Kola Elemekene La Huliwa Hnene La Qatre Thup Perezida
1 Ketre hnëqa ka tru catre la troa thupëne la ekalesia. (Ite Huliwa 20:28; 1 Tim. 3:1) Nyimutre la itre hnëqa hna xome hnene la itre qatre thup; nyipi ewekë tro sa ce wange itre ej, matre tro asë hi së a öhne hnyawa la aqane huliwa catre i angatre koi së, ene pe hane jë së metrotrëne la hnëqa ka eje thei angatr; tro sa ce wange la pane hnëqa.
2 Kola acile hnei sasaiatri la qatre thupe perezida, matre troa huliwa ngöne la ekalesia; thaa hna nyifegone kö la itre ijine tro nyidrëti a xome la hnëqa cili. Kola elemekene me cagojenyine la huliwa hnene la qatre thup perezida; celë hi ketre ixatua ka tru kowe la itre qatre thup, matre tro angatre a wangatrune hnyawa la itre hnëqa hna isa athipe koi angatr. (Organisés pour bien remplir notre ministère, g. 42) Matre kola hapeue lai?
3 Kola kapa hnene la qatre thup perezida la itre tusi hna iupi fë kowe la ekalesia, nyidrëti a canga hamëne ju kowe la seketere troa fe. Ame ngöne la nyidrëti a hnëkëne la itre icasikeu ne la itre qatre thup, kola kapa hnene la qatre thup perezida la itre mekune nyine ixatua qa thene la itre xaa qatre thup, göne la itre ewekë nyine troa ce wang; thupene lai, nyidrëti a cinyihane asë ju ngöne la itre hnyinge nyine troa ce ithahnatan. Tro fe nyidrëti a xomiujine la icasikeu ne la itre qatre thup. Ame hë la kola fenesi la icasikeu, nge thupene la hna ce axeciëne la itre mekun, nyidrëti a pane goeëne hnyawa hmaca la itre hna ithahnatan, matre troa wange maine ijije hi troa kapa la itre mekune cili. Nyidrëti fe la ka hamë qa thatraqane la itre icasikeu göi huliwa ne cainöj, me troa kuci porogarame göne la itre cainöje hna hnëkëne kowe la ka ala nyim. Nyidrëti fe la ka hnëkëne la itre ithuemacanyi asë hna troa hamëne e hnine la ekalesia, me wange göne la itre nyine troa nyithupen, nge nyidrëti fe a thupëne hnyawa matre tro pala hi a cile fë la hna ithingë qëmekene la ekalesia.
4 Pine laka kola ciamene la atre thupe perezida, haawe, nyidrëti a kuca matre troa tro loi la huliwa ne la kometr ne huliwa ne cainöje ne la ekalesia. Ame ngöne la kola ajane hnene la ketre hnainine troa hane nyiqaane cainöj, maine tro ha hane xome la bapataiso, haawe, kola tro hnene la atre thup perezida troa wange la itre xaa qatre thup, matre tro angatre a ce wange memine la hnainine la itre hnying. Qane fe la atre thupe perezida troa hnëkëne la iwai ne la qatre thupe ka thupëne la sirkoskripsio, matre troa hetre thangane ka loi hna kapa hnene la ekalesia, qa ngöne la huliwa hna troa kuca ngöne lo wiike ne cainöje ka ketre pengöne kö.
5 Tru catre la itre hnëqa ne la atre thupe perezida, nge nyimu pengöne itre ej. Pine laka, nyidrëti a ipië ngöne la aqane xome nyidrë la itre hnëqa i nyidrë, haawe, loi e tro asë hi së a thele troa ce huliwa memine la itre qatre thup. (Rom. 12:8) Maine tro sa “idei” me “denge thenge” la itretre cile qëmeke së, haawe, tro hë angatre a kuca la huliwa i angatr, cememine la madrine ka tru.—Heb. 13:17.