Loi e Inine Së Koi Itre Atr La Nyipici Göi Iesu
1 Hna xatuan la itre Keresiano hna iën hnene la itre xaa mamoe, ene lo itre sine ce huliwa i angatr, troa, “xom la nyine anyipici Iesu Keriso.” (Hna ama. 12:17) Celë hi ketre hnëqa lai ka nyipi ewekë catr, pine laka, caasi hi la jëne iamele, a Keriso hmekuje hi.—Ioane 17:3; Ite Huiliwa 4:12.
2 ‘Gojeny, Nyipici, Me Mel’: Hna qaja hnei Iesu ka hape, “Ini la gojeny, me nyipici, me mel; pëkö atre a tro koi Tretretro e tha qa kö theng.” (Ioane 14:6) Maine easë a ajan troa thithi koi Akötresie, nge thele troa kepe së hnei nyidrë, caasi hi la sipu “gojenyi” së koi Nyidrë, ene Iesu. (Ioane 15:16) Iesu la “nyipici,” ngöne laka, ame la itre hna perofetan me itre hna nyihatren ngöne la itre Hna Cinyihane qene Heberu, tre, hna aejën hnei nyidrë. (Ioane 1:17; Kol. 2:16, 17) Eje hi laka, ame la nyipi alien la itre hna perofetan hnei Akötresie, tre, ene la troa amamane hnyawa koi së la enyipiewekëne la hnëqa i Iesu ngöne la troa eatrëne la aja i Nyidrë. (Hna ama. 19:10) Ketre, Iesu hi la “mel.” Maine easë a ajan troa hetrenyi la mel ka thaa ase palua kö, tre, nyipi ewekë tro asë hi së a lapaun kowe la mel hna hujën hnei Iesu.—Ioane 3:16, 36; Heb. 2:9.
3 He Nge Joxu Ka Mus: Nyipi ewekë mina fe troa wanga atrehmekun, la etrun la mus hnei Iehova hna nuexönën kowe la Hupuna i Nyidrë. Hna acili Iesu hë troa Joxu ne la Baselaia i Akötresie—‘tro ha la nöjei nöj a drenge thenge anganyidrë.’ (Gen. 49:10) Ketre, hnei Iehova hna ami Iesu troa He ne la ekalesia. (Efe. 1:22, 23) Nyipi ewekë tro sa xatuan la itre atr ka inin la Tusi Hmitröt me easë, troa trotrohnin la aqane eatrongën Iesu la ekalesia me nyi trenge ewekë i Nyidrë, la “hlue ka nyipici me ka inamacan” matre troa thawa la “xeni ngöne la nyipi ijin,” ene la göxen ngöne la götrane la ua.—Mat. 24:45-47.
4 Ihnimi Ne La Atre Huuj Ka Sisitria: Pine laka, hnei Iesu hna hane tu së itre atr, laka, hna cile kowe la itre itupath me itre akötr, haawe, “ijije hë nyidëti troa xatua angate hna tupath.” (Heb. 2:17, 18) Drei la ekeukawan kowe la itre atr ka ngazo troa atre laka, Iesu a trotrohnin la hace ka ej thei angatr, me xëwe sai angatr! (Rom. 8:34) Jën la mel hna huujën hnei Iesu, me jën la itre huliwa hna kuca hnene la Atre Huuj ka Sisitria, atreine hi tro sa “cate” tro matre troa kapa la “ixatua ngöne la ijine ka cei tun.”—Heb. 4:15, 16.
5 Epi tro la itre ewekë hne së hna catre kuca matre troa tro fë la nyipici göi Iesu kowe la itre xaa atr, a hane upi angatr troa drengethenge me ce nyihluei nyidrë me easë.—Ioane 14:15, 21.