Ce Easë Memine La Uati Hmitrötre i Akötresie
1 Hetrenyi la ketre hnëqa ka tru hna hamëne koi së itretre anyipici Iehova. Hnei Iesu hna qaja ka hape: “Nge ijije troa pane cainöjëne la evangelia kowe la nöjei nöj’asëjëihë.” (Mareko 13:10) Maine troa mekune hnene la atr ka hape, thatreine kö troa eatrëne lai, ngo eje hi laka, atreine hi troa kuca la huliwa cili. Hetrenyi la ketre ixatua ka tru, nge ketre mene ka eje ngöne la hnengödrai me fen, hna hamëne nyine troa ithuecatrenyi së, ene lo ua i Akötresie.—Mat. 19:26.
2 Itre Nyine Anyipicine Ngöne Lo Hneijine i Iesu: Hnei Iesu hna qeje nyidrëti kö ngöne la hna perofetane hnei Isaia, öni nyidrë ka hape: “Eje hunge la Uati Joxu . . . troa cainöjëne la maca ka loi.” (Luka 4:17, 18) Qëmekene tro nyidrëti a elelengë hnengödraië, öni nyidrëti kowe la itre aposetolo i nyidrëti ka hape, tro ha acatrenyi angatre hnene la uati hmitrötr, matre troa anyipicine “uti hë la cane la fene hnengödrai.” Celë hi matre hna eatrongë Filipo hnene la uati hmitrötr, matre troa cainöje kowe la ketre atr ka tru ne Aithiope; ketre tui Peteru, hnene la ua hna upi angeice kowe la ketre keneturio ne Roma; eje mina fe a upi Paulo me Banaba, troa cainöje kowe la itre nöje wanaithihlë. Drei la ka mekune ka hape, tro fe hë la itre atr cili a hane kapa hnyawa la nyipici? Drei hi lai ewekë hnei angatre hna kuca.—Ite Huliwa 1:8; 8:29-38; 10:19, 20, 44-48; 13:2-4, 46-48.
3 Itre Nyine Anyipicine Ngöne La Hneijine Së: Kola amamane hnene la tusi Hna Amamane la aqane catre eatrongëne enehila la huliwa ne cainöje trootro, kola qaja ka hape: “Öni Ua me tepu i Iesu, ka hape, Trohemi. . . . Nge ame la ate ajan, xome gufane jë la timi ka mel.” (Hna ama. 22:17) Hna ithuecatrene la gurupe ne la tepu i Keriso, memine la itre sine ce huliwa me angatr, ene lo “ite xaa mamoe”, matre troa cainöjëne la maca ka loi kowe la nöjei atr asë. (Ioane 10:16) The cile hnö kö troa ithahnata memine la nöjei atr asë, catre pi së cainöj, nge kola mejiune laka, troa xatua së hnene la uati hmitrötre i Akötresie. Kola amamane hnyawa hnene la Annuaire 1998, la hatrene laka, ce easë pala hi itretre nyihluei Akötresie memine la ua i Nyidrë. Drei la thangane la huliwa cili! Ame ngöne lo lue macatre ne huliwa ka ase hë, kola mama laka, ma troa hetre 1 000 nge hetre munëne la etrune la itre atr ka xome la bapataiso ngöne la nöjei drai.
4 Loi e xecie koi së laka, tro pala hi a ce me së hnene la Ua i Akötresie, ngöne la easë a cainöjëne la maca ne Baselaia tune la hna amekötine hnei Iehova. Celë hi mekune lai ka troa xatua së me upi së troa isa catre kuca la huliwa ka sisistria ne la nöjei huliwa asë, ene la huliwa ne Baselaia.—1 Tim. 4:10.