Kola Sa La Itre Hnyinge i Nyipunie

◼ Nemene la nyipi aliene la hnepe hnëewekë hna hape “frer” me “sör” tune lo hnë hna majemine qaja qene drehu kowe la itre trejine me easë ka hape, “ca madra” trahmanyi me föe?

Ame la hne së hna trotrohnine ngöne la kola qaja la itre hnepe hnëewekë hna hape “frer” me “sör,” ke, kola qaja la itre atr ka ce keme me thin. Qa ngöne la aqane imelekeu ne la fami, kola mama ka hape hetrenyi la inyipi thei angatr, nge caasi hnyawa la itre trejine me tremun, pine laka hnei angatre hna ce mel, nge hna ce hetru angatr, matre ihnimikeu catre angatr.

Hnei Iesu hna inine la itretre drei i nyidrë troa hë Iehova ngöne la thithi ka hape “Tetetro i anganyihunieti.” Jëne la hnëewekë celë, ke, kola amamane ka hape ame së itre keresiano, ke, easë la itre atrene la fami ka caas, nge caasi hi la aja së, nge e hnine ej, easë a madrine atraqatre la aqane imelekeu së ngöne la götrane la ua. Hna ithahnatane atrune la mekune cili hnei Iesu ngöne la nyidrëti a qaja kowe la itretre drei i nyidrë ka hape “ite tejine asë nyipunie.”​—Mata. 6:9; 23:8.

Pine laka, easë fe e hnine la lapa ka ca hae i Akötresie, me lolo la aqane imelekeu së ngöne la ua, ke, easë a hëne la ketre atre ne la fami ka hape “Frer” me “Sör,” kola mama hnyawa lai ngöne la itre ijine icasikeu ne la ekalesia. Ngöne la itre ijine cili, ke, kola wangatrehmekune hnene la ka cile fë la cainöje la itre trejine hna bapataisone hë, haawe, nyidrë a hë angatre hnene la hnepe hnëewekë ka hape “frer” maine “sör” nge qaja jë pë hë la ëje ne lai atr hna ithahnata kow.

Hapeue la itre atr hna tha bapataisone nge ka ajane troa hane qejemekune ngöne la itre icasikeu, tuneka la aqane troa hë angatr? E nango qea ha la hna ce huliwa hnene la ketre atr memine la nöje i Iehova, nge easenyi hë tro angeic a nue la mele i angeice koi Iehova, nge kolo ha goeë angeice tune la ketre Temoë i Iehova, haawe, pëkö ejolene troa pane hëne la “Frer” maine “Sör” qëmekene la ëje i angeic. Aqane tro fe hë lai a hëne la atr ka cainöj, ngo tha hna bapataisone petre kö.

Ame la ketre götran, ame la itre atr ka ajan, ka xötrei sine la itre icasikeu, nge tha ka trongëne petre kö la itre hna amekötin, ke, tha ijije petre kö troa hane wangatrehmekunyi angatre kösë itre atrene la fami i Akötresie. Tha tro kö a hane hëne la itre atr cili ka hape “Frer” maine “Sör,” pine laka tha hetrenyi pala kö thei angatre la aqane imelekeu ngöne la ua ka eje thene la lapa ka ca hae i Akötresie. Haawe, ngöne la itre ijine icasikeu, ke, tro hi së a hëne la ëje i angatr.

Ngöne la easë a qaja la hnepe hnëewekë “frer” me “sör” ngöne la itre icasikeu ne la ekalesia, ke, kola amamane la itretrengekeu ka catr, me ka tru aliene kö hune la troa pane qaja la ëje ne la atr. Kolo lai a amekunë së fe la eloine la aqane ce mele së hnine la fami ngöne la ua fene la musi ne la Tretretro së, ene Iehova Akötresie. Easë mina fe a mekune la ejuine la aqane ihnimikeu së, memine la ihnimi trejine ka eje the së asë.​—Efe. 2:19; 1 Pet. 3:8.