Ketre Video Ka Ithuemacanyi Koi Së Me Ketr La Itre Hni Së!
Eiperem 1951. Nyimutre la Itretre Anyipici Iehova ekö e Rusi, itre thauzane la etrun, trahmanyi me föe me hanekönatr, hna aisaijen, me umën kösë itre öni hnine itre ikaatr, nge upe pi pë hë a tro Siberie. Pine nemen matre kola thele ielene hnene la musi Rusi troa lepe apaatrenyi angatr? Tune kaa la aqane cile la itre trejine kowe la icilekeu cili, me kökötre lolo ngacama nyimutre la itre macatre ne pane qanangazo angatr? Tro nyipunieti a öhne la itre mekune ka sa la itre hnyinge cili, hnine la video hna hape, Fermeté des Témoins de Jéhovah face à la persécution nazie. Pane hane jë goeëne ej, nge nue pi la itre ithuemacanyi hnei nyipunieti hna troa kapa, matre troa acatren la lapaune i nyipunie koi Iehova ngacama troa traqa la itre itupathi koi nyipunie!
Ijije kö tro epuni a sa la itre hnyinge celë? (1) Eue lo kola xötrei hane kapa ekö hnei musi la Itretre Anyipici Iehova e Rusi? (2) Qëmekene me thupene lo Hnaaluene Isi Ka Tru, tune kaa la aqane kökötre ne la itre hnepe lapa, Itretre Anyipici Iehova e Rusi? (3) Tune kaa la aqane icilekeu la itre hnei angatre hna lapaune kow memine la itre mekuna i Lenine? (4) Nemene la aliene lo ewekë hna kuca ekö hna hape “ Opération Nord ”, nge nemene la hna mekune troa kuca hnei Staline? (5) Nemene la aliene kowe la Itretre Anyipici Iehova la iupetrij, nge nemene la hna upi angatr troa kuca matre thaa tro kö a upetriji angatr? (6) Ame ngöne lo angatr a ti tërë a tro Siberi, nanyi catre pi hë la gojeny, ngo tune kaa la aqane ithuecatrekeu la itre trejine trahmanyi me föe, ene pe hai angatre jë hnene la itre ka thupë angatr? (7) Nemene la itre akötr atraqatr hna xomihnine hnene la Itretre Anyipici Iehova e Siberia? (8) Nemene la ewekë hna hnëkëne ngöne götrane la ua ka nyipi ewekë catr kowe la nöje i Iehova, nge pine nemen? (9) Pine nemen matre kola nue hnene la itre trejine la mele i angatr troa kapa la itre itusi angatr, nge tune kaa la aqane cilecatre angatr ngacama catrehnine catre la aqane icilekeu ne la itre mus troa sawa matre thaa tro kö angatr a kapa itre ej? (10) Tune kaa la aqane catre icilekeu Khrushchev memine la nöje i Akötresie? (11) Tune kaa la aqane thele hnene la itre musi troa lepe la lapaune ne la itre neköne la Itretre Anyipici Iehova? (12) Nemene la hna trotrohnine hnyawa hnene la itre trejine ngöne la kepine matre hna akötrë angatr? (Annuaire 2002, götrane 203-4) (13) Nemene la aqane ujë pena kowe la itre ka iakötrë la icilekeu i angatr kowe la organizasio i Akötresie? (Annuaire 2002, götrane 220-1) (14) Nemene la itre ewekë ka eatre hë enehila, ngacama ame ekö tre ceitune itre eje me itre pu ne jidr kowe la Itretre Anyipici Iehova ne Rusi? (15) Nemene la ka xatuan la itre trejine troa cilehuti ngöne la itre itupath, nge tune kaa la aqane amamane hnene la pune la video la enyipicine la hna qaja hnei Ieremia 1:19? (16) Qaja jë la ketre ewekë hna melën hnene la itre trejine ka ketr la mele së me ithuecatre koi së.