Iesu a Hamë Eamo Göi Mani

Ame lo Iesu a xeni ngöne la hnalapa ne lai Faresaio, itre thauzan lao atr a treqe nyidrë e trön. Hna tune fe lo e Galilaia. (Mareko 1:33; 2:2; 3:9) Ngo e Iudra, ala anyimu la itre ka ajane troa iöhnyi me nyidrë me drei nyidrë. Isapengöne kö la aqane ujë i angatr me itre Faresaio hnine la uma.

Ka tru aliene la itre pane trengewekë i Iesu koi itretre dreng, öni nyidrë: “Wange pala kö nyipunie la levene ne la itre Faresaio, ene la thoi.” Maine nyipici laka, ase hë Iesu qaja lai, ngo mama cile hnyawa ha koi itretre dreng la enyipicine la eamo celë. (Luka 12:1; Mareko 8:15) Itre Faresaio a thë troa iutipi, matre juetrëne la itre ngazo i angatr. Ngo nyipiewekë troa amamane la pengöi angatr, wanga troa hetre ethan koi itre xan. Öni Iesu: “Pëkö ewekë ka sihngödr ka tha tro kö a hane mama, nge pëkö ewekë hna juetrën, hna tha troa atre.”—Luka 12:2.

Maine jë, ala nyimu thene la itre ka drei Iesu ka traqa qa Iudra, nge ma angatre petre hi a hane drei nyidrë. Matre nyidrëti a qaja hmaca jë la itre ini hna hamën. Nge nyidrëti a thuecatre i angatre me hape: “The xouene kö la ka humuthe la ngönetrei, nge pë hmaca kö hna atreine kuca.” (Luka 12:4) Tune pala hi lo, nyidrëti a amekunë itre ka ixötrethenge laka, loi e tro angatr a mejiun ka hape, Akötresie a hnimi angatr. Nge nyipiewekë fe tro angatr a atre la nekö i Atr, me trotrohnine laka, aja i Akötresie troa xatua angatr.—Mataio 10:19, 20, 26-33; 12:31, 32.

Ame hna acilë Iesu hnene la ketre atr, nge angeic a qaja jë la jole i angeic me hape: “Atre Ini fe, upe jë la mamang troa ce thawa me eni la edrö.” (Luka 12:13) Trenge Wathebo a amekötine laka, troa hamëne kowe la haetra la lue edrö, matre maine ju, pëkö iwesitrë. (Deuteronomi 21:17) Ngo ma angeice jë a piine la ifekë ewekën. Matre xele kö Iesu ma nyixöle i ketre maine ketre, öni nyidrë: “Ke drei la atre acili ni troa nyi atre amekötin me atre thewe edrö koi epon?”—Luka 12:14.

Thupene lai, Iesu a hmekëne jë la nöjei atr me hape: “Hmeke jë, nge wange pala kö la nöjei pengöne meciun, ke ngacama hetrenyi ju hë la ketre atr la nöjei pengöne ewekë, ngo tha mele kö angeic hnene la itre ewekë cili.” (Luka 12:15) Haawe, trene mani catre ju hë ketre, ngo e traqa jë angeice mec, luzi pë hë lo lai mani i angeic. Thupene lai, Iesu a hamëne jë la ketre ceitun ka amamane laka, ka loi kö troa wangaloinyi së hnei Akötresie. Öni nyidrë:

“Ka mele hnyawa la itre hlapa ne la ketre trenamo. Ame hnei angeic hna nyiqaane mekun e kuhu hni angeic ka hape, ‘A tro jë ni la a tune kaa, ke pëhë göhnene la itre hnenge hna menuën?’ Thupene lai, öni angeic, ‘Eni a mekun: Tro ni a thë la itre uma tëng, me xupe hmaca la itre ka tru catre kö, nge e cili, tro pë hë ni a amë hnyawa la hnënge qitreng, me nöjei ewekënge ka lolo. Nge öning: ‘Haawe, hetre ewekë i eö hë koi nyimu macatre; matre mele jë, xeni jë, iji jë, nge madrine jë.” ’ Ngo öni Akötresieti jë hi koi angeic ka hape, ‘Hmo, kola sipone la mele i eö ngöne la jidri celë. Matre itre ewekë i drei pë hë lo itre hnei eö hna amë acon?’ Haawe, celë hi ka troa traqa kowe la atre thele ewekë koi angeice kö, ngo ka pë ewekë koi Akötresie.”—Luka 12:16-21.

Eje hi, ijije tro la itretre drei Iesu me itre xan, a hane kei kowe la pi hetreny. Maine jë, tro la itre ejolene la mel a sewe angatr troa huliwa koi Iehova. Matre Iesu a hamëne hmaca jë la eamo hnei nyidrë hna hamën a ca macatre hë nge sin, ngöne lo Cainöj Hune La Wetr. Öni nyidrë:

“Ea loi ju hë hna hnehengazone la mele i nyipunie, göi nyine xen, me ngönetrei nyipunie, me nyine tro nyipunieti a heetrën. . . . Pane mekune jë la itre halo: Tha ka jumi feja kö me menu, nge pë fe kö uma të i nyudren, ngo Akötresieti a thue a i nyudren. Matre, hapeu, tha sisitria kö nyipunie hune la itre waco? . . . Nge pane mekune jë la aqane cia la itre lili: Tha nyudreni kö a huliwa, me ca iheetr, ngo eni a qaja hnyawa koi nyipunie laka, trenamo catre ju hë Solomona ekö, ngo tha hane kö angeice heetre tui nyudren. . . . Haawe, the thele hmaca kö la nyine tro nyipunieti a xeni me ij, nge loi ju hë hna hnehengazo menu. . . . Atre kö la Keme i nyipunie laka, itre ewekë lai ka nyipiewekë koi nyipunie. . . . Catre jë pe thele panëne la Baselaia i nyidrë, nge tro ha hamë nyipunie la nöjei ewekë asë cili.”—Luka 12:22-31; Mataio 6:25-33.

Drei la ka thele la Baselaia? Iesu a sa ka hape, xalaithe hi, ene lo “itre mamoe ka xalaith,” itre ka nyipici koi Akötresie. Nge hna qaja e thupen la etru i angatr, ala 144 000. Nemene la pune koi angatr? Iesu a anyipicine koi angatr ka hape: “Aja i Keme i nyipunie troa hamë nyipunie la Baselaia.” Tha kolo kö a qeje mo e celë fen, itre hna atrekënön. Ngo tro la hni i angatr a ajane la “trengamo ka tha tro kö a hane patr e hnengödrai,” götran ne tro angatr a ce musi me Keriso.—Luka 12:32-34.