Hnene La Nyipici Hna Nuamaca Së Tune Kaa
1 Ame ngöne la ketre ijin, hnei Iesu hna qaja kowe la angetre Iudra ka lapaun koi nyidrë ka hape: “Tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:32) Sisitria catre kö hune la itre xaa aqane nuamacan la atr, nge atreine hi troa kapa la iamacanyi cili hnene la itre atr asë—itre trena mo, maine itre puafala, itre ka ini maine itre thaa hna inin pena. Ame la nyipici hnei Iesu hna inin, tre, celë hi la ka troa nuamacanyi së lai qa ngöne la ngazo me mec. Tune la hnei Iesu hna qejepengön ka hape, “ame la ate kuca la ngazo, angeice hi la hlue ne la ngazo.” (Ioane 8:34) Drei la aja ka tru the së troa traqa kowe la ijin laka tro ha “nue [la nöjei atr ka drengethenge] qa ngöne la hna othe hnene la ka hnyeqet, kowe la hna nue gufane ka hadehadeu ne la ite nekö i Akötesie”!—Rom. 8:21.
2 Troa nuegufa së hnene la nyipici göi Iesu memine la hnëqa i nyidrë, ene la troa eatrën la aja i Akötresie. Kolo lai a qaja fe la atrehmekun ngöne la mel hna hujën hnei Iesu thatraqa së, ene la thupene mel. (Rom. 3:24) Nge enehila fe, maine tro sa kapa me drengethenge la nyipici qa hnine la Tusi Hmitrötr, tre, troa aijijë së troa hetre madrin, me nuefuga së qa ngöne la xou, me hleuhleu, me nöjei pengöne ngazo hna kuca.
3 Inuamacanyi Qa Ngöne La Xou Me Hleuhleu: Thaa hleuhleu menu kö së pine la itre ewekë ka traqa e cailo fen, pine laka atre hi së la kepin matre kola traqa la iangazo, nge xecie koi së laka easenyi hë matre paatre pi ej qaa la fen. (Sal. 37:10, 11; 2 Tim. 3:1; Hna ama. 12:12) Ketre, kola nuegufa së hnene la nyipici, qa ngöne la itre ini ka thoi ngöne la pengöne la atr ka meci hë. Atre hi së laka thatreine kö troa akötrë së hnene la ka meci hë, nge thaa angatre kö a akötre epine palua ngöne la ketre götran, nge thaa Akötresieti kö a xom la mele ne la itre atr qaa la fen, matre troa ceme Nyidrë ngöne la ketre götran e hnengödrai.—Ate Cai. 9:5; Ite Huliwa 24:15.
4 Kola ahmaloeën la ehnefe ka eje thene la ketre kem me thin, ka trene nekön ka meci ngöne la ketre akesida ne loto. Hna qaja hnene la thin ka hape: “Kösë kola pë alien la mele i nyiho, uti hë la tro hmaca nyiho a öhne la nekö i nyiho trahmany jëne la melehmaca. Ngo atre hi nyiho laka, thaa tro kö a qea la ijine tro nyiho a hleuhleu.”
5 Inuamacanyi Qa Ngöne La Itre Ewekë Ka Ngazo Hna Kuca: Atreine hi la Tusi Hmitrötr troa saze la aqane mekun me thiina ne la ketre atr, ewekë lai ka nuegufa angeic qa ngöne la itre ewekë ka ngazo, ene pe kola neëne fe la itre ethane itre ej. (Efe. 4:20-24) Maine tro sa melën la thiina ka meköt, me catr huliwa, tre, atreine hi tro sa cile kowe la mele ne puafala. (Ite edomë 13:4) Maine tro sa hujën la mele së pine la ihnim, tre, tro lai a alolon la aqane imelekeu së me itre xaa atr. (Kol. 3:13, 14) Maine tro sa metrötrën la mus hna amekötin e hnine la fami göi itre Keresiano, tre, thaa tro jë kö a tru menu la itre jol e hnin ej. (Efe. 5:33–6:1) Maine tro sa ananyin la itre thiina ka ngazo, ene la iji menu la ka haitr, me kuci ngazo, me ufi sixa, me xomi dorog, tre, tro ha lolo la mele së.—Ite edomë 7:21-23; 23:29, 30; 2 Kor. 7:1.
6 Naene lao macatre ne xomi dorog hnene la ketre thöth, nge thatreine kö angeice trij lai thiina cili. Ame la ketre drai, hnei angeic hna porotrik memine la ketre atre cainöje e cahu hna tro. Hnei angeic hna kapa la itre itus, nge hnei nyidroti hna ce ithanatan troa wai angeice hmaca ngöne la hnalapa i angeic. Hna nyiqaane la etidi angeic. Thupene la lue treu, angeic a trije la nöjei dorog, nge thupene la eitr lao treu ne etid, angeice a hane xome ju fe la bapataiso. Ame la kola öhne hnene la trejin me angeic trahmany memine la ie i angeic laka thaa xomi doroge hë angeic, ene pe hane ju fe nyidroti pi inine la Tusi Hmitrötr.
7 Xatuane Jë La Itre Xan Troa Hetrenyi La Inuamacany: Tro jë a jole catr kowe la itre atr hna lapa xome hnene la itre ini ka thoi, troa trotrohnine hnyawa la inuamacanyi ka xulu qa hnine la Wesi Ula i Akötresie. Nyipi ewekë troa catre wang la itre atr, me hnëkë hnyawa hnene la ka ini matre troa ketr la itre hni angatr. (2 Tim. 4:2, 5) Thaa ijine tro kö së la a huli hmitr ngöne la huliwa ne ‘cainöjëne la inuamacanyi kowe la itre po.’ (Is. 61:1) Ka sisitria la inuamacanyi ne la itre keresiano. Mele ka thaa ase palua kö la pune ka loi kowe la itre ka kapa la inuamacanyi cili.—1 Tim. 4:16