötine ka hape: “Maine mama hnyawa hi, nge thaa luelue kö së laka ka macaje hnyawa la nekönatr, nge trotrohnine hnyawa hi angeic la itre thangan elanyi la itre huliwa i angeic, nge atreine fe hi angeic ketre mekun tune la itre ka tru, haawe, kola aijijën hnene la musi göi nekönatr ka macaj troa kapa maine troa xelene la ketre aqane troa inyië angatr.” Hetrenyi la itre xaa nöj ka xome la aqane mekune celë. Ame ngöne la nöje së, thaa mama hnyawa petre kö la hna amekötine göne la nekönatr ka macaj; ngo “loi e troa thele maine ijije hi tro nyën a hane qaja la aja i nyën me hane sine la ithanata ne la itre ka axecië mekun.” Haawe, maine mama hnyawa hi laka macaje la nekönatr troa ketre axecië mekun, loi e tro la itre droketre maine itre ka musi a ithanata memine la ka wezipo matre troa drei angeic e qaja amamane la sipu aja i angeic; ene la troa thipetrije la xomi madra. Nyipi ewekë kowe la thöth troa trotrohnine hnyawa la engazone la meci angeic memine la itre thangane la itre drösinöe hnei angeic hna troa xom; nge loi e tro fe angeic a qaja mekötine hnyawa la sipu hnei angeic hna mejiune kow ngöne la wathebo i Akötresie göi madra.
3. Nemene la itre hnying nyine troa wanga atrune hnyawa hnene la itre keme me thin, nge pine nemen?
3 Nemene La Hna Troa Qaja Hnene La Nekönatr? Hane kö nyipunieti hnëkëne hnyawa la itre nekö i nyipunie ka co troa qaja amamane la mekuna i angatr göi madra? Eje kö e kuhu hni angatr la mejiune ka catr laka, celë ketre hna amekötine lai hnei Akötresie, ene la troa ‘thipetrije la madra’? (Ite hu. 15:29; 21:25) Atreine kö angatr troa qejepengöne la ini hnei angatre hna lapaune kow qa hnine la Tusi Hmitrötr? Ngacama paatre kö la itre keme me thine i angatr, tro kö angatr a amamane la aja ka eje e kuhu hni angatr göi troa thipetrije la madra, ngacama troa mekune hnene la itre droketre ka hape madra pe hi la ka ijij? Pine laka, “ame la ijine memine la ewekë ka xulu, te, kola traqa koi [së] asë,” haawe, tune kaa la aqane tro nyipunie a hnëkëne la itre nekö i epun matre tro angatr a atreine cile elanyi e tupathe ju la lapaune i angatr?—Ate Cai. 9:11; Efe. 6:4.
4, 5. (a) Nemene la hnëqa ne la itre keme me thin, nge nemene la aqane tro angatr a xome ej? (b) Nemene la itre hna hnëkëne ka troa xatuane la itre keme me thin?
4 Itre Keme Me Thin, Nemene La Nyine Tro Epuni a Kuca? Hnëqa i nyipunieti la troa inine la itre nekö i epun la mekuna i Iehova göi madra. (2 Tim. 3:14, 15) Hna qejepengöne hnyawa lai hnine la itus Comment raisonner g. 359-62. Pane ce goeëne hnyawa ju memine la fami i epun. Xome jë la mekune hna hape “Maine Ketre Atr a Qaja Ka Hape—” ngöne götrane 362-4, ce amacane jë memine la itre nekö i epun matre troa xatua angatr troa atreine qejepengöne la itre hnei angatr hna mejiune kow memine fe la kepin. (1 Pet. 3:15) Hetrenyi la itre xaa nyine troa xatua së göi madra. Itre xan e hnine la boroshür, Comment le sang peut-il vous sauver la vie ? me zonal La Tour de Garde ne 15 Juun 2004, götrane 14-24. Ketre, hetrenyi fe lo video hna hape, Soigner sans transfusion : besoins et droits du patient ; hetrenyi fe la DVD hna hape, Des alternatives à la transfusion — Documentaire ; kola hamën la itre ithuemacanyi ka loi ngöne la eloine la troa nyinyine la itre mec maine troa ixöji pena ngo thaa tro pe a hamë madra. Hnene kö la lapa i epun hna hane goeën me ithanatan la itre video cili?
5 Xatuane jë la itre nekö i epuni troa ‘isa tupathe la aja i Akötesie ka loi, me nyine amadin, me ka meköt’ göi madra. Tro ha macaje la aqane axeciëne angatr la ketre mekun me amanathithin ej hnei Iehova.—Rom. 12:2.