Loi e Hetre Hni Ne Ole Së Kowe La Ihnimi Ipitö i Akötresie
1 Qëmekene troa hane Keresiano hnei Paulo aposetolo, ka icilekeu catre angeic ekö troa kökötre la hmi i Keresiano. Ngo Hna hnimi ipitö angeic hnei Akötresie, qa ngöne laka thatre kö angeic la hnei angeic hna kuca. Kola mama la ihnimi gufa i Iehova, ngöne laka hna hamëne koi Paulo la ketre hnëqa, ene la troa cainöj. Hnei nyidrëti hna wangatrune catrën la huliwa cili. (Ite hu. 26:9-18; 1 Tim. 1:12-14) Atraqatr la hni ne ole i Paulo kowe la aqane hnimi ipitö angeic hnei Iehova, celë hi matre hnei angeic hna nue la mele i angeic troa kuca asë la hnei angeic hna atrein troa cainöj.—2 Kor. 12:15.
2 Hnei Akötresieti mina fe hna hane amamane la ihnimi ipitö i Nyidrëti koi së, ngöne laka hnei Nyidrëti fe hna hane hamë së la huliwa ne cainöj. (2 Kor. 4:1) Atreine fe tro së a hane tui Paulo, me amamane la etrun la ole së kowe la ihnimi ipitö i Nyidrëti koi së, hnene la hne së hna catre hane xatuan la itre xaa atr troa kökötr ngöne la götrane la ua. Ame la ketre aqane tro sa amaman la ole së, tre, ene la troa nyiqaane inin la Tusi Hmitrötr memine la itre atr, me xomiujine hnyawa la itre etid.
3 Loi e Troa Nyiqaane Etid Memine La Itre Atr: Ame la ketre aqane troa nyiqaane etid memine la itre atr, tre ene la troa kuca la itre gojenyi ne zonal, ene la troa hamëne lapaan la itre zonal. Qa ngöne laka easë pala hi a ithanata memine lai atr ngöne la easë a tro fë lapaan la itre zonale koi angeic, easë mina fe a atre hnyawa la itre aja ka eje thei angeic. Maine jë tro hi la ketre hna cinyihane hnine la zonal a nyi gojenyi së troa nyiqaane etid me angeic jëne la boroshür Thele. Ame pala pë hë la kola iwai hmaca troa hamën la itre zonal, maine ijije hi troa sisedrën lo lai etid memine lai atr ngöne la boroshüre Thele.
4 Nyipi Ewekë Troa Catre Huliwa Me Thith: Maine tro sa catre huliwa nge easë fe a thithi pala hi, eje hi lai laka tro ha tro loi hnyawa la huliwa ne cainöje së. Hnene la ketre trejine föe ka pionie nge ka xomiujine la caa etid, hna sipon koi Iehova jëne la thith, troa amanathithi nyiidro me hamën la nyimu etid. Hnei nyiidro hna huliwa thenge la itre thithi nyiidro. Hnei eahlo hna mekune hnyawa la huliwa ne cainöje i eahlo, nge hnei eahlo hna wangatrehmekune laka thaa hnei eahlo kö hna lapaa hane sipone troa etid kowe la itre atr hnei eahlo hna wange hmaca. Haawe, hnei eahlo hna nyiqaane trongëne lai, matre hetre thangane ka loi, ke lue etidi hë hna nyiqaan.
5 Drei la eloine la tro sa catre tro fë kowe la itre atr la “maca ka loi ne la ihnimi gufa i Akötesie”! (Ite hu. 20:24) Epi tro la hni ne ole së kowe la ihnimi ipitö i Akötresie, a upi së troa catre xatuane hnyawa la itre xaa atr troa kapa la itre manathith qa ngöne la ihnimi gufa i Akötresie.