Pine Nemene La Angatre a Pionie?
1 Hna perofetane göi Keriso, ka hape, ‘hna ulumi nyidrë hnene la aja atraqatre kowe la ēnē i cilie.’ (Sal. 69:9) Hnene laka, atraqatre la aja i nyidrë kowe la nyipi hmi i Iehova, haawe, nyidrëti a amë panëne la huliwa ne cainöj. (Luka 4:43; Ioane 18:37) Ceitune hi la ajane cili, ene la troa cainöjëne la nyipici, memine la huliwa hna xome enehila hnene la itretre anyipici Iehova. Ngöne lo macatre ne huliwa hnapan, hna e la 645 509 lao trejine ka xome la huliwa ne pionie e nöjei treu. Pine laka, ase hë së qaja koi Akötresieti laka, easë a troa nyihlue i Nyidrë, haawe, loi e tro së a wangatrune hnyawa ngöne la thith, maine ijije tro së a ahmaloeëne la aqane mele së, matre tro së a hane pionie ka ixatua, maine pionie lapa pena.—Sal. 110:3; Ate Cai. 12:1; Rom. 12:1.
2 Pine laka, angatre a mele hnine la ketre fene ka aja manie catr, nyimutre la itre atre ne fen ka thaa trotrohnine kö la kepine matre kola catre huliwa hnene la ketre atr, ngo thaa koi manie kö me pi mama. Pine nemene matre, kola huliwa tune lai hnene la itre pionie? Atre hnyawa hi angatre laka, kola kuca la ketre huliwa nyine iamele. Pine laka, atraqatre la ihnimi angatre koi Iehova me kowe la itre atr, haawe, hetrenyi thei angatre la trengecatr, nge angatre a ketre drenge laka, hnëqa i angatre troa xatuane me amelene la nöjei atr asë. (Rom. 1:14-16; 1 Tim. 2:4; 4:16) Hna qaja hnene la lue trefëne ka pionie ka hape: “Pine nemene matre, easë a xome la huliwa ne pionie? Hapeu, atreine kö së troa qaja koi Iehova la kepine matre, thaa hane kö së pionie?”
3 Hna cinyihane hnene la ketre söre la kepine matre eahlo a mekune troa pionie: “Hnenge me föi eni hna mekune tro hi a huliwa hnene la ala caas, matre kolo lai a hape, troa trije la itre xaa ewekë ka thaa nyipi kö ngöne la mel. Ngo hnei Iehova pala hi hna amanathithi nyiho, thaa hna nuetriji nyiho kö troa puafala, maine troa hetre hna ajane pena. . . . Eni a öhne e cili la sipu kepine matre easë a mel—ene la troa xatuane la itre atr ka hetre ajane troa atre laka, Iehova la nyipi Akötresie, nge thaa nanyi kö Nyidrë kowe la itre ka thele Nyidrë.” Pine laka, kola öhne hnene la itre pionie laka, nyimenyime catre hë la itre drai, haawe, angatre a xome hmekuje hi la itre ewekë ka sisitria kowe la mel, me thele catrëne pe troa hetrenyi la itre trengamo ngöne la ua ene lo ka troa epine palua.—1 Tim. 6:8, 18, 19.
4 Maine ijije koi epun, tuneka matre hane fe epuni tune la itre trejine trahmanyi me föe, itre hadredre thauzane la etrune ngöne la fene hnengödrai asë, ka xome la huliwa ne pionie? Celë hi huliwa nyine tro epuni a hane xom, matre hetrenyi fe epuni la madrine ka eje thei angatr.