Atreine Hi Tro Sa Kuca La Hnei Iehova Hna Thele The Së
1. Nemene la itre xaa mekune ka troa traqa koi së ngöne la itre xaa ijin nyine tro sa cile kow, nge pine nemen?
1 Ame la aqane mele ka sisitria enehila, tre, ene la troa drengethenge la itre wathebo me itre trepene meköti Iehova; nge ketre aqane mele lai ka xatua së troa eköth la ketre trepene ka lolo thatraqane la mele së elany. (Sal. 19:7-11; 1 Tim. 6:19) Ngo ame la ejolen enehila, tre kola akötrë së hnene la fene i Satana gaa tru akötr. Kola jole catre mina fe, pine laka itre atr ka ngazo së. Ame ngöne la easë a thele troa eatrën ngöne la itre xaa ijin la itre hnëqa së hna ahnithe hnei Tusi Hmitrötr, maine jë kösë kola kei tranyi së hnene la itre jol ke tru pala ha la itre nyine troa kuca. (Sal. 40:12; 55:1-8) Easë a pane thele ka hape, ijije jë kö tro sa kuca asë la itre hnei Iehova hna thele the së. Ame ngöne la itre ijine kola traqa koi së la itre jole cili, nemene la ka troa xatua së troa atreine waiewekë pala hi ngöne la götrane la ua?
2. Nemene la aqane trotrohni së hnei Iehova ngöne la Nyidrëti a thele the së la itre nyine troa kuca?
2 Thaa Ka Hace Menu Kö La Itre Hna Amekötin Hnei Iehova: Thatreine kö tro Iehova a thele the së la itre ewekë hne së hna thatreine troa kuca. Thaa ka hace menu kö la itre hna amekötine hnei Iehova, ngo nyine loi koi së itre ej. (Deu. 10:12, 13; 1 Ioane 5:3) Nyidrëti a atrehmekune laka itre atr ka kucakuca së, me “mekune laka so ne hnadro shë.” (Sal. 103:13, 14) Hnene la ihnimi ipitö i Akötresie matre Nyidrëti a kapa la itre trenge catre ka tru hne së hna kuca matre troa nyihlue i Nyidrë, ngacama hna nyi ifegone ju hë itre eje hnene la itre ewekë hne së hna melën. (Lev. 5:7, 11; Mar. 14:8) Nyidrëti a hë së troa nue koi Nyidrë la ehnefe së, nge kola qaja xeciëne koi së hnei Nyidrëti laka, tro Nyidrëti a aijijë së troa catre mele nyipici pala hi koi Nyidrë.—Sal. 55:22; 1 Kor. 10:13.
3. Tune kaa la aqane acatren hnei Iehova la mele së matre tro sa atreine xomihni ahoeany?
3 Nyipi Ewekë Troa Xomihni Ahoeany: Kola amamane hnyawa hnene la catre nyihlue i Akötresie hnei Elia, me Ieremia me Paulo, laka nyipi ewekë catr troa xomihni ahoeany. (Heb. 10:36) Hnei Iehova hna xatua angatr ngöne la itre drai ne akötr me ijine kucakuca. (1 Ite jo. 19:14-18; Iere. 20:7-11; 2 Kor. 1:8-11) Nge ketre, hna xatua së mina fe hnene la ihnimi nyipici ne la itre trejine ngöne la itre hneijine së. (1 Pet. 5:9) Maine tro sa lapa mekune hnyawa la itre tulu cili, ijije hi troa xatua së matre thaa tro kö së a nanazij.
4. Pine nemen matre nyipi ewekë troa lapa mekune hnyawa pala hi la itre hna thingehnaean hnei Akötresie?
4 Ame la mejiune së kowe la itre hna thingehnaean hnei Akötresie, tre hna aceitunëne ej memine la “iuhni ne la u.” (Heb. 6:19) Hnene la mejiune cili hna upi Aberahama me Sara troa kapa la sipo i Iehova troa tro qa ngöne la hnalapa i nyidro, nge troa ‘mele trehnyiwa ngöne la nöje hna thingehnaean.’ Hnene mina fe la mejiune cili hna acatren la lapaune i Mose, matre thaa tro kö angeic a xou troa cilaxome hnyawa la nyipi hmi. Hna xatua Iesu fe hnene la mejiune cili troa xomihnine la meci hune la sinöe. (Heb. 11:8-10, 13, 24-26; 12:2, 3) Maine troa mel e kuhu itre hni së la hna thingehnaean hnei Akötresie göi fene ka hnyipixe nge ka meköt, ketre tro mina fe hë a hane cile catr hne së, thaa tro kö a kötrekötr la lapaune së.—2 Pet. 3:11-13.
5. Pine nemen matre nyine ithuecatr la troa mekune hnyawa lo itre aqane isa huliwa nyipici së ekö koi Iehova?
5 Maine tro sa mekune hmaca lo itre aqane huliwa nyipici së koi Akötresie, memine la aqane hujëne së la mele së, me aqane catre nyihluei Nyidrëti hne së, haawe, tro ha hamë trenge catr koi së troa kuca la huliwa ne cainöj. (Heb. 10:32-34) Kolo mina fe a amekunë së la madrin hne së hna kapa, ngöne la easë a kuca la hnei Iehova hna thele the së—ene la tro sa nue apexejen la mele së koi Nyidrë.—Mat. 22:37.