Sinatr—Ngo Ame Pe Ka Wa Wene Pala Hi
1 Maine ka anyipici Iehova fe epun nge hetre meci epun maine sinatr pena, ngo ijiji epuni pala hi troa hane wawene ngöne la huliwa ne cainöj. Eje hi laka, troa ketre pengöne kö la itre aqane tro epuni a xome la itre ijine ka ijije koi epun troa cainöj me troa ithuecatr kowe la itre xan.
2 Itre Ijine Troa Cainöj: Nyimutre la itre trejine ka wezipo maine sinatr pena, angatr a hane catre thele troa hane xome la huliwa ne cainöj. Hanawang la ketre ceitun, hetrenyi la ketre trejine föe hna xöje matre thatreine hë nyiidro tro me ithanata; ngo hnei nyiidro hna öhne laka, ijije hi troa amaman la itre zonal ke hna acile la loto hnene la föi nyiidro ezine la götrane la gojeny, hna xötrëne hnyawa hnene la itre atr ka tro. Ame ngöne la ketre ijin, hnei eahlo hna hamën la 80 lao zonal ngöne hi la lue hawa! Kolo mina fe a aijijë së hnene la aqane mele cili troa hane ithanata memine la itre atr ka jol e troa ketr ngöne la hna cainöje trootro, ka tune lo itre ka huliwa hnine la pital me itre ka wezipo. Maine eje hi, tre wange ju matre itre nyine tro pala pë hë së a hane cainöje kow.
3 Atreine hi troa hetre thangane ka loi catr la hnei epuni hna cainöj! Maine jë troa hule la itre atr troa dreng la maca ne Baselaia, qa ngöne laka, angatr a öhne la aqane catre huliwa i epun, memine fe la elolon la itre thangan la Tusi Hmitrötr ngöne la mele i epun. Ketre, ame ngöne la epuni a iöhnyi memine la itre atr ka hleuhleu pine laka hna akötrë angatr, atreine hi tro epuni a hamëne koi angatr la itre ithuecatr ka ijij qa hnine la Wesi Ula i Akötresie, ngöne laka, epuni a melëne mina fe la itre akötr.—2 Kor. 1:4.
4 Ithuecatre Jë Kowe La Itre Xan: Hapeue hna hane kö xatua epuni hnene lo ewekë ka traqa koi Lorel Nisbet, ketre föe ka mano pë hë hnei masin a 37 lao macatre, ngo hnei eahlo hna xatuane fe la 17 lao atr matre troa kapa la atrehmekune qa hnine la Tusi Hmitrötr? Ketre tune mina fe la tulu i nyipunie, laka, troa xatuan la itre trejin ka lapaun troa hane catre kuca la huliwa i Akötresie.—g93 22/1 g. 18-21.
5 Ngacama kola sewe epuni hnene la itre jole ka eje thei epun troa hane cainöje trootro tune la hnei epuni hna ajan, ngo atreine fe hi tro epuni a hane acatren la lapaune ne la itre xan. Hna qaja hnene la ketre trejine trahmany ka hape: “Eni a trotrohnine hnyawa laka ngacama ka wezipo catre la ketre atr ngo atreine tro angeic a hane xatuan la ketre. Ame kowe la itre atren la ekalesia, tre, ame eni memine la föeng, ceitui nyiho me ketre iuhni koi angatr. Hnene laka jole catr la mele i nyiho, thaa paatre kö nyiho qaa la, matre nyiho pala hi a hane dreng la itre akötre i angatr.” Ngo pine laka, jole catr la mele i epun, haawe, thatreine kö ngöne la itre xaa ijin troa huliwa thenge la aja i epun. Ame pe, atreine hi troa xatua epuni hnene la itre xaa trejin troa hane cainöj. Qa ngöne lai, maine epuni a aja ixatua, ke the luelue kö troa amexeje lai kowe la itre qatre thup maine itre xaa trejin hnine la ekalesia ka ijije troa hane xatua epun.
6 Iehova a öhne la itre hne së hna kuca matre troa nyihluei Nyidrë, nge Nyidrëti a madrine atraqatr la etrune la aqane nyihlue i Nyidrëti hnei nyipunie. (Sal. 139:1-4) Pine laka nyipunie a mejiune koi nyidrë, haawe, tro Nyidrëti a hamën la trengecatre koi nyipunie matre troa wawen me hetre thangane ka loi la huliwa ne cainöje i nyipunie.—2 Kor. 12:7-10.