Easenyi Hë La Drai i Iehova
1 Kola ajan hnene la itre Keresiano troa traqa la drai i Iehova, ijine Nyidrëti a troa apaatren la fene hnengödrai ka ngazo me eatrongë së kowe la fene ka hnyipixe ka meköt. (2 Pet. 3:12, 13, ith. e cahu fen) Pine laka thatre hnyawa kö së la ijine troa traqa la drai i Iehova, nyipi ewekë tro sa lapa hmek me xatuane la itre xaa atr troa hane tu së. (Ezek. 33:7-9; Mat. 24:42-44) Tro hë la aqane mekune thele së la Wesi Ula hna perofetan hnei Akötresie, a acatren la mejiune së laka “easenyi hë la drai ka tru i Iehova.”—Zef. 1:14.
2 Aqane Tro Wengë La Itre Mus Ne La Fen: Tune la hna cinyihan ngöne Hna Amamane 17:9-11, Ioane a qaja la “luengemene (seven) la ite joxu,” kola nyihatren lo sevene lao musi ka tro wengë e celë fen. Ioane mina fe a qaja la “hnaaköningemenëne (hnaaeitrene)” joxu, kola nyihatren enehila la ONU (Organisation des Nations unies). Hapeu, tro pala kö a hetrenyi la itre xaa musi thupene lai? Ohea, hna perofetan ka hape, ame lai hna eitrene joxu, tre, “kola tro kowe la hnëjin,” nge thupene lai, pë hmaca kö qeje joxu qaa la fen. Hapeu, thaa kolo kö lai a xatua së hnene la hna perofetane cili troa trotrohnine la pengöne hneijine hne së hna melën enehila?
3 Kola xatua së ngöne Daniela 2:31-45 troa trotrohnine laka easenyi hë la drai i Iehova. Ame ngöne la hna perofetane celë, kola mama la ketre hnasaatr ka atraqatre catr hna meköle goeën hnei Nebukaneza, nyidrëti a puje la kola tro wengë la itre musi e celë fen. Isa mama ha lai itre musi cili. Drei la musi ka cile enehila ngöne la hneijine së? Eje e ngöne la hneijine hna nyihatren hnene la lue ca ne la hnasaatr. Kola perofetane hnyawa me qejepengöne la ewekë ka troa traqa pe e thupen. Tro ha apaatrene epine palua la musi ne la atr, me nyi jëne la “kete baselaia ka tha tro kö a apaten’ epine palua.” Tune kaa, thaa hatrene kö lai laka, easenyi hë la drai i Iehova?
4 Nyine Jelenyipicine Hnyawa: Easë a öhne hnyawa la enyipicine laka, easenyi catre hë la drai i Iehova. Easë a öhne la aqane eatre lo hna ahnithe hë hnei Paulo, göne la itre aqane ujë ne la itre atr “ngöne la ite drai hnapin.” (2 Tim. 3:1-5) Nge easa xome la huliwa ne cainöj nyine troa tro fë e cailo fen qëmekene troa traqa la pun. (Mat. 24:14) Epi tro pala hi la huliwa ne cainöje së a amamane hnyawa la hna qaja nyimenyimën hnene la itre angela, kola hape: “Qouju e Akötesie, me hamë nyidëti la atrun, ke traqa ha la ijine hnyingëne hnei nyidë.”—Hna ama. 14:6, 7.