Hetre Eloine Kö Koi Së La Aqane Xomihni Ahoeanyi Iehova?
1 Maine thaa xomihni ahoeanyi ju Iehova ngöne la 10, me 20, itre macatre ka nyimutre ne anyipicin e cailo fen, hapeu, tro jë kö së a hane atre la nyipici? Easë a olene koi Iehova la hnei Nyidrëti hna aijijëne la itre atr ka ala nyimu troa “ietra.” Ketre, “tro ha traqa tune la ate kë ’nö,” la drai atraqatre ne tro Iehova a amekötine la fen. (2 Pet. 3:9, 10) Qa ngöne lai, loi e thaa tro pi kö së a mekune menune ka hape, Iehova a hmitre troa apaatrene la fene ka ngazo celë.—Hab. 2:3.
2 Loi e Tro Sa Utipine La Itre Atr: Ka thatre hmekune la xomihni ahoeanyi Iehova. Thaa tro pi kö së a thëthëhmine la itre aja i Nyidrë. (Iona 4:1-4, 11) Iehova a öhne la aqane akötre ne la itre atr, nge Nyidrëti a utipi angatr. Ketre tui Iesu mina fe, hnei nyidrëti hna utipine la itre atr ka ala nyimu hnei nyidrëti hna cainöje kow; hnei nyidrëti hna ajane troa haöthe la fene hnene la huliwa ne cainöj, matre troa hane aijijëne la itre atr ka nyimutre, troa hetrenyi la mele ka epine palua.—Mat. 9:35-38.
3 Hapeue la kola traqa la itre jole me akötr, hetre utipine së kö kowe la itre atr ka thatre kö la nyipici? Ceitune la itre atr enehila memine la “ite mamoe ka pa ate thupën,” pine laka, angatre a thele troa cile kowe la itre ejolene la fen, me tupathe troa trotrohnine la aliene itre ej. (Mareko 6:34) Maine tro sa catre cainöjëne la maca ka loi, eje hi laka, tro hë së a akeukawane la itre atr ka hni ka menyik, me amamane la ole së koi Iehova, pine la hnei Nyidrëti hna xomihni ahoeany.—Ite Huliwa 13:48.
4 Nyipi Ewekë Catre La Huliwa Së: Hna bapataisone lo macatre hnapan, la 323 439 lao atr, nge 14 000 000 lao ka sine la Drai Ne Amekunën. Drei la emanane la itre atr ka ijije troa mele pe, elanyi la kola troa apaatrene la fene ka ngazo celë! Thatre kö së la etrune elanyi la “ka ala nyimu,” ngo eje hi laka, troa nyimutre catr. (Hna ama. 7:9). Ame koi ijine troa umuthe la huliwa ne cainöj, pëkö ka atre, Iehova hmekuje hi. Troa cainöjëne la maca ka loi thenge la aja i Nyidrë, “ame hna traqapi la pun.”—Mat. 24:14.
5 Xoxopatre pe hi la ijin, nge calemi hë la drai Akötresie. (1 Kor. 7:29a; Heb. 10:37) Eje hi laka, “eashenyi enehila la mel, ngo nanyi ekö lo lapaune shë.” (Rom. 13:11) Loi e tro sa trotrohnine hnyawa la kepine matre Akötresieti a xomihni ahoeany. Haawe, tro fe hë së a hane nyimenyime cainöjëne la maca ka loi kowe la itre atr ka ala nyim, matre tro la itre ka mejiune kowe la meköt, a hane trotrohnine me öhne la ihnimi ipitö i Nyidrë.