Loi e Tro Sa Hamëne Koi Iehova La Hne Së Hna Atrein
1 Ame la Trenge Wathebo hna hamëne koi Isaraela tre, eje a upi angatr troa tro fë me hujëne koi Iehova la itre öni ka “pë ethan.” Thaa hna kapa kö la öni ka wezipo maine ka eatr. (Lev. 22:18-20; Mal. 1:6-9) Ketre, ame ngöne la kola hujën la ketre öni, ame la götran ne lai öni ka sisitria hune la itre xaa götrane ne ej, tre thatraqai Iehova. (Lev. 3:14-16) Pine laka Iehova la Keme i Isaraela me Tixe i angatr, haawe, thatraqai Nyidrëti kö la ewekë ka sisitria.
2 Tune lo itre drai ekö, Akötresieti fe enehila a wangatrune hnyawa la enyipiewekën la itre ewekë hne së hna hamëne koi Nyidrë. Kola troa ketre amamane hnene la huliwa së laka, easë a thili koi Iehova. Eje hi isa pengöne kö la isa mele ne la itre atr. Haawe, hetre nyipi kepin matre loi e tro sa isa wai së kö matre troa xecie hnyawa laka, easë a hamëne la hne së hna atrein koi Nyidrë.—Efe. 5:10.
3 Troa Huliwa Cememine La Hni Ka Pexej: Maine easë a ajan troa atrunyi Iehova hnene la huliwa ne cainöje së me troa ketr la hni ne la itre atr ka drei së, haawe, thaa tro pi kö sa xome la huliwa ne cainöj tune la ketre ewekë hna majemine troa kuca, ngo loi e troa kuca pala hi la aja i Akötresie hnene la hni ka ajan. Loi e troa elitrauj la hni ne ole së koi Akötresie me kowe la itre aja i Nyidrë. (Sal. 145:7) Kolo lai a amamane hnyawa la enyipiewekën la troa hetrenyi la ketre porogarame së isa ala caas göi troa e me inine la Tusi Hmitrötr.—Ite edomë 15:28.
4 Ame la troa hamë Iehova la ka sisitria ngöne la mele së, tre kolo mina fe a qaja la troa xötrethenge la ihnimi Nyidrë kowe la itre atr. (Efe. 5:1, 2) Loi e tro la ihnimi së kowe la itre atr a upi së troa tupath troa ketr jëne la maca ne iamele, la itre atr ka ala nyimu catr. (Mar. 6:34) Kola upi së troa amamane ka hape easë a nyipine la itre atr hne së hna ithanata memin. Ej a xatua së troa lapa meku angatr thupene la hna xötrei ithanata me angatr, ene pe troa thele troa canga bëeke hmaca troa iwai. Ej a upi së troa kuca asë la hne së hna atrein troa xatua angatr troa kökötre ngöne la götrane la ua.—Ite hu. 20:24; 26:28, 29.
5 “Ketre Huj Ne Atruny”: Ame la ketre aqane tro sa hamëne koi Iehova la ka sisitria ngöne la mele së, tre ene la troa catre xome la huliwa ne cainöj. Maine tro sa hnëkë hnyawa me wangatrune hnyawa la huliwa ne cainöje së, ijije hi tro sa kuca la hne së hna atrein ngöne la traem ka eje the së. (1 Tim. 4:10) Maine tro sa hnëkë hnyawa fe, tro ha hmaloi troa trotrohni së hnene la itre atr nge thaa tro kö sa luelue troa qaja la itre mekune së; haawe, maine jë tro hi a canga drei së hnyawa hnene la itre atr. (Ite edomë 16:21) Ame ngöne la easë a ce thawa memine la itre xaa atr la maca ka loi, atreine hi troa hëne la itre hne së hna qaja qa kuhu hni së ka hape “huje ne atrunyi Akötesie.”—Heb. 13:15.