Xötrethenge Jë Së La Tulu Së Tune La Itretre Trofë La Lai
1 Hnei Iesu hna sipu qeje nyidrëti kö ka hape: “Ini la lai ne la fene hnengödrai.” Hnene la itretre drei Iesu hna xötrethenge la tulu i nyidrë, celëhi matre hna hë angatre ka hape “lai ne la fene hnengödrai.” (Mata. 5:14) Nge, pine laka Iesu hi la “lai ne la fene hnengödrai,” ijije tro nyidrëti a qaja ka hape, am’asë la itre ka xötrethenge nyidrë, ke, tro fe angatr’asë a hetrenyi la “lai ne la mel.” (Ioane 8:12) Nyine amamane lai koi së itretre trofë la lai ngöne la ua, laka tha tro pi kö së a nue la ketre ewekë troa juetrën, maine thingijëne pena la lai.
2 Hnene la organizasio i Iehova hna ini së matre maca hnyawa së troa trofë la lai. E maine easë a trongëne hnyawa la ihaji, me ini hne së hna kapa, ke, ijije tro së a xatuane la itre atr ka kösau troa fe la itre hni angatre kowe la nyipi Baselaia. (1 Tim. 4:6) Ame la angetre troa trofë la lai, ke, tha angatre hmekuje kö a troa ithahnataane la nyipici ngöne la nöjei ijine ka ijij, ngo loi e tro fe a hetrenyi thei angatre la thiina ka loi ka eje thene la itre keresiano. Epi tha tro kö a qaja angazo së pine la itre thiina së. Tune lo itretre drei Iesu, loi e tro palahi së a amamane laka ame la hmi hna nyitrepene hnene la ini qathei keriso, ke, celë hi trepene mele së enehila. (Efe. 5:9; Tito 2:7, 8, 10) Nyipiewekë tro së a kuca la itre huliwa ka loi matre tro la itre xan’a goeën, nge tro ha upi angatre troa atrunyi Akötresie.—Mata. 5:16.
3 Hnene la ketre temoë hna kapa la ketre hnyinge ka ketre pengöne ngöne la angeic’a cainöje trootro. Traqa ha angeice ngöne la ketre hnalapa a öhne la lue trefën, ka tru la kucakuca i nyidro; ngo, nyidroti a ajane catrëne troa amë la manie i nyidro ngöne baak. Ene pe sipone jë hi nyidro kowe la temoë maine ijije tro angeic’a xatua nyidro. Hna kapa la sipo i nyidro hnene la temoë, nge kola aca hamëne pi la 200 000 F CFP nge sin! Thupene la hnei angeice hna amë lai mani ngöne baak, angeic’a canga bëeke hmaca me hnyingëne kowe lo lue trefëne ka hape: “Hnauëne laka epuni a mejiune koi eni, ngo thatre ni pe hnei epun?” Ame hnei nyidroti hna sa ka hape: “Atre hi hun, nge atre fe hi la nöjei atr laka ame la itre temoë i Iehova, ke, celë hmekuje hi itre atr nyine tro së a mejiune kow.” Drei la madrine së me ole së, ngöne laka, easë a trongëne hnyawane la itre tulu ka meköti ne la Tusi hmitrötr, ene pe atrunyi Akötresieti jë me metrötrëne la atresiwa i Nyidrë!
4 Ame ngöne la ketre materenel, hnene la meteresi hna qejepengöne kowe la itre nekönatre la kepine matre hnene la nekö jajinyi ka sikisi lao macatre hna thipëne troa sine la huliwa i angatr, ene la troa nyihane la iatr nyine atrune lo feet hna hape Halloween. Hnene la meteresi hna qaja amamane la madrine i eahlo kowe la nekö jajiny, pine la lapaune i nyëne kowe la itre hnei nyëne hna inin. E maine hne së hna catre hni kowe la ketre ewekë, ke, kola qaja hnene la ka inine ka hape, tha tro kö së a xouene troa isigöliin’ej. Ame lai jidri cili, ke, hnene lai meteresi hna pane waipengöne la itre ini hnei eahlo hna lapaune kow, ene pe wangatrehmekune ju eahlo laka isazikeu la mele i eahlo memine la itre hna inin. Ame la drai thupen, ke, hnei eahlo hna thuemacane ka hape tha tro hmaca kö eahlo a ce hnëkëne memine la hanekönatre ne la uma ne ini eahlo, la itre feet ka tha ihmeku kö memine la itre ini hnei eahlo hna lapaune kow!
5 Ngöne la nöjei götran, ke, atraqatre la aja ne la nöje i Iehova tro la lai a hudrum. Hna haine hnene la itre ka ini, me itre hna inin, la itre thiina ka loi ne la itre thöth. Kola qaja aloine la maca ne baselaia, hnene la aqane ujëne la itre trejine ngöne la itre götrane hnei angatre hna lapa. Hnene la huliwa ne cainöje e nöjei ijine ka ijij, hna thuejëne la nöjei atr ka hni ka loi troa ajane troa atrepengön’atrun. Nge, tro la aja së memine la hni së ka meköti ngöne la hnëqa ne hmi a isa anyipiciin. Ejehi laka, atreine tro së a amejëne la aja ne la itre atr kowe la nyipici, ngacama easë ngöne la ketre götran, maine hnene la hne së hna kuca.
6 E tro së a mekune hnyawaane la aqane mele ka ej, nge ka sisitria hna amë pe nyine tulu koi së hnene la atr ka tru hune la nöjei atr, ene Iesu, ke, tro hë së a sisedrëne troa apexejene la itre hne së hna atrein, tune la itretre drei nyidrë. Qa ngöne lai, maine tro së a xomi tulu thei nyidrë, nyipici, tro hë la lai së a “hudume koi angat’asë.”—Mata. 5:15; 1 Pet. 2:21.