Tha Xen—Tha Kuca Kö Itretre Dreng

Hna akalabusi Ioane thupene lo Iesu a ase feetëne la Paseka 30 M.K. Aja i Ioane tro la itretre drei angeic a xötrethenge Iesu, ngo itre treu thupene la kola akalabusi angeic, tha trongën asë kö angatr.

Enehila, easenyi hë matre feetëne jë la Paseka 31 M.K. matre itre xa atre drei Ioane a tro ju koi Iesu me hape: “Hnauëne laka, eahuni me itre Faresaio a tha xen, nge tha hane kö kuca tune hnei itretre drei nyipë?” (Mataio 9:14) Itre Faresaio a majemine tha xen, kösë aqane hmi i angatr. Matre hnei Iesu hna xome la tulu ne la ketre Faresaio ka jelemekötine la itre huliwa i angeic, angeic a thithi me hape: “Akötresieti fe, oleti laka, tha ceitunge kö me itre xa atr . . . Ke ka alua tha xeni ni ngöne la wiik.” (Luka 18:11, 12) Nge maine jë, itretre drei Ioane fe a tha xen. Angatre a kuca tun ke ewekë hna majemin, maine pena, angatr a treije pi Ioane hna akalabusin. Nge tha trotrohnine kö angatr laka, tha hane kö itretre drei Iesu tha xen pi Ioane.

Ame hnei Iesu hna hamë ceitun me hape: “Hapeu, tro kö la itre sinee ne la atre faipoipo a hleuhleu nge ce angatre pala kö memine la atre faipoipo? Ngo tro kö a traqa la drai ne troa xomi angeic qaathei angatr, nge e cili hi la ijine tro angatr a tha xen.”—Mataio 9:15.

Hnei Ioane fe hna aceitunë Iesu me atre faipoipo. (Ioane 3:28, 29) Matre, e Iesu pala kö la, tha tro kö la itretre drei nyidrë a tha xen. Ngo e meci hë nyidrë, tro hë la itretre drei nyidrë a hnëmec, me xele ma xen. Ngo tro ha aca saze e mele hmaca ha nyidrë! Eje hi, pë hë kepin tro angatr a tha xen.

Thupene lai, Iesu a hamëne jë la lue ceitun: “Pëkö atr ka cane la sine imaano ka hnyipixe hune la iheetre hnapan, ke wanga tha zezene pi hnene lai ka hnyipixe, nge troa tru catre la hna azezenyin. Ketre tune mina fe kowe la waina ka hnyipixe, pëkö atr ka troa amë ej hnine la trengene hnapan, ke e troa tun, tro ha kaqa lai trengen, me neni la waina, nge luzi pë lo trengen. Ngo itre atr pe a amë la waina ka hnyipixe hnine la trengene ka hnyipixe.” (Mataio 9:16, 17) Nemene la alien?

Iesu a xatua itretre drei Ioane troa trotrohnine laka, pëkö atr ka troa musinë itretre drei nyidrë troa xötrethenge la itre ini angetre Iudra, tune la troa tha xen. Tha traqa kö Iesu troa sisedrëne lo itre hna majemin ka troa patr. Nge tha acile kö Iesu la hmi hna nyitrepen hnei hmi angetre Iudra, me itre hna majemin. Eje hi, tha hnei nyidrëti kö hna thele troa cane la sine imaano ka hnyipixe hune la iheetre hnapan, maine ami waina ka hnyipixe hnine la trengene hnapan.