La Hatrene Mel
1 Qëmekene tro Iehova a aeatrëne la itre ewekë hnei Nyidrëti hna amekötiin, ke, Nyidrëti palahi a pane thuemacane la itre ka akötre matre hetre jëne mele i angatr. Ame ngöne lo hneijine i Ezekiela, ke, hetre itre atr ka treije me awe, pine laka sisi la itre ewekë hna kuca. Hnei Iehova hna kuca matre hetrenyi la itre atr ka ijije troa mel, lo hatrene iamele. (Ezek. 9:4-6) ketre tune fe enehila, maca ka loi la hatrene iamele. Nyipiewekë catre la hnëqa së.
2 Ame la ewekë nyine troa kuca panën, ke, ene la troa wangatrehmekune la itre atr ka hni ka loi. Loi e tro së a ami ijine matre iwai hmaca. Ngöne la xötrei iöhny, ke, troa cinyihane la tusi hna amë pe memine la taane mekune hna ithahnataan; celë hi aqane tro lai a hnëkë kowe la ijine kola troa iwaihmaca. Troa hetre thangane ka loi la iwaihmaca së e hne së hna hnëkëne la itre nyine tro së a qaja me nyine troa kuca ngöne la easë a bëek hmaca.
3 E hna amë “La Tour de Garde,” ke, sisedrëne jë troa köjane la taane ka tru hnin’ej:
◼ “Hanawange la hna cinyihane ngöne la icetröne ne La Tour de Garde kola hape ‘ithuemacanyine la Baselaia i Iehova.’ Tha ka ceitu kö la zonale celë me itre xan, pine laka ej’a isigöliine la Baselaia i Akötresie, ene laka, eje hmekuje hi la nyin ka ijije troa apatrene la nöjei jole ngöne la fene hnengödrai. Ej’a qejepengöne la hna troa kuca hnene la Baselaia i Akötresie, ngöne la ijine troa aeatrëne hnei Akötresie la aja i Nyidrë e celë fen. Celëhi lo maca ka loi hnei Iesu hna qaja ekö, nge hna troa cainöjëne e cailo fene.” E jë Mataio 24:14, nge qejepengöne jë la aqane troa kapa lapaane e nöjei treu La Tour de Garde, memine la aqane troa isa inine la Tusi Hmitrötre jën’ej.
4 Maine jë epuni a ajane troa amamane la enyipiewekëne la Tusi Hmitrötr, me troa e lapaan’ej. Loi e tro epuni a qaja ka hape:
◼ “Eahuni a wangatrehmekune thene la itre atr hne huni hna atre, laka alanyimu la ka madrine la itre ixatua ka loi ngöne la aqane troa cile kowe la itre jole ka traqa koi së enehila. Hapeue tro epuni a thele eka la itre ixatua hnei epuni hna troa mejiune kow? [Nue pi troa sa.] Nyimutre la itre atr ka pë madrine hë pine laka hnei angatre hna mejiune menune me thele ihaji thene la itre sine i angatr maine thene pena la itre atr hna nyithupene troa hamë ihaji. Ame ngöne la ketre götran, ke, hnene la itre milio lao atr hna öhne la sipu qeqene la itre eamo hnei angatre hna mejiune kow, ene la Tusi Hmitrötr. Tusi Hmitrötr’a inine la aqane tro së a cile kowe la itre jole hne së hna qemeke kow. [E jë la 2 Timoteo 3:16, 17.] Ngacama, hnei epuni hna mekune laka jole e troa trotrohnine la Tusi Hmitrötr, madrine ni troa amamane koi epuni la aqane troa öhne la itre ixatua ka ijije thatraqane la mele së, hnine la trengamo ka sisitria.” Sisedrëne jë la ithahnata me fe ngöne “Index des mots bibliques les plus importants,” nge göeëne ju la hna ithahnata hna hape “amour” ngöne lo itre götrane e pune la Tusi Hmitrötr, ene lo Traduction du monde nouveau, nge fe jë kowe la itre xaa mekene tusi ka amamane la aqane tro la ihnimi a xatua së troa isenyine la itre jole së memine la itre xan, matre tro palahi së a iloi.
5 E ajane së troa nyiqaane inine la Tusi Hmitrötr, ke, loi e tro së a huliwaane la itus “Vous pouvez vivre éternellement sur une terre qui deviendra un paradis,” ijije tro së a qaja ka hape:
◼ “Easë a hnime la itre fami së, nge easë fe a ajane troa loi la mele i angatr. Nemene la manathithi hna troa kapa hnene la fami i epun, e hna hane mele ngöne la fene ka tune la?” Amamane jë la itre iatr ngöne la götrane 156-7. E jë la caasi maine lue mekene tusi hna cinyihane hnine la itre götrane celë, nge qaja ju ka hape itre hna thingehnaeane lai hnei Iehova Akötresie, ka thatreine kö Nyidrëti thoi. Amamane ju la itre mekene hna fejane ngöne la götrane 5-6, nge hnyingëne ju kowe lai atr la taane mekune hnei angeice hna ajane troa atrepengön’atrun; fe jë kowe la mekene hnei angeice hna iën, nge ithahnataane ju la caasi maine lue paragaraf.
6 Hapeu, ajane fe kö epuni troa hane xatuane la ketre atr matre hetrenyi angeice la hatrene ne mel? E maine ejehi lai la mekune së, ke, tro së a ‘kuca asë la qa’së, ene la troa hnëkë hnyawa, me canga sisedrëne palahi me canga wange hmaca lo itre atr hne së hë hna öhn, a ka hetre hnine aja troa drei së.—2 Tim. 4:5.