Hë Angatre Jë Fe
1 Kola hane drenge fe enehila, e cailo fene hnengödrai ngöne la 233 lao nöje ka tru, lo aqane ihë ekö a itre hadredre hë lao macatre hna hape: “Trojë fe, mate elë jë shë kowe la wete i Iehova, kowe la ēnē i [Iehova, NW] . . . nge tro nyidëti a ini shë la ite jë i nyidë, nge tro sha trongëne la ite gojenyi qa thei nyidë.” (Is. 2:3) Ame la ketre ewekë ka sisitria catre nyine tro sa kuca, ke, ene la troa eatrongëne la itre atr kowe la organizasio i Iehova; easë hi lai a xatua angatre troa kökötre ngöne la götrane la ua, matre tro angatre a hane kapa la mele ka thaa ase palua kö.
2 Maine jë kola luelue la itre xaa trejine troa hëne la itre atr kowe la Uma ne Baselaia, ngöne laka, kola mekune ka hape, loi e troa pane amamane hnene la hnainine laka, angeice a kökötre hnyawa ngöne la atrehmekune hnei angeice hna kapa. Ngo hetrenyi la itre xaa atr, ka nyiqaane hane sine la itre icasikeu ne la ekalesia, nge thaa hna xejë petre kö la ini tus. Qa ngöne lai, the hmitre kö së troa hëne la itre atr, me ithuecatre koi angatre troa hane sine la itre icasikeu ne la ekalesia.
3 Nemene La Nyine Troa Kuca: Loi e troa hamëne kowe la itre atr la itre pepa ne ihë, matre troa ithuemacanyi koi angatr, göi itre icasikeu së. Nyipi ewekë troa qaja koi angatre ka hape, hna nue koi nöjei atr asë troa hane sine la itre icasikeu, nge pëkö hle manie trootro. Qeje pengöne jë fe la aqane trongene la itre icasikeu. Amamane ju fe ka hape, kösë itre ini lai hna kapa qa hnine la Tusi Hmitrötr, nge ame la itre mekune hna ce wang, ke, hna hnëkëne itre eje thatraqane la nöjei atr asë, matre tro angatre a xötrethenge. Qaja ju fe la pengöne la itre atr ka hane sine la itre icasikeu, laka, thaa itre ka madra hmekuje kö maine itre ka wetrewetre pena, ngo nöjei pengöne atr asë, nge nyimu isa aqane mel. Ketre, kola kapa ngöne la hna icasikeu la nöjei atr asë ne la nöj, a itre nekönatre asë fe, itre ka tru me itre ka kaco. Loi e tro së a hëne lo itre atr hne së hna ini tusi kow, me thele la nöjei aqane troa xatua angatr, matre tro angatre a hane sine la itre icasikeu.
4 Ame la ihë tixenuë hna cinyihane hnei Tusi Hmitrötr, ke, ene la troa ce thawa la itre hna amekötine hnei Iehova thatraqane la mel: “Nge öni Ua me tepu i Iesu, ka hape, Trohemi. . . . Nge ame la ate pi iji, trohemi. Nge ame la ate ajan, xome gufane jë la timi ka mel.” (Hna ama. 22:17) Pëkö nyipi ewekë hune la troa hëne la itre xaa atr, matre troa hane sine la itre icasikeu.
5 Hna perofetane me qeje pengöne hnei Isaia 60:8 la itre hadredre thauzane lao atr ka xötrei lö enehila hnine la ekalesia i Akötresie; kola aceitunë angatre me itre meketrë kola “sheshë tune la iawe, me tune la ite meketë kowe la ite qëhnelö i nyuden.” Nyipi ewekë tro pala hi së a hëne la itre atr kowe la itre hna icasikeu së, nge loi e tro angatre a madrine la aqane kepe angatre hne së. Qa ngöne lai, tro hë së a amamane ka hape, easë a ce huliwa me Iehova, pine laka, Nyidrëti enehila a saqe icasikeune la itre atr asë ka hni ka menyik.—Is. 60:22.