Easë a “Cainöjëne La Wesiula”
1 Nyipici la hna edromëne hnei Tusi Hmitrötre göne “la ite drai hnapin,” laka, alanyimu la itre atr enehila, angatre hmekuje a “kösë thina ka ijiji Akötesie.” (2 Tim. 3:1, 5) Kola traqa la ewekë cili pine laka, thaa hna kuca hnyawa kö hnene la itre hene hmi la hnëqa i angatr, ene la troa hamëne kowe la itre mamoe i angatre la itre nyipi ihaji ne la ua. Thaa hna cilëgöline kö la Tusi Hmitrötre hnene la itre hene hmi ngöne la itre nöje ka hmi koi keriso. Ngo angatre pe kö a qaja lapaane la itre ini ka ngazo hna hamëne hnene la itre ka inamacane i atr, ene lo itre filozof, me qa thene fe la itre ka thele troa kuci inamacanëne la lapaun, maine troa thele nyin la itre jole jëne la aqane imelekeu ne la itre atr, me kuci politik, ngo thaa cainöjëne pe la Wesiula i Akötresie. Nyimutre la itre hene hmi ka thaa lapaune kö kowe la Tusi Hmitrötr. Angatre a mekune laka, thaa ka ihmeku hmaca kö eje memine la aqane mele enehila, celë hi matre angatre a thele troa sajuëne la mele hna jëne evolisio, ngo thaa hamëne pe la itre ini qa hnine la Tusi Hmitrötr, a kola qejepengöne la Atre Ixupi ka sisitria. Alanyimu catre la itre hene hmi ka thaa hane kö qaja la ëje i Akötresie, nge thaa jole kö koi angatre e troa xometrije ej, qa ngöne la itre Tusi Hmitrötre hna ahnyipixene hmaca thenge la aqane trongene la itre qene hlapa enehila.
2 Maine nyipici ekö ngöne la hneijine i Iesu, ngo kola mama hnyawa fe enhila, laka, gufa la hna cainöje hnene la itre hene hmi. (Mata. 15:8, 9) Celë hi hna perofetane lai hnei perofeta Amosa. Troa hetrenyi la “ketre jiin, thaa jinë pë xeni me tim, ngo jinë wesi ula i Iehova.” (Amosa 8:11) Sisitria la xeni ne la ua e hnine la Wesi ula i Akötresie, celë hi ewekë ka nyipi ewekë catre kowe la itre atr.
3 Aqane Amadrinëne La Itre Atr Ka Aja Ewekë Ngöne La Ua: Hna xatua Timoteo hnei Paulo troa fedre kowe la “ite hna cinyihane ka hmitrötr, ka ateine troa ainamacanëne [la atr] kowe la mel,” nge e cili hna athipe la ketre huliwa ka hmitrötre koi angeic, ene la troa “cainöjëne la wesi ula” kowe la itre xaa atr. (2 Tim. 3:14, 15; 4:2) Pine laka, itre Temoë i Iehova së, nyipi ewekë catre tro së a fedre kowe la itre ini hna hamëne hnei Tusi Hmitrötr ngöne la easë a cainöje trootro, aqane tro hi lai a xötrethenge la tulu së, ene Iesu, nyidrë lo ka qaja ka hape: “Tha qa kö thenge la ining, ngo qa thei nyidëti ate upi ni.” (Ioane 7:16) Easë a huliwane la Wesi ula i Akötresie nyine trepene la itre ini hne së hna hamën, pine laka, easë a wangatrehmekune la inamacane i Akötresie jëne itre ej, nge aja së fe tro la itre atr a hane atre la qaane la ithuemacanyi hne së ithawakeune me angatr.—1 Kor. 2:4-7.
4 Loi e tro la itre atr a drenge la nyipici qa hnine la Tusi Hmitrötre matre atrepengöi Iehova me lapaune koi Nyidrë. Celë hi kepine matre hnei Paulo hna cinyihane ka hape: “Tro angat’a lapaune tune ka koi nyidë lo hnei angate hna tha deng? Nge tro angat’a denge tune ka nge pëkö ate cainöj?” (Rom. 10:14) Ame la troa cainöjëne la Wesi ula i Akötresie, ke, celë hi aqane tro së lai a xatuane la itre xaa atr troa hetrenyi la lapaune jëne la nyipi atrehmekune matre tro angatre a hane lapaun. Ketre, atreine hi tro la atrehmekune cili a saze la itre atr, matre lolo la mele i angatr. Hna qeje Tusi Hmitrötre hnene la ketre trahmanyi ne papale ka cinyihane la itre itus, öni nyidrë: “Pëkö itusi ka sisitria hune eje ekö, ketre tune mina fe enehila, pine laka, eje a hamë epuni la itre ini ka loi matre ijije kowe la itre atr ka ajane troa lapaune me mele nyipici troa eatrongë angatr.”
5 Troa wangatrehmekune hnene la nöjei atr ka thele ielene la nyipici ngöne la ua, laka, hna sajuëne eje hnene la musi ne la Wesi ula i Akötresie. Ame ngöne la macatre 1913, kolo petre kö a ini hnei Frederick W. Franz, nge thöthi pala kö, angeice a kapa ju la ketre boroshüre ka co hna hape, Où sont les morts? Thupene la hna canga e la mekune i Tusi Hmitrötre kowe la hnyinge celë, angeice a qaja ju ka hape: “Celë hi nyipici la.” Itre milio lao atr ka thele nyipici, angatre fe a hane qaja tune lai. Qa ngöne lai, loi e tro së a catre cainöjëne pala hi la Wesi ula, jëne tro fe së lai a hane madrine troa drenge la itre xane a qaja ka hape: “Celë hi la nyipici la.”