Mele Ne La Itre Fami Ngöne La Götrane La Ua—Troa Acatren Tune Kaa?
1 Hna ithuecatr kowe la itre hnepe lapa Keresiano, troa ‘inin troa thiina ka loi ngöne la hnalapa i angatre kö.’ (1 Tim. 5:4) Ngo qa ngöne laka, nyimutre catr la itre ewekë ka ngazo ka troa ajojezi së me ananazijën la lapaune së, haawe, nyipi ewekë tro la itre hnepe lapa a catre huliwa matre troa egöcatr pala hi ngöne la götrane la ua. Nemen la aqane troa kuca, matre troa egöcatr ngöne la ua?
2 Troa Elemeken La Fami Tui Keriso: Nyipi ewekë troa nyitipu Iesu hnene la itre hene lapa, ngöne la aqan troa xom la itre hnëqa i angatr, ene la troa eköth la hnepe lapa matre tro ej a catr. Thaa hnei Iesu hmekuje kö hna amaman la ihnimi nyidrë koi së jën lo mel hnei nyidrë hna hujën, ngo hnei nyidrëti pala hi hna “ithu ane me thupën” la ekalesia. (Efe. 5:25-29) Kola xötrethenge hnene la itre keme me thin la tulu i Iesu, ngöne laka, angatr a thupën ngöne la nöjei drai la itre aja ne la itre atren la hnepe lapa ngöne la götrane la ua. Ame la itre aja cili, tre, ene la troa ini tusi ne la fami ngöne la nöjei wiik, me thel troa porotrikë Tusi Hmitrötr pala hi, me ce ithanatan la itre xaa jol hna cile kow.—Deu. 6:6, 7.
3 Ngöne La Hna Cainöje Trootro: Loi e troa madrine asë la itre hnepe lapa troa qeje Iehova memine la itre aja i Nyidrë kowe la itre xaa atr, ke, celë hi ketre götran ka nyipi ewekë catr ngöne la hmi i angatr. (Is. 43:10-12) Maine nyipunie itre keme me thin a ajan tro la itre nekö i epun a hane Itretre Anyipici Iehova elany, haawe, loi e tro nyipunie a canga hnëkën la itre hni angatr kowe la huliwa ne cainöj. Ithanatane jë la itre kepin matre nyipi ewekë troa isa hujën la mele së ngöne la huliwa ne cainöj, nge loi e troa xome pala hi la huliwa cili ngöne la nöjei wiik. (Mat. 22:37-39) Thupene lai, wange jë matre tro angatr a ce cainöje pala hi me nyipunie.
4 Eköthe jë la madrin kowe la huliwa ne cainöj, hnene la troa ami ijin ngöne la kola etid memin la fami ngöne la wiik, matre troa hnëkën me anyimua amacan la ketre aqane nyiqaane ithanata ka lolo. Loi e troa isa inin la itre nekönatr troa cainöj, me xatua angatr troa kökötr thenge la macatre memin la hnei angatr hna atrein. Thupen la hna pane ce cainöj me angatr, ithanatane jë la aqane trotrohnine angatr la pane aqane amaman Iehova la ihnimi Nyidrë. Qaja jë la itre ewekë hna melëne hë hnene la itre trejin, nyine troa acatren la lapaune së. Maine tro la itre hnepe lapa a ‘atre laka atre ihnimi la Joxu,’ tro hë angatr a easenyi koi Iehova, ene pe troa catr hnei angatr troa cile kowe la “iangazo asë.”—1 Pet. 2:1-3.
5 Ngöne La Itre Icasikeu: Drei la elolon e tro la itre atren la hnepe lapa a ithuecatrekeu matre troa hane sin asë la itre icasikeu ne la ekalesia, ngöne la kola kucakuca la ketre e angatr, me nanazij, maine kola akötre pena! Hna qaja hnene la ketre trejin jajiny, ka hape, “Ame la kola traqa hnene la keme i eni qa hna huliwa, kucakuca catre nyidrë. Ngo eni a ce thawa me nyidrë la ketre mekune ka sisitria hna troa ithanatan ngöne la ijine icasikeu ngöne la heji cili, ene pe kola hane ithuecatr koi nyidrë troa hane sin lai icasikeu. Haawe, ame pena ha la eni a kucakuca, nyidrëti pena ha a ithuecatre koi ni troa sin la itre icasikeu.”—Heb. 10:24, 25.
6 Troa Ce Kuca La Itre Ewekë: Loi e troa ce kuca la itre ewekë hnene la itre hnepe lapa, tune la troa ce kuca la itre jol hnine la hnalapa. Ketre loi e tro mina fe a amë me iëne hnyawa la ijine troa mano, me kuci madrin. Nyimutre la itre ijine madrin, me itre ijin ka lolo hne së hna lapa mekune pë hë, tune la troa lapa ezin hnagejë maine ketre götran pena gaa mingöming troa ce xen, me tro, me kuci itre elo, me tro agö troa wang la itre sinee maine itre enehmu pena.—Ate Cai. 3:4.
7 Ame ngöne la nöjei drai, kola cil hnene la itre hnepe lapa Keresiano ka mele nyipici kowe la itre ewekë ka tupath la mele i angatr ngöne la götrane la ua. Maine tro angatr a fedre catr koi Iehova, eje hi lai laka, tro hë angatr a hane kapa la trenge catr qaathei Nyidrë.—Efe. 6:10.