Kola Nyimutre Pala Hi La Itre Ka Lapaun
1 Tune lo hneijine i Iesu, kola mama laka, sisitria catre la aqane kökötre ne la ekalesia i keresiano ngöne la hnedrai së enehila. (Ite Hul. 2:41; 4:4) Ngöne lo macatre hnapan, hna e la 366 579 lao atr ka xome la bapataiso, kösë lo 1 000 nge sin la etrune ngöne la caa drai! Hna sasaithe la caa milio lao atr ka xome la bapataiso ngöne lo köni macatre ka ase hë. Eje hi laka, hnei Iehova hna ami atrene la nöje i Nyidrë.—Ite Hul. 5:14.
2 Nyimutre catre la itre atr ka xötrei xome la bapataiso, angatre a ajane tro la itre trejine ka catre catre hë ngöne la lapaun, a xatua angatre me ini angatr, pine laka, thatre pengöne hnyawa petre kö angatre la mele ne keresiano. (Rom. 15:1) Nge ngöne hë la itre macatre thupene la hnei angatre hna bapataiso, hetrenyi pala kö thene la itre keresiano cili, la itre ka thaa hane “tro kowe la hna tixenuë.” (Heb. 5:12; 6:1) Celë hi kepine matre, ngöne la tusi Paulo koi angetre Heberu, hnei nyidrë hna qaja atrune la itre götrane hna troa nyipiewekëne hnene la itre keresiano, maine angatre a ajane troa kökötre ngöne la ua. Nemene la itre götrane cili, nge tuneka la aqane troa hamëne la ixatua ka ijij?
3 Troa Hetrenyi La Itre Hna Majemine Ka Loi Göi Ini: Thenge la ini hna hamëne hnei Paulo, ame la troa atreine hamë ini, ke, ene la troa catre ini, me wange hmaca la hna inin, me huliwane la “xeni ka [catr NW]” hna hamëne hnene la organizasio i Iehova. (Heb. 5:13, 14; wange ju La Tour de Garde ne 15 ogas 1993, götrane 12-17.) Maine tro epuni a porotrike memine la itre ka xötrei hmi, me ce thawa me angatre la itre mekune ka sisitria ne la nyipici hnei epuni hna ketre sipu xome qa ngöne la itre itusi hnei epuni hna e, haawe, tro ha hamë ajane koi angatre troa isa majemine inine la Tusi Hmitrötr. Ame ngöne la itre xaa ijin, pane hëne jë la ketre trejine ka xötrei hmi, troa hane sine la sipu etidi epun, maine ini tusi fami pena.
4 Troa Sine Pala Hi La Itre Icasikeu: Tro la aqane catre i epuni troa sine la itre icasikeu, memine la itre trengewekë nyine ixatua hnei epuni hna qaja ngöne la ihnim, a xatuane la itre atrene la ekalesia ka xötrei bapataiso, troa neëne la ketre götrane ka nyipi ewekë hna qaja hnei Paulo, ene laka—“hna majemine” hnei itre xane troa thaa hane sine la itre icasikeu i keresiano. (Heb. 10:24, 25) Xatua angatre jë troa trotrohnine hnyawa laka, ame la itre icasikeu, ke, celë hi hnapo ne mele i angatre lai ngöne la ekalesia. Inine jë troa amamane koi angatre laka, ame la ikep, ke celë hi ketre götrane ne la ihnimi trejine e hnine la ekalesia.
5 Amamane Jë Së La Mejiune Së Koi Iehova: Maine easë a ajane troa cile kowe la itre engazone la ngönetrei, me trije la itre thiina së ka ngazo, haawe, loi e tro së a thithi koi Iehova, me amamane koi Nyidrë la itre mekune së ka sihngödr, me catre ithuemacanyine la itre aja i Nyidrë. Tune lo aqane xatua së hnei Paulo, loi e tro fe la itre ka xötrei nyihlue i Akötresie a inine troa sipone me thele ixatua thei Iehova, matre hetrenyi angatre la mejiun. (Heb. 4:15, 16; 10:22) Maine tro epuni a hane qaja fe la itre ewekë hnei epuni hna melëne hë, tro ha hetre mejiune ne la trejine ka xötrei hmi petre hi, laka, Iehova a drenge hnyawa la itre thith.
6 Troa Ami Ijine Thatraqane La Huliwa Ne Cainöj: Hna amamane fe hnei Paulo laka, troa acatrene la lapaune ne la itre xan, e hne së hna “hamëne pala hi la huje ne atrunyi Akötresie.” (Heb. 13:15) Hapeu, ijije kö tro epuni a hane hëne la ketre trejine ka xötrei hmi troa ce cainöje trootro me epuni ngöne la ketre drai ne la wiik? Maine jë tro epone a ce hnëkëne la aqane troa trofë ithahnata, maine troa ce wange pena la ketre aqane troa nyiqaane ithahnata thaa hna kuca pala kö hnene la ka xötrei hmi, lo hna hamëne ngöne lo huliwa ne Baselaia.
7 Atraqatre la madrin, ngöne la kola öhne la itre atr ka alanyimu a lö pala hi ngöne la organizasio i Iehova. Maine tro së a catre troa hamë ini me xatuane la itre atr ka xötrei nyihlue i Iehova ngöne la ekalesia, haawe, itre ixatua ka tru lai nyine troa acatrene la lapaune i angatr, ewekë lai hna ajane matre ‘nyine mele kowe la itre u i angatr.’—Heb. 3:12, 13; 10:39.