Hetre Manathithi Hne Së Hna Kapa Qa Ngöne Lo Itre Kovasio, Hna Hape, “Jëne Mel Qa Thei Akötesie”
1 Ame lo itre treu ka ase hë, easë petre kö a hnëkë kowe lo itre kovasio ne Distrik, me itre asabele hna hnëkëne thatraqane la itre nöje asë ngöne la macatre 1998; ame la taan itre ej, ke hna hape, “Jëne Mel Qa Thei Akötresie.” Enehila, easë pë hë a lapa mekune la enyipiewekëne itre ej, ngöne la aqane trongene la organizasio. Easë a madrine atraqatre la xeni ne la ua hne së hna kapa, jëne lai itre ijine icasikeu ka sisitria cili.
2 Nyipi atraqatre catre la madrine hna kapa qa ngöne la itre kovasio ne la macatre celë, hna hnëkëne thatraqane la itre nöje asë. Ngacama hna traqa itronyi hnene la itre mesinare me itre xaa trejine ka xulu qa ngöne la itre xaa nöj, troa hane sine la kovasio, nge maine thaa qa së fe kö, ngo hne së asë hi hna drei mejene la itre mekune ka lolo hna qaja hnene la itre trejin, ene la aqane melëne angatre la huliwa ne cainöj; itre mekune lai hna hamëne ngöne la hnaipajö ne drai ka tru, jëne la cainöje hna hape, “Huliwa ne cainöje i ange Mesinare.” Ketre, hetre ithuecatre fe hne së hna kapa qa ngöne la “Itre rapore ngöne la aqane kökötre ne la huliwa ne menu” e cailo fene hnengödrai asë.
3 Ketre Ithuemacanyi Ka Mingöming Hna Hamën: Ame lo cainöje tixenuë ne drai ka tru, ke eje a sa la ketre hnyinge hna lapa mekune hnene la itre ka thatrepengöne petre kö la nyipici, kola hape: “Hetre mele kö e thupene la hna mec?” Hna hamëne ngöne la pune la cainöje ka lolo cili, la ketre boroshüre ka hnyipixe; ame la taan, ke, hna hape, Nemene La Pengö Së Ngöne La Easë a Mec? Eje hi laka, hne së hë hna e ej, nge hne së fe hë hna hane öhne la aqane tro eje a xatuane la itre atr, troa kapa la nyipici göne la pengöne la itre ka mec, me akeukawane la hni ne la itre trene sinee ka mec, jëne la mejiune kowe la melehmaca.
4 Hna afenesine la porogarame ne la hnaipajö ne mecixen, hnene la cainöje hna hape, “Atre Ixup—Thiina i Nyidrë, Me Itre Jë i Nyidrë.” Kola amamane hnyawa la enyipicine ka hape, hetre Atre Ixup. Hetrenyi la ketre itusi hna hnëkëne thatraqai së matre tro së a hane xatuane la itre xaa atr troa hane kapa la mekune cili; ame la taan la itusi ka hnyipixe cili, ke, kola hape, Y a-t-il un Créateur qui se soucie de vous? Maine nyipici laka, tro la itusi celë a acatrene la lapaune së isa ala caasi koi Iehova, me akökötrene la ole së kowe la thiina i Nyidrë, me itre jë i Nyidrë, ngo hna kuca kö la itusi thatraqane lo itre atr ka inamacane catr, nge maine jë thaa hane kö angatre lapaune koi Akötresie.
5 Ketre Mekune Hna Axeciëne Hnene La Hni Ka Pexej: Hna nyipune la kovasio hnene la ketre cainöje ka qaja hnyawa la enyipiewekëne koi së asë troa “Trongëne Pala Hi La Jë i Iehova.” Drei la eloine la troa sisedrëne pala hi la mekune hna ce axeciën, tune la troa trongëne hnyawa, me catre fë ej, me troa ahlemune la edraiëne la jëne mele qa thei Akötresie! (Is. 30:21) Enehila, easë a catre thele troa eatrëne la itre mekune cili hna ce axeciëne me ce kapa. Drei la eloine la xeni ne la ua hne së hna kapa, qa ngöne laka, hne së hna hane sine la kovasio, hna hape, “Jëne mel qa Thei Akötresie!”