Nyipunieti Kö a Hane Xomihni Ahoeany?
1 “Pëkö madinenge ka sisitia hune laka, . . . ite nekönge a trongëne la nyipici.” (3 Ioane 4) Atraqatre la madrine i Ioane, qa ngöne la aqane xomihni ahoeanyi ne la itre nekö i nyidrë ngöne la götrane la ua. Drei kö la madrine ne la Tretretro së e hnengödrai, ngöne la nyidrëti a öhne la itre hlue i nyidrëti e “trongëne la nyipici”!—Ite edomë 23:15, 16; 27:11.
2 Maine nyipici laka kola catre nyihlue i Akötresie hnene la nöje i Nyidrëti asë, ngo hetrenyi la itre xane ka nango huli hmitr. Ngacama hnei angatre hna catre huliwa ngöne lo angatre a xötrei atre la nyipici, ngo ame hë la kola tro la itre macatre, co trootro hë nge xalaithe pe hi la itre ijine angatre a cainöje me inine la itre atr.
3 Ame itre xane ke, trotrohnine hi së la angatre a nango paatr, qa ngöne laka, kucakuca ha la ngönetrei, nge kola qatre trootro. Ngo kolo fe a hane qaja aloinyi angatr, qa ngöne la aqane xomihni ahoeanyi angatr. Angatre a kuca la hnei angatre hna atrein. Ngo loi e tro pala hi la atr ka nue la mele i angeice koi Akötresie a ketre sipu hnyinge ka hape: ‘Tune kaa la aqane meleng, tru catre jë pala ha la hnenge hna thele la itre sipu ajang, matre kösë co pëhë la itre aja ne la Baselaia ngöne la meleng? Hapeu, ka “manoiaji” ni, maine ka “catre” pala hi ni huliwa?’ (Hna ama. 3:15, 16; Luka 13:24) Epi tro asë hi së a mekune ngöne la thithi la hne së hna kuca, me thele troa kökötr, nge loi e eje pala hi ngöne la mekuna së, laka, Iehova a thingehnaeane troa “hadehadeu, me mingöming, me tingetinge koi angate asë angete kuca la loi.”—Rom. 2:10.
4 Aqane Troa Xomihni Ahoeany: Nemene la ka xatua Iesu troa xomihni ahoeany? Hnei Paulo hna qaja ka hape: “Ate xomi hnine la [“sinöe,” MN], nge tha nyipine la hmahma, ngöne la madine hna amë xajawa i nyidë, ame hna munëti ngöne la götrane maca ne la therone i Akötesie.” (Heb. 12:1-3) Sisitria catre kö la madrine hna amë qëmeke i Iesu, hune la itre itupathi ka thaa troa cile hut, hnei nyidrëti hna qëmeke kow. Maine tro së a hane mekune hnyawa fe la manathithi hna amë qëmeke së, haawe, tro fe lai a hane xatua së troa xomihni ahoeany. (Hna ama. 21:4, 7; 22:12) Maine tro së a hni koi Iehova troa hamëne koi së la trenge catre jëne la hne së hna isa inine la Tusi Hmitrötr, me sine pala hi la itre icasikeu, me catre thith, haawe, thaa tro jë kö së a nanazije troa kuca la hnëqa së qaathei Nyidrë.
5 Iehova a madrine la aqane xomihni ahoeanyi ne la itretre nyihlue nyidrëti hnyawa. Qa ngöne lai, catre pi së troa ithue xaa madrine i Nyidrë, nge the mano kö së “trongëne la nyipici.”