Ijije Kö Tro Së a Hane Nue La Uma Së?
1 Ame ngöne lo hneijine i Iesu, nyimutre la itre Keresiano ka nue la itre uma i angatr matre troa hane nyi hnen la ite icasikeu ne la ekalesia. (1 Kor. 16:19; Kol. 4:15; Filem. 1, 2) Ame ngöne la itre xaa ekalesia enehila, thaa ijije kö la itre uma nyine hnen la itre Ini Tus Ne La Ekalesia, me itre icasikeu göi cainöje trootro. Matre kösë ame ngöne la itre xaa ini tus, ala thötre maine nyimutre pena hune lai la itre atren; kösë tru catre pala ha, thaa eje kö lo hna amekötin, ene laka, laka thaa tro kö a sasaith la 15 lao etrun la itre atren la itre ini tus.
2 Ketre Hnëqa Me Madrin Ka Tru: Hapeu, hne së kö hna hane mekun troa nue la uma së, matre troa hane hnen la Ini Tus Ne La Ekalesia? Ame la hna ajan, tre, ene la ketre hnahag ka nango tru ka porop, ka hetre nyine alain, nge thaa hedredrei menu kö ke hetre jëi eny. Eje hi laka, ketre madrine ka tru e troa hnen la ini tus ngöne la hnalapa së, ngöne laka, celë hi ketre icasikeu ne la ekalesia, nge ketre, ketre ewekë lai hna hnëkën hnei Iehova matre troa inin la nöje i Nyidrë. Nyimutre la itre trejin ka qaja la itre manathith hnei angatr hna kapa, qa ngöne laka, hnei angatr hna nue la uma i angatr thatraqane la ini tus.
3 Maine epuni a mekun ka hape, ijije hi troa hnen la ini tus ngöne la hnalapa i epun, haawe, thuemacane jë la itre qatre thup. Maine jë angatr a thele hnen la itre ini tus. Maine thaa ijije kö troa hnen la ini tus ngöne la hnalapa i epun, hapeu pena matre troa hane kuca e cili la itre icasikeu thatraqan la huliwa ne cainöj? Maine thaa kolo kö a aja uma göi itre ini tus enehila, ngo ame pe tre, nyipi ewekë troa atre hnene la itre qatre thup laka atreine hi tro epuni a hane kapa la ketre ini tus. Maine jë troa aejën elanyi la mekune i epun.
4 Loi e Troa Melëne La Itre Thiina Ka Loi: Maine easë a traqa itronyi kowe la ketre hnalapa matre troa icasikeu, loi e tro asë hi së a metrötrën la hnalapa ne la ka kepe së. Loi e troa xecie hnyawa kowe la itre keme me thin laka, ce angatr me itre nekö i angatr ngöne la hnë ini tus, ngo thaa koilo kö ngöne la itre xaa hnahag ne la uma. Loi e tro mina fe a metrötrën la itre atr ka lapa ezin la hna ini tus, troa thupën matre thaa tro kö a ajolë angatr.—2 Kor. 6:3, 4; 1 Pet. 2:12.
5 Kola ithuecatr koi së hnei Peteru 13:6 matre thaa tro kö së a thëthëhmin la “troa kuca la loi me ihnim; ke celë hi ite huje nyine amadi Akötesie.” Ame la troa nue la uma së thatraqan la ketre icasikeu ne la ekalesia, tre celë hi ketre aqane tro së lai a hane ce thawa la itre ewekë ka loi memine la itre xaa atr, me hane “metötë Iehova hnene la ite nyi [së].”—Ite edomë 3:9.