Itre Thöth, e Jë La Tusi Hmitrötr!
1 Ame la kola thöthi la atr, tre kola traqa koi angeic la itre jol, nge angeic a troa hane axeciën me xome la itre mekun ka nyipi ewekë kowe la mele i angeic. Nyimutre thei epun itre thöth, la itre ka cile ngöne la nöjei drai kowe la itre itupath; kola thele tro epuni a ena la itre wathebo i Akötresie göi thiina. Qëmekene tro epuni a axeciën la itre mekune göi ini, me huliwa, me faipoipo, loi e tro pala hi epuni a canga amë panën la itre aja ngöne la götrane la ua. Aqane tro hi epuni lai a axeciëne la itre xaa mekun, ka hamë manathith kowe pë hë la mele i epun. Maine tro epuni a eköthe amë hnyawa la itre aja ngöne la götrane la ua, haawe, tro ha xatua epuni troa inamacan la aqane troa huliwa, nge troa tro loi la itre jë i epun. Maine tro epuni a e pala hi me thele mekune hnine la Wesi Ula i Akötresie, haawe, tro ha upi epuni troa mele thenge la itre eamo ne la Tusi Hmitrötr, nge troa hetre thangane ka loi la aqane catre huliwa i epun.—Ios. 1:8; Sal. 1:2, 3.
2 Tune Kaa La Aqane Tro Epuni a Kepe Thangane Ka Loi Qa Ngön? Ka tiqa la fene i Satana hnene la itre aqane troa iamenu matre troa uku së troa kuca la ngazo. (1 Ioane 2:15, 16) Maine jë atre hi epuni la itre xaa ka ce ini me epun maine itre xaa ka ce macatre me epun, ka xeni pune la itre ngazo hnei angatre hna kei kow. Maine tro epuni a trongëne hnyawa la itre eamo qa hnine la Tusi Hmitrötr, haawe tro ha eje thei epuni la trenge catr ngöne la götrane la ua, memine la hni ne ajan troa thipetrije la itre thiina ka ngazo. Ketre, ijije fe tro la eamo qa hnine la Wesi Ula i Akötresie a xatua epuni troa neëne la itre nyinyithiina i Satana, memine la itre hnö i angeic. (2 Kor. 2:11; Heb. 5:14) Maine tro epuni a xötrethenge la itre jë i Akötresie, haawe, tro ha eje thei epuni la nyipi manathith, ene la ketre sipu madrin ngöne la aqane mele i epun.—Sal. 119:1, 9, 11.
3 Kola sasaith la inamacane i atr hnene la itre trepene meköti ka cile hut e hnine la Wesi Ula i Akötresie. (Sal. 119:98-100) Maine tro epuni a atrepengöne hnyawa la itre trepene meköti ne la Tusi Hmitrötr, me thele ewekë ngöne la itre hnei Iehova hna ajan ka mama ha, me thithi pala hi hnene la hni ka nyipici, haawe, tro ha xatua epuni troa eköthe hnyawa la aqane imelekeu i epun memine la Atrekë Ewekën la Tusi Hmitrötr, ene Iehova Akötresie. Nyidrëti a thingehnaeane ka hape: “Tro ni a ini ‘ö me köjane koi ‘ö la jëne qâ i’ ö troa trongën; tro ni a haji’ ö me alamekë eö.”—Sal. 32:8.
4 Ami Ijine Ju Troa e Ej: Hnene la ketre thöth Keresiano hna thele troa e asë la Tusi Hmitrötr, nge hnei angeic hna afenesine ngöne la caa macatre. Nemene hë la thangane lai koi angeic? Angeic a mekune hmaca ka hape: “Hnenge hna atrepengöi Iehova hnyawa, nge itre ewekë lai ka aeasenyi ni catr koi Nyidrë, nge kola upi ni troa xoue Nyidrëti ngöne la meleng ka pexej.” (Iako. 4:8) Hane kö epuni e asë la Tusi Hmitrötr? Maine thaa ase pala kö epuni hane e asë la Tusi Hmitrötr, haawe, tune kaa matre hane thele fe hnei epuni troa aejëne la mekune cili? Tro kö Iehova a amanathithine la aqane catre huliwa i epun, nge tro hë epuni a menuën la itre manathithi ka tru.