Nyipiewekë Troa Inue Ngazo

Drenge hë Peteru la hnei Iesu hna qaja göi aqane troa sei jol, ene la troa pane ithanata cas memine lai trejin. Ngo Peteru a pi atre ka hape, troa aija nue la ngazo i ketre.

Matre angeic a hnying ka hape: “Joxu, tro ni a aija nue la ngazo ne la trejine me eni e traqa ju angeic ngazo koi ni? A seven?” Itre xa hene ne hmi a inine ka hape, troa akönia nue la ngazo i ketre. Matre, ma Peteru jë a mekune ka hape, ka utipine catr angeic e troa “a seven” lao nue ngazo.—Mataio 18:21.

Ngo tha Iesu kö a inine troa e la itre ijine nue ngazo. Matre nyidrë a amekötine jë la aqane waiewekë i Peteru me hape: “Eni a qaja hnyawa koi eö laka, tha sevene kö, ngo 77 pe.” (Mataio 18:22) Kolo lai a hape, tro pala pë hë a inue ngazo. Tha hna sa etrune kö la itre ijine tro Peteru a nue la ngazo i itre trejin.

Thupene lai, Iesu a qaja la ketre ceitun koi Peteru me itre aposetolo, matre tro angatr a trotrohnin ka hape, qa i angatr troa inue ngazo. Nyidrëti a qaja jë la ketre hlu ka tha nyitipune la aqane iutipi i maseta. Hnene la ketre joxu hna upe la nöjei hlue i nyidrë troa isa ti gufa. Nge hetre hlu ka tru gufan, a traqa koi 10 000 lao talan [maine 60 000 000 lao drenari]. Thatreine kö angeice të. Matre hnene la joxu hna amekötine troa salemën la hlu, me ifënekö i angeic, me ha kuku göi troa ti gufa. Hnene la hlu hna sa iwatingöneca me sipone ka hape: “Pane treqene jë, ke tro kö ni lai a të asë la gufange koi nyipë.”—Mataio 18:26.

Eloine hi, tru la utipine la joxu, matre nyidrëti a apëne jë la gufa ne la hlu. Thupene ju hi lai, angeic a tro ju me ixelë memine la ketre hlu ka trene gufa koi angeic, 100 lao drenari. Angeic a xolouthe ju la hlu me öje cilën, me hape: “Canga të pi lo manieng.” Matre hnene la ketre hna sa iwatingöneca qëmeke i angeic me treij ka hape: “Eni a sipo eö troa pane treqen, ke tro kö ni lai a të asë la gufange koi eö.” (Mataio 18:28, 29) Ngazo pe, tha hnei angeice kö hna nyitipune la joxu ka nue la gufa. Hnei angeice pe hna akalabusin lo sine huliwa i angeic ka co gufa.

Iesu a qaja jë ka hape, hna öhne lai hnene la itre xa hlu, matre angatr a tro ju troa qejeqeje angeic koi maseta. Nyidrëti a elëhni ju me catrëne la hlue me hape: “Hlue ka ngazo, ase hë ni lo nue hnyawa la gufa i eö lo eö a treije fë koi ni. Ngo hapeu, ngazo koi eö troa utipine la sinee i eö tune lo aqane hnimi eö hneng?” Hnene la joxu ka elëhni hna nue angeic kowe la itre ka thupë kalabus, uti hë la tro angeic a të asë la gufa. Matre Iesu a nyipune jë me hape: “Tro fe a hane kuca tune koi nyipunie hnei Kaka e hnengödrai, e tha nue kö nyipunie qaa kuhu hni la ngazo ne la ketre trejin.”—Mataio 18:32-35.

Hane petre hi la ketre ini göi aqane troa iutipi! Tha fene gufa kö la itre ngazo së qëmekei Akötresie, ngo nyidrëti a nu. Matre nemene pe kö la itre ngazo hna kuca koi së hnei itre trejin? Nge eje hi, tha Iehova kö a aca nue la ngazo së, ngo traqa koi itre thauzan. Matre hapeu, tha ijiji së kö troa anyimua nue la ngazo ne la trejin me easë, ngacama angeic la atrekë zön? Tune lo hnei Iesu hna inin ngöne la Cainöj Hune La Wetr, tro Akötresie a ‘nue la itre gufa së, thenge la aqane nue së la ngazo ne la itre ka gufa koi së.’—Mataio 6:12.