Thele Jë La Itre Atr Ka Kapa La Ini Qa Thei Akötresie
1 “Pëkö ate ateine tro koi ni, e tha hna e angeice kö hnei Tetetro ate upi ni.” (Ioane 6:44) Iehova la ka goeëne la hni ne la atr, tro Nyidrëti a amanathithine la itre atr ka kapa me ka trongëne la ini qa thei Nyidrë. (Iere. 17:10; Ioane 6:45) Madrine së troa kuca la hnëqa së, easë itre ka ce huliwa troa thele la itre atr ka akötr, nge ka treqene madrine la fene ka hnyipixe.—Sal. 37:11; 1 Kor. 3:9.
2 Hnei Iesu hna aceitunëne la itretre drei nyidrë me “Itretre thinyii atr.” (Mata. 4:19) Maine nyipici laka, troa huliwa catre ngöne la götrane huliwa celë, ame pe, atraqatre la madrine së troa kapa la itre thangane ka loi. Tha loi kö tro së a huliwa koi së kö, loi pe tro së a thapa la itre “i” qa ngöne la mec. Ame la atr ka atreine nyi i, ke, loi e tro angeic’a atre la aqane troa xami. Ketre, loi e tro së a wange la aqane trofë la maca ne la Baselaia, matre amejëne la aja ne la itre ka drei së. Nge, troa mama hnyawa lai ngöne la easë a troa iwai hmaca. Nemene la nyine tro së a qaja?
3 E maine kola amamane la aja kowe la itre mekune ka eje hnine “La Tour de Garde” ka qeje hmi, ke, qaja jë ka hape:
◼ “Ame e cili lo hnei nyiso hna ithahnatane la kepine matre alanyimu catre la itre atr ka tha ajane kö troa porotrikë hmi. Hapeu nemene fe la mekune i epun, kolo kö a isi la mekune celë memine la itre ka lapa ezi së ka qaja ka hape keresiano angatr? Maine jë epuni a ketre hnyingëne la kepine matre ketre jëne iwesitrë me isatro la hmi.” Nue pi troa sa. Fe jë la itus Comment raisonner ngöne la götrane 322, nge ithahnatane jë la itre mekune fene lo hna cinyihan “Nemene kepine matre nyimutre la itre hmi?”
4 Tupathe jë fe epuni la aqane trofë ka ceitun, nyine troa nyiqaane troa porotrikë hmi:
◼ “Hapeu hetre itre aqane kuca kö matre xeci koi së laka hetrenyi the së la nyipi hmi? [Nue pi troa sa.] Hnene laka tru la nöjei hmi ka isa pengön, thatre hë la itre atr la nyine tro angatr’a kuca.” Fe jë la itus Comment raisonner, götrane 328-9, ngöne lo kola ithahnatane la hnying “Tuneka la aqane tro la ketre atr a atre laka nyipici la hmi i angeic?” The ithahnatan’atrune kö la hnyinge naba 5, “Hapeu, ihnimekeu kö la itre atren?” Qejepengöne ju la aqane troa atrepengön’atrune jëne la hna isa ini Tusi Hmitrötr.
5 E Maine ketre atr a amamane laka kola hane ketri nyidrë hnene la itre ewekë ka traqa kowe la fen, ke, pane tupathe ju epuni la ketre aqane ithahnata celë:
◼ “Ejehi laka hna ketri epuni fe hnene la itre ewekë ka ngazo ka traqa koi së enehila, itre ewekë hne së hna melën, me hna akötre fë hnene la itre fami së. Tusi Hmitrotr’a amamane laka tro Akötresieti a aeatrëne la ketre hnei Nyidrëti hna thingehnaeane ka mingöming, nge calemi hë.” E jë la Itre Edomë 2:21, 22, nge qejepengöne jë la aqane thingehnaeane i Iehova la ketre fene ka troa tingetinge epine palua.
6 Ame la epuni a troa iwai hmaca thupene lo hna nyiqaane hamëne la Itre Ithuemacanyi ne la Baselaia, mekune kö epuni hane hamëne kowe la itre atr ka tha hane kö kapa lo itre Itre ithuemacanyi ne la Baselaia. Troa ithahnatane ngöne la Huliwa ne Baselaia ne treu Mei la nyine tro epuni a qaja ngöne lo epuni a troa wange hmaca la itre atr ka kapa la Itre Ithuemacanyi ne la Baselaia.
7 Nge pine laka ka “men” la Tusi Hmitrötr, loi e tro së huliwaan’ej, ngöne la easë a nyiqaane ithahnata. (Heb. 4:12) The luelue kö troa upe la atr troa ketre sipu e la Tusi Hmitrötr. (Wange ju la Itre Huliwa 17:11.) E maine hne së hna ketre catre kuca palahi la hne së hna atrein, ke, tro Iehova a amanathithi së.