Nyipi Ewekë Tro Së a Thele Hnyawa La Itre Ka Ajane Troa Ini Tus
1 Kola mama hnyawa enehila laka, easenyi catre hë matre patre pi la fene celë (2 Tim. 3:1-5). Kola hapeu? Kola hape hatrene ka ngazo kowe la mele ne la itre atr. Ngo eje hi laka, atreine hi së troa xatuane la ka alanyimu matre mele angatr (Itre Edromë 3:27). Celë hi matre, nyipi ewekë tro së a catre nyiqaane me inine la Tusi Hmitrötre kowe la itre atr.
2 Nyimutre la itre ka madrine troa ini Tusi Hmitrötr, jëne la itre itusi Sasaiatri. Ngo ame la ewekë hna thele me ajane hnene la itre atr, ke, ene la tro së a hane wangatrunyi angatr me xatua angatr, hnene la troa ini angatre palahi la Tusi Hmitrötr. Haawe, nemene la aqane tro së a kuca matre troa hetre madrine i angatre troa ini Tus?
3 Celë hi matre tro së a thele la itre hnyinge ka ihmeku memine la aja ne la ka alanyim. Maine, troa hnyingëne la kepine matre pë hë hmahmaane la itre ewekë ka sis, tha catre kö nge gomegome la mele ne la itre fami? Hnauëne laka ketre nyine axouene la ihumuthi me pi isi? Nge hnauëne laka Akötresieti a nue la akötr ngöne la fene hnengödrai, nge itre xane ju kö. Ketre, wangatrehmekune ju la itre ewekë maine itre ithuemacanyi pena ka ketr la hni ne la itre atr ngöne la götrane ne cainöje i epun. Amamane ju la aqane sa i Tusi Hmitrötre la itre hnyinge cili. Amamane jë fe la enyipiewekëne la itre itusi hne së hna hamën, pine laka, itr’ej a troa xatua angatre troa atre la hnei Tusi Hmitrötre hna troa qaja, ngöne lai itre hnyinge cili, memine fe la itre xaa ewekë ka huliwaane la mekune i angatr.
4 Nyipi ewekë troa fe la aja ne la atr matre tro angeic’a hane qaja la mekune i angeic. Canga trotrohnine ju la itre aja i angeic. Ithahnata jë xötreithe la itre hnei angeice hna ajaan maine itre hna xouene pena. Amamane jë la ithuemacanyi qa hnine la ketre itus, maine boroshür, maine zonal, maine ketre tarak ka qeje pengöne la nyin hna hamëne hnei Tusi Hmitrötre thatraqane la itre ejolene la fene hnengödrai. Qëmekene troa trotriji angeic, amë ju pë hë la caasi maine lue hnying hnei epuni hna mekun, ka ijije troa hamëne la aja ne troa kepe së hmaca ngöne la easë a troa bëek. Nge ngöne la ijine epuni a bëeke hmaca, ke, mekune hnyawa kö lo lai itre hnyinge hnei epuni hna amë pe, nge xatua angeice jë me amamane la hnei Tusi Hmitrötre hna qaja, jëne la ketre itus.
5 Eje hi laka troa saze la mele ne la itre atr e hne së hna nyiqaane ini Tusi Hmitrötre me angatr, me xomesisedrëne palahi la huliwa cili. Loi e tro së a amamane la ihnimi së kowe la itre atr hne së hna iöhnyi memine ngöne la hne së hna cainöje trootro, maine ngöne la nöjei ijin. Qa ngöne lai, loi e tro palahi së a hnëkë hnyawa matre amejëne trongëne la aja i angatr. Ketre, troa hetrenyi la xomihni ngöne la easë a hamëne palahi la xeni ne la ua. Troa wangatrune me thele troa xatuane la itre atr. Tro së a hetre ajane troa canga xatuane me amelene la itre atr, pine laka easenyi hë la pune la fen. Nyipi ewekë tro palahi së a catre ngöne la huliwa ne troa ini Tus, nge catre pi fe së troa thith. — 1 Tes. 5:17.
6 Ketre madrine katru troa öhne laka, kola easenyine la waane milio lao ka xome la bapataiso ngöne la köni macatre ka ase hë (Mat. 28:19, 20). Ngöne la nöjei treu, ke, easë a inine la Tusi Hmitrötre memine la foa milio nge sin lao atr, hatrene hi lai laka, tha easë kö a hnengazone caasine la mele së, ngo mele ne fe la itre xaa atr. Tuneka fe epun? Hane fe kö epuni wangatrune me catre ngöne lai huliwa cili? Mekune hnyawa kö së, laka, e ajane së troa mel, easë memine la itre xan, ke, loi e tro sa catre ngöne lai huliwa cili. — Ezek. 3:17-19.