Thith La Kola Xou

Iesu a ase thithi me itre aposetolo ka mele nyipici. Matre ame la angatr a ‘ase nyima, angatr a elë jë kowe la Wetr Elaio.’ (Mareko 14:26) Angatr a tro ju e koië ngöne la ketre götrane hna hëne ka hape, Gethesemane, lo hlapa hna majemine tro kow hnei Iesu.

Ame hë la angatr a traqa kowe la ketre götrane ka mingöming, fene la itre isinöe, Iesu a nue pi la eitre lao aposetolo. Ma hnei angatre pë hë hna cil ngöne la hnë lö ne la hlapa, ke öni nyidrëti koi angatr: “Lapa ju e celë, ke tro ni a pane tro troa thith.” Nyidrëti a ce tro jë me köni aposetolo—Peteru, me Iakobo, me Ioane—nge angatr a ce lö jë kowe la hlapa. Kola hace catre la hni i Iesu, matre öni nyidrë kowe la ala kön: “Hace catre la hning, nge kösë eni ha troa mec. Pane lapa ju nyipunieti e ce, nge catre jë hmeke me eni.”—Mataio 26:36-38.

Iesu a nango ananyi angatre jë, nge nyidrëti a ‘sa iwatingöne ca, me thith.’ Nemene la sipo i nyidrë ngöne la ijine jol? Öni nyidrë: “Kaka, pëkö ewekë hna thatreine kuca hnei nyipë; epi ananyine qaatheng la vere celë. Ngo tha thenge kö la ajang, ngo aja i nyipëti pe.” (Mareko 14:35, 36) Nemene la alien? Xele hë nyidrë ma hamë thupene mel? Waea!

Qa hnengödrai, hnei Iesu hna öhne la akötrene la itre atr hna humuth hnei angetre Roma. Nge enehila, ketre atr hë nyidrë, nge drenge hë nyidrëti la akötr, matre trotrohnine hi së laka, tha ajane kö Iesu troa meci tun. Ngo ame la ka ajolë nyidrëti catr, tre tro la itre atr a adrone la ëje i Akötresie pine la aqane meci nyidrë, ke tro Iesu a mec ceitu me atre kuca la ngazo. Itre hnepe hawa thupen, tro ha jei faonyi nyidrë pine silitrengathoi Akötresie.

Thupene la hna pane thithi aqeany, nyidrëti a bëeke hmaca jë, me öhne la ala kön a meköl. Öni nyidrëti koi Peteru: “ ‘Thatreine kö nyipunie troa pane ce hlë me eni koi ca hawa hi?’ Hmeke jë nyipunie, nge catre jë thith, matre tha tro kö a hane tupathi nyipunie.” Atre hi Iesu ka hape, kolo fe a xou hnei itre aposetolo, nge jidri catre hë. Matre öni nyidrë: “Canga ajane hi la hni, ngo kucakuca pe la ngönetrei.”—Mataio 26:40, 41.

Iesu a ananyi angatre hmaca jë, me sipo Akötresie troa xometrije la “vere celë.” Ngo ame ju hi la nyidrëti a bëek, traqa ju hi nyidrëti a öhnyi angatr e meköl, ngacama hna upi angatre lo troa thith, matre tha tro kö a tupathi angatr. Matre ame la Iesu a ewekë koi angatr, “pëkö nyine tro angatr a sa koi nyidrë.” (Mareko 14:40) Haawe, nyidrëti a akönia tro ju troa sa iwatingöne ca me thith.

Xou catre Iesu tro la itre atr a qeje Akötresie, pine Iesu mec tune la atre ka ngazo. Ngo drenge hi Iehova la thithi ne la Nekö i nyidrë, matre nyidrëti a upe pi la angela troa thuecatre i Iesu. Ngo tha cile kö Iesu troa sipo, nge goi ‘catre thithi hmaca jë’ nyidrë. Tha fene xou kö Iesu! Nge tha fene hace kö la hni i nyidrë! Ke eje hi, emele i nyidrëti lai, nge emelene fe la nöjei atr. Xou catre nyidrë, matre hna ‘xöla pi la zihnu i nyidrë, kösë wene madra ka mala hune ihnadro.’—Luka 22:44.

Ame la Iesu a akönia bëeke koi itre aposetolo, traqa hmaca ju hi nyidrëti a öhnyi angatr e meköl. Matre öni nyidrë: “Nyipunieti pala kö a mano me meköl ngöne la hawa celë, hanawang, easenyi hë la hawa matre nue pi la Nekö i atr kowe la ime ne la itre ka ngazo. Mejë jë, nge tro, ke hanawang! Calemi hë la atre salemë ni.”—Mataio 26:45, 46.