Mejihnine Ju Së La Hne Së Hna Hetreny
1 Kola eamo së hnene la Tusi Hmitrötr troa thele la itre hna ajan hnene la itre atren la hnalapa së ngöne la götrane la ngönetrei, ngo thaa celë kö la sipu aja së lai ngöne la mele së. Loi e troa amë panën, la itre ewekë ngöne la götrane la ua. (Mat. 6:33; 1 Tim. 5:8) Ketre jole ka tru troa atreine tulu ewekë, ngöne la “nöjei ijine ka aköte” celë. (2 Tim. 3:1) Nemen la ka troa xatua së troa mele tune lai?
2 Troa Xome La Mekune i Tusi Hmitrötr: Kola hmekë së hnene la Wesi Ula i Akötresie troa thel la itre mo ne fen, ka troa humuthi së ngöne la götrane la ua. (Ate Cai. 5:10; Mat. 13:22; 1 Tim. 6:9, 10) Ame ngöne la itre hneijin ka akötr enehila, troa luuzi la mele së, e hne së hna catr huliwa menu pala ha koi maseta, maine thele manie pena, nge ame pë hë la itre huliwa ngöne la götrane la ua, ene la itre icasikeu, me isa ini tus, me huliwa ne cainöj, hne së pë hë hna amë pinën itre ej, ngöne la hnaaluene göhnë ne la mele së. (Luka 21:34-36) Celë hi matre, Tusi Hmitrötre pe a eamo së ka hape: “E hetrenyi hë së la xeni me ixete, ea mejihnine ju hë lai.”—1 Tim. 6:7, 8.
3 Thaa kolo kö a hape, tro la itre Keresiano a mele pë ewekë. Ngo kolo lai a xatua së troa atrehmekune hnyawa la ite nyipi ewekë kowe la mele së, ene la xen, me iheetr, me hnalapa ka ijij. Maine hetrenyi hë the së la itre ka nyipi ewekë kowe la mel, haawe, thaa loi hmaca kö tro sa thel troa hetrenyi menu pala ha la itre mo. Maine easë a mekun troa itön la ketre ewekë, maine thele hnaaluene huliwa, nyipi ewekë pala hi tro sa isa hnying ka hape, ‘Hapeu, nyipi ewekë kö tro ni a itöne la ewekë celë, maine troa xomi hnaaluene huliwa?’ Maine tro së a pane hnyinge hnyawa pala hi, tro ha xatua së troa wangatrune hnyawa la eamo hna hape: “The aja mani kö nyipune; meji hnine ju nyipunie la ite ewekë hna heteny.”—Heb. 13:5.
4 Maine tro së a lapaune koi Iehova, tro hë Nyidrëti a xatua së. (Ite edomë 3:5, 6) Maine nyipici laka, easë a troa catre huliwa matre troa hetrenyi ngöne la nöjei drai la itre ka nyipi ewekë kowe la mele së, ngo thaa tro pi kö së a eköth la mele së hune la ite ewekë cili. Maine co maine tru pena la hne së hna hetreny, ngo easë a mejiune koi Iehova laka, tro Nyidrëti a hamëne koi së la itre ka nyipi ewekë kowe la mele së. (Fil. 4:11-13) Eje hi lai laka, tro hë së a hetrenyi la madrine qaathei Akötresie, ene la troa mejihnin, cememin la itre xaa manathith ka nyimutre.
5 Loi e Catr La Lapaune Së Tune La Itre Xan: Hnene la ketre föe ka mele caasi pë hë hna hetrune la nekö i nyidroti jajiny ngöne la nyipici, hnei nyidroti hna ahmaloeën trongën la mele i nyidro. Ngacama hnei eahlo hna madrin la itre ewekë ka lolo ka ej ngöne la hnalapa i eahlo, ngo hnei eahlo hna tro kowe la ketre uma ka co, nge thupene lai kola xom la ketre hnahag. Kola aijijë eahlo troa nango co la itre hawa ne huliwa i maseta, matre tro pena ha a tru hnei ijine i eahlo kowe la huliwa ne cainöj. Tru hë la nekö i eahlo, nge faipoipo hë angeic, kolo pë hë a canga fenesi pi hna huliwa i maseta hnene la thin, ngacama kolo ha troa nango co la manie hna kapa pe e nöjei treu. Ame enehila, kolo ha troa weje la hnaasevene ne macatre ne pionie ka huti la trejine föe, nge thaa hnei eahlo kö hna mekune treijëne hmaca lo itre ewekë hnei eahlo hna nuetriij me xomihnin, göi troa amë panën pala hi la itre aja ne la Baselaia ngöne la mele i eahlo.
6 Kola pionie hnene la ketre qatre thup memine la föe i nyidrë ngöne la itre macatre ka nyimutre, nge nyidroti fe a hetrun la köni nekö i nyidro ngöne la itre ijine cili. Hnei angatr pala hi hna inin ngöne la fami, troa mejihnin la itre nyipi ewekë koi angatr, ngo thaa tro kö a drengedrenge la itre aja i angatr. Kola qaja hnene la trejine ka hape: “Hne huni hna mele tune hi la. Hna traqa la itre xaa ijine jole koi hun, ngo hnei Iehova pala hi hna hamën la itre ka nyipi ewekë kowe la mele hun. . . . Ame ngöne la eni a öhne la aqane amë panëne pala hi hnene la fami i eni la itre aja ngöne la götrane la ua, eni a atrehmekun laka, ewekë ka loi hi lai, nge kola mama koi ni laka, hetre thangane ka loi kowe la hnepe lapa i eni.” Kola qaja mina fe hnene la föe i nyidrë ka hape: “Ame ngöne la eni a öhne laka catr la hna huliwa hnene la [trahmanyi eni] ngöne la götrane la ua, ene pe kola atraqatr mina fe la madrineng.” Kola madrine fe la itre nekönatr, laka, kola nyihlue i Iehova hnene la kem me thine i angatr ngöne la huliwa ne pionie.
7 Ame kowe asë la itre atr ka iën troa kuca hnene la hni ka pexej la aja i Akötresie, me xomehnöth troa thel la itre mo ne fen, eje hi lai laka, Tusi Hmitrötr a thingehnaean la itre manathithi ka tru, enehila me ngöne la mele ka troa traqa.—1 Tim. 4:8.