Ini Ka Ee Së Kowe La Mel
1 Drei kö la eloine la easa öhne la kola madrine la itre atr, ngöne la angatr a hane trotrohnine la nyipici qa hnine la Wesi Ula i Akötresie! Nyipi madrin e troa ithawakeune memine la itre xan la atrehmekune i Akötresie memine la aja i Nyidrë kowe la itre atr. Ketre ini lai ka troa eatrongëne la ketre atr kowe la mele ka thaa ase palua kö.—Ioane 17:3.
2 Pine Nemen Matre Ka Sisitria La Ini Cili: Nyimu aqane tro sa kapa la ini enehila, nge ketre nyimu mekune catr hna ithanatan. (Ate Cai. 12:12) Ngo thatreine kö troa aceitunën lai atrehmekune cili memine la etrune la “ite huliwa ka mene i Akötesie.” (Ite hu. 2:11) Hapeu, kolo kö a hane aijijën hnene la ini i fen troa aeasenyine la itre atr kowe la Atre Ixup me troa atrepengöne la aja i Nyidrë? Eje kö a xatuane la itre atr troa trotrohnine la pengö së ngöne la easë a mec, maine la kepine matre tru catre hnei akötr? Eje kö a hane hamë mejiun kowe la itre atr? Eje kö a ixatua matre troa tro loi la mele ne la itre fami? Ohea. Ame hmekuje hi la ka ijij troa eatrongën la mele së, tre, ini qaathei Akötresie.
3 Kola hamën hnene la ini qaathei Akötresie la ketre ewekë ka ae trootro ngöne la fene enehila, ene lo itre hna amekötin matre troa kökötre la itre atr ngöne la thiina ka loi. Wesi Ula i Akötresie a xome trije la iwangatrehmekunyi atr, me isi pi tribu, me isi pi nöj qa hnine la hni ne la itre atr ka kapa me trongëne la itre ini i Nyidrë. (Heb. 4:12) Ej a upe la itre atr troa trije la nöjei aqane iakötrë me ‘xetrë angatre kö hnene la atr ka hnyipixe.’ (Kol. 3:9-11; Mika 4:1-3) Ketre, hna hamën hnene la ini cili la trenge catr kowe la itre atr ka nyimutre, matre tro angatr a thipetrij la itre hna majemine kuca me itre thiina hna xelene hnei Akötresie.—1 Kor. 6:9-11.
4 Nyipi Ewekë Catr Enehila Troa Canga Loolo: Kola hmekë së hnene la Atre Ini ka tru me qaja koi së la aliene la itre ijin hne së hna melën enehila. Ej e hnine la hna perofetan la ketre ithuemacanyi nyine troa qaja trongën enehila e cailo fen. (Hna ama. 14:6, 7) Kola musi enehila hnei Keriso e koho hnengödrai, easenyi hë matre apaatrene pi la hmi ka thoi, nge calemi hë la ijine matre apaatrene pi fe la itre musi ne fen asë hnene la Baselaia i Akötresie. (Dan. 2:44; Hna ama. 11:15; 17:16) Haawe, nyipi ewekë catr tro la itre atr a hane atre laka musi hë la Joxu i Akötresie, nge loi e tro angatr a canga lö pi qa hnine la Babulona atraqatr, me hane xome me lapaune kowe la ëje i Iehova. (Sal. 2:11, 12; Rom. 10:13; Hna ama. 18:4) Epi tro asë hi së a catre thel thenge la ka ijije koi së, troa hane ce thawa memine la itre xan la ini ka troa eatrongë së kowe la mel.