Fami i Iesu a Tro Ierusalema

Ijine hë koi fami Iosefa me itre fami, me itre sinee i angatr, troa tro e Ierusalema. Pane tronge i angatre hi la ngöne la macatre. Angatr a tro Ierusalema troa feetëne la Paseka, thenge lo hna amekötin hnene la Wathebo. (Deuteronomi 16:16) Qaane Nazareta a tro Ierusalema, kola e la 120 km. Ka tru ejolen la ijine cili ngo ka ithue madrin. Truelof hë lao macatre i Iesu, nge ketre pengöne hë la aqane goeëne nyëne la feet cili, memine la troa bëeke kowe la uma ne hmi.

Ame koi Iesu me fami i nyën, tha trongene ca drai kö la Paseka. Ke ame la drai thupen, tre kolo pane drai ne feetëne la itre Falawa Ka Pë Levenen. Feete lai ka sevene lao drai. (Mareko 14:1) Matre hna majemine hëne la ijine cili ka hape, ijine feetë Paseka. Nge ame koi fami Iesu, tre trongene lue wiik lai, qaane lo angatr a tro qa Nazareta me pane lapa e Ierusalema, nge uti hë la angatr a bëeke hmaca. Ngo ame ngöne la macatre cili, nango qea pi hë la tronge i angatr, ke hetre ewekë ka traqa koi Iesu. Hna mama la ewekë cili ngöne lo angatr a bëeke qa Ierusalema.

Ame lo angatr a bëeke hmaca a tro kolopi, hnei Iosefa me Maria hna mekun ka hape, ce Iesu me itre sinatronge i nyidro. E hej, angatr a pane cile ju troa meköl, ngo sesëkötre ju hi nyidro laka, patre pë nyën. Ame hnei nyidroti hna nyiqaane ithel thei itre sinatronge i nyidro, ngo tha öhnyi nyëne pi kö. Patre hë la nekö i nyidro! Matre hnei Iosefa me Maria hna bëeke hmaca troa thele nyën e Ierusalema.

Drai ka pexej nyidroti a ithel, ngo patre pala hi nyën. Nge goi tha öhnyi nyëne fe ngöne la hnaaluene drai. Ngo öhnyi nyën ju hi hnei nyidro ngöne la hnaakönine drai, ke nyën e hnine la ketre hnahag ne la uma ne hmi. Nyidroti a goeë Iesu a kola nango lapa nyipine la itre xa hene ne hmi i angetre Iudra. Nyën a drei angatr, me hnying, nge angatr a sesëkötre la aqane saqe nyëne trotrohnin.

Hnyinge jë hi Maria ka hape: “Neköng, hnauëne la hmunë a kuca tune lai koi nyio? Meci hë ni me kaka hna thel agö hmunë.”—Luka 2:48.

Iesu a sesëkötre ke tha canga mama kö koi nyidro ka hape, ekaa ha nyën. Öni nyën: “Hnauëne la epon a thel agö ni? Thatre kö epon laka, tro ni a lapa ngöne la uma ne la Kemeng?”—Luka 2:49.

Haawe pine laka, ce angatr hë, Iesu a bëeke jë a tro Nazareta ce me Iosefa me Maria. Nyëne pala hi a drengethenge nyidro, me inamacan me tru trootro. Nge ngacama thöthi nyën, ngo nyëne pala hi a amadrinë Akötresie me itre atr. Eje hi, ngacama co petre kö Iesu, hnei nyën pala hi hna amamai tulu göi aqane troa ajane la itre ini i Akötresie, me aqane troa drei keme me thin.